Read Alladian ESTHER 1 Bible Online

ESTHER 1 - Alladian bible

ESTHER 1

¹India lokke ilangala Ethiopia loope, 127 amongko roja Jarjeske ruutum bomdo longe delo si atí takamsi ito.

²Delo roja Jarjes bí ruutum leríng luune Susalo duuna bík roja palenglo duula ruutum bomto,

³delokke bík dítak angumnape ruutum bomduem migom-mite kídí delokke agér iyabina kídí legape bí doman bottenako doboto. Parsia, delokke Media among lokke sipaying ruutum kídíe, roja oo kídíe, delokke among takamlok gaina ami kídíe delo aatuai.

⁴Poolo akkéko apíngpe bí bík roja dobomnam among lokke deddína jénam-remnam emlang bík kangkím-míngkím sunam ralnamem lengkanto.

⁵Si longe kídísi gíyin rongem, Susa lokke ruutum leríng luunelo duuna ami takam legape roja ekum baarilo, longe kínídkope, rojade opan-mirem kaapan sumape domanko doboto.

⁶Baari delo yayingna, delokke yalunna siipyak gayinlok donkabem, lainen rímolok líípun gaanglo ilíknam baldín kongkel teyolo paklík tungai, delokke líípunlok, motilok, delo arekanarung elínglok punam delo uun loklang baldínlok monam dungkenge katuai.

⁷Apongem angu-anguna uun bati kídílo tíínamoto, delokke roja delok bidarnam akorpe aponge alum mangai.

⁸Roja delok polík kolok, dobo tomnam kídíem agí míídupe apongem tíímoto, kapeila rojade apong iyabina kídíem, mipilke míngkorpe ibidope políkto.

⁹Rani Bashti bíkom roja Jarjeske ekum delo mime kídí legape doman bottenako doboto.

¹⁰Longe kínídnana delo roja Jarjes bí aponglok tíngírsula, bím agér iyabina mumbal kíníd, Mehuman, Bijtha, Harbona, Bigtha, Abagtha, Jethar, delokke Karkas bulume,

¹¹Rani Bashtime, rani dumlubem gela, migom-mite, delokke dobo tomnam ami takam keralo bík kampoem lengkanpe mííla bík keralo aabodope políkto; kapeila bí kamporuna mimekuai.

¹²Idola edílo béérang kídíde roja delokke políknamem pokan bitodí, delo rani Bashti bí aamayé emla topaksuto. Delo rojade aapíe markínla gusato.

¹³Delo roja lokke iyape ai-asang kénna kídíem, kape ipe aiyédí dem kénna ami kídíem íngkísuto.

¹⁴Roja delok alumpe íngkísunam ami kídíe: Karshena, Shethar, Admatha, Tarshish, Meres, Marsena, delo Memukan; bulu among delokke kedon yalumpe yégebona ruutum kíníde.

¹⁵Bí dem ami kídídem poto, “Ngo, roja Jarjes rani Bashtime tomdope ngok béérang kídíem políktuai, idola bí dem tatbimato. Bím ngolu ayonlok kape ipe aiyén?”

¹⁶Delo Memukan bí roja kelang migom kídí keradelo poyansuto, “Rani Bashti bí roja petomke loomang, idola roja Jarjeske among takamlok migom kídí emlang ami takamem mínggemape itung.

¹⁷Kapeila ranike iyi-isang sim mime takame kényinyé, delokke bulu buluke milo kídíem mínggemape ila poyé, ‘Roja Jarjes bí rani Bashtime bík keralo aadope políktuai, idola bí aamato.’

¹⁸Siloke longe ruso Parsia, delokke Medialok, ranike iyi-isang sim tatna migom mime kídíe, buluke milo kídíem akampe ibomyé. Delo míngge-sagge manam elang noomín-marmíne bojéruyé.

¹⁹Delok legape rojabí sim míílík domílo, Bashti bí roja Jarjeske keralo edíloteng aayimadope, rojabí ukum líkla, ipak langkumanam ayonko, Parsia kelang Media lokke ayon kídílo atlík motoka. Delokke bík ayanpe bím pemílo aiyanako ranipe imotoka.

²⁰Edílo dekepe rojake ukumem bík among takamlo pokan yédí delo mime takame buluke milo kídíem miremlai opanlai mínggeyé.”

²¹Sim poyilnam agom sim roja delang bík migom kídíde aipe míílíkto, dekepeila rojade Memukanke ponampe ito.

²²Delo bí among takamlo, agí-agí akorlok, delokke ami takamlo buluke agí agomlok, legang sim atkanla, milo miyonge agíke erang teyolo ruutum bonape, delokke bíkke ponamlok ipe aido emla shiti mego líkto.