Read Alladian NEHEMIAH 9 Bible Online

NEHEMIAH 9 - Alladian bible

NEHEMIAH 9

¹Delok méélamlo, delok poolo delokke looying annyi kolang loopinana longelo Israel ami kídíe doma-tíímape, ankí gasor egem gela, delokke atuklo kédéng mollíksula dumsuto.

²Delokke Israel ami kídíde mibo ami kídí lokke angupe yéngu sudola, dagdola agí-agí paabem, delokke buluke buku kídílok imem-irem takamem ponkansuto.

³Delokke bulu agí-agí dakkollo dagdola gonta angum kope buluke Shédíke ayon kitablok porito, delokrongem gonta angumkon kope buluke paabem ponkansula, Shédíme kumsuto.

⁴Lebi kídíke ebanglo Jeshua, Bani, Kadmiel, Shebaniah, Bunni, Sherebiah, Bani, delokke Kenani bulu dagbosudola, buluke RUUTUM Shédíkelo ulo gogla kapto.

⁵Delokrongem Lebi kídíe Jeshua, Kadmiel, Bani, Hashabneiah, Sherabiah, Hodiah, Shebaniah, delokke Pethahiah bulu kumsudope poto, “Dagreptoka, delokke Turyarna agínpe turna noluk RUUTUM Shédíme yitgelangka. Takam utepooro, delokke yitgenam teyolo yitgenam angun abéna amínem yitgelangka.”

⁶Delokrongem Israellok ami kídíe sim kumnam sim kumto, “RUUTUM no petommin RUUTUME. Nomin teyong among kídíem, teyong among kídí lokke teyong amongem, delokke delok maglíng takamem, tani amongem, delokke so duuna takamem, delokke siyéngemla so yéna takamem pílenne; delokke nomin sim takam sim kaabomdune; delokke teyong among lokke maglíng kídíe nom kumsudung.

⁷Abram me ullenla Babilon among Ur lok laalenla, bík amínem Abraham emla mínne RUUTUM Shédí no min.

⁸Bíme nok keralo aapí-aang míídíínampe anla Kanaan, Hittit, Amorit, Perijjit, Jebus, delokke Girgashit kídíke amongem bík otíng-oyinem bidope emla bíkkelo daapong mobosuna RUUTUM Shédí bí nomin; delokke no nokke toge sunamem ipííto, kapeila no deenampe yéne.

⁹“No Ijiptlo ngoluke buku kídí lok atung-aréngem kaato; delo no Silíng Siyénglo buluk kapnamem tatla,

¹⁰no Pharaoh kelo, bík migom kídílo, delokke bík amonglo duuna ami takamlo irisinyo emlang iyod kídíem lengkanto, kapeila no ngoluke abu kídíem yagorupe iréénamem kénto, delokke no siloloope nokke amín kanam sim no agísue ilík suto.

¹¹Bulu amonglo pítílpe gídope no siyéngeme taapan subito; yagorupe sipar kana asi aralo elíng yoplíknam kísa bulum monmín gena miru kídíem asi eerína aralo no yopyin líkto.

¹²Doomug adonglok no bulum longelo gíboto; delokke yohlo no buluke gípeko bedangem eme adonglok ngunkan bito.

¹³No Sinai Dííte teyong lok tokla ami kídíem luposuto, delokke no bulume deena delokke aro ayon idong kídíem, delokke lulígnam aina ngiitom kídíem bito.

¹⁴No bulume nokke deena Sabbath em kénmoto, delokke nom agér ibina Mosi kelok lulígnam ngiitom kídí emlang yégang ayon kídíem bito.

¹⁵No bulum teyong among lok buluke kenonam legape donamem bito, delokke buluke tíílíng legape lííreng lok asiem ilenbito, delokke nokke bulume biyé emla togesunam amongem bomdope bulum delo gídope emla no poto.

¹⁶“Idola ngoluke buku kídíe adum-ale ito, bulu mikép-sorépla nok ngiitom kídíem tatmato;

¹⁷bulu nok agomem tatmape buluke aralo nok irisinyo inamem mínggemato; idola bulu aapíe tolla Ijiptlo ami rumkínglo yélat dokupe emla yégebonako ullatto. Idola no ayangla mesamna Shédíe, delokke asampe ayarune, marpomane, delokke yanggap ayange bíísétnape ila no bulum mepakmato.

¹⁸Bulu buluke agísu legape gooru-ruo mimangko mola, ‘Si nolum Ijipt lok bomlenkuna Shédíe,’ emla dekepe botterupe luyé-lusé agomem pola ido delokom

¹⁹no bulum mongku-mooruklo, nok bottena ayange bulum mepakmape no longeme bulum doomug adonglok, delokke yohlo buluke gípekuem angun bidope eme adonglok gíbo teteto.

²⁰No bulum poyil dope nok aina Aidem bito, delokke bulu dodope nok manna binamem laatum mato, delokke buluke tíílíng legape asiem no bito.

²¹Takying appiko no bulum mongku-mooruklo utíla, bulu atí pííramnam kamato; buluke ege kídíe ínmato, delokke buluke ale kídíe pommato.

²²Delokke no abíd-abíd amongem, delokke atí-atína opín kídíem buluke rumkílo melíkla rego takamlok bulume amongem paayin dope bito; dekepeila bulu Heshbon lok roja Sihonke among emlang Bashan lok roja Ogke amongem laato.

²³No taleng telok takar kísape buluke otíng-oyinem parmoto, delokke buluke abu kídíem aala, delo yébomdope nok binam amonglo no bulum bomatoku.

²⁴Delok legape otíng-oyin kídíe delo among delo aalangkula among dem yébomto. No delo among delo duuna Kanaan ami kídíem buluke rumkínglo meto, delokke bulum kape ipe mííyédí dekepe idope buluke roja kídíem, delokke among delo duuna opín takamem buluke alag aralo melíkbito.

²⁵Bulu edíngpe monam doolung bottena kídíem, delokke ardana amongem laato; delokke takam aina atíe bíísétna ekum kídíem, koonam asi deerung kídíem, onggur arígem, olib baganem, delokke ayé ééna esing kídíem alummape langkamto; dekepe bulu akii dodarpe dola-tííla jinam-ngelname ito, delokke bulu nokke bottena ainam aralo ashéto.

²⁶“Dekepe ilateng bulu lunam tatmanape ila, bulu nom akpésuto. Bulu nokke ayonem mepakla, delokke nokkelo míílat sudokupe emla bulum ansudope lutor bina nokke kaalu miri kídíem bulu petto; delokke bulu pesorupe nokke amínem poyé-poléto.

²⁷Delok legape bulume irééna, buluke miru kídílo, bulume no melíkto; delokke dekepe buluke duk-adír paadokulo bulu nom kabbi sutoku, delokke dem no teyong among lokke tatbito; delokke nok bottena ayang akor lok, buluke miru kídí alaglok bulume mopítkuna amiem no bito.

²⁸Idola buluke eetet rongkuem bulu nok keralo atímangem lekoda itoku, delokke delo bulume ruutum dope buluke miru kídí alaglo no mepak líkto; idola edílo bulu míílat sulangkula, nokkelo kabbi sutokudí delo no dem teyong among lokke tatbitoku, delokke deddína irum loope nok ayang yasam akorpe bulume no mopítto.

²⁹Delokke no bulume nok ayonlo aalat dokupe emla lutor bito. Deloteng bulu míngge-saggemape ito, delokke nok ngiitom kídíem tatmape idola delok ayanpe tanike turgenapena nok ayon kídí mirupe bulu paab ito. Buluk aapíe tolla, delokke bulu miképe yéto, delokke míngge mato.

³⁰Deddína dítagem no bulum doosamgeto, delokke nok Aide kaalu miri kídílok bulume lunam agomem lutortuai; dekom bulu atí tatgemape ito. Delok legape among takam delok ami takam alag aralo, no bulume melíkto.

³¹Dekepe iduakom nok bottena ayange bulume nyokmomato demangkom mepak mato, kapeila no yasamruna, delokke ayaruna Shédíko.

³²“Supak delok legape ayang daapongem bomgapna miga-miram runa, delokke pesoyirínam ngoluke Shédía, Assiria roja kídíke ruutum bomdo delokke ila silo loope ngolukelo, ngoluke roja kídílo, yégebona kídílo, mirí kídílo, delokke kaalu miri kídílo, ngoluke buku kídílo, delokke nok ami takamlo edítko duk-adíre aatodí dem nok amig kangkolo améngonape kaabimayika.

³³Idola ngoluk teyolo inam takam sim no ibaape itung, kapeila no mínggap rula itung, delokke ngolu atírumape itung;

³⁴ngoluke roja kídíe, roja oo kídíe, miri kídíe, delokke buku kídíe nok ayonem igemato; delokke nok ngiitom kídíem, delokke buluke keralo nok lutornam ayon kídíem bulu tatmato.

³⁵Nokke bottena ainamlok bulume binam bottena, delokke ardana amonglo bulu roja dola duudolangkom nom bulu agér gérbimato, delokke buluke atímana agér inam kídíem mepaksumato.

³⁶Kaatola, silo ngolu abílpe yédung, ngoluke buku kídíem sok among sok ayém lang aina aman kídíem dodo-tíídope emla nok binam amonglo, ngolu abílpe ila yédung.

³⁷Delokke among sok lenna gaina ali-ayée ngoluke paab legape ngoluk teyolo nok ruulíknam roja kídílo gídung; bulu ngoluk ami teyonglo, delokke ngoluke gooru-sobén lokom buluke míínampe idung, delokke dekepeila ngolu yagorupe adír paadung.”

³⁸Sok takam sok legape ngolu edíngpe daapongko mola attung, delokke ngoluke roja oo kídíe, ngoluke Lebi kídíe, delokke ngoluke miri kídíe buluke siilem so tuplíkto.