Read Alladian ESTHER 3 Bible Online

ESTHER 3 - Alladian bible

ESTHER 3

¹Sikepe irongem méélam delo roja Jarjesbí Haman emnam amiko botte yalumna montiripe imoto. Hamanbí Agagke otíng Hammedathake ue.

²Rojake lamgé arang delo agér iyabina takamde lebíng kooníla Hamanme kumdungíai, kapeila rojade sikepe idope ukum líkto. Idola Mordekai bí lebíng koonímato, delokke bím kumsumato.

³Delo rojake lamgé arang delo agér iyabina kídíde Mordekai me sikepe íngkíto, “Kapeila no rojake ukumem ipat sudune?”

⁴Delo edílo bulu bíme loodí-loodíke polateng, bí bulum tatbimatodín, delo bulu Mordekaike inam emla posunamem asoope donggedodí ma donggemadodí, deme kaape Hamanme pobito, kapeila bí, “Ngo Jihudiko,” emla bulume posuto.

⁵Edílo Hamanbí Mordekaime bík keralo lebíng-kooníla kumsumadope kaatodí, delo bí yagorupe marto.

⁶Idola bí Mordekai petomme alag leelíkpe míímato. Dekepeila, buluke Mordekaibí Jihudiko emla pobikolok bí Jarjeske among tabung delo duuna Mordekaike Jihudi ami kídí takamdem inyokdope emla Hamanbí bedang matato.

⁷Roja Jarjeske takying kolang taknyinape ruutum bomduem, dítak lokke kerayalum Nisan poolo delo, idí longem lang pooloem malendope emla bulu Hamanke keralo Pur, emnamde lotori soto. Delo íying kolang annyinapena Adar poolo delokke looying kolang longumnapena longedem tobosuto.

⁸Dekepeila Hamanbí Roja Jarjesme poto, “Apit-ayit ila, delo nok among takamlok ami kídí aralo duupan-duuran sulíkna amieke kadung; buluke ayone ami abíd takam lokkelo gyabbosumang, delokke bulu rojake ayonem mínggemang. Delok legape rojabí buluke inam sim donggap genam si aimang.

⁹Rojabí sim aipe míídomílo, bulume inyokdope ukumko ilenbitoka. No dekepe iyémílo, ngo nokke among-asike kebang agér inanape, ngo roja kumsunglo 340,000 kilogram ngatkope baldínem paatem líklayé emla berok bidung.”

¹⁰Dekepeila rojade bík siil tupnana koosiem bítlensula, Jihudi kídíke miru, Agagke otíng Hammedathake oo Hamanme bito.

¹¹Delo rojade Hamanme poto, “Murkong emlang ami kídísim nome bidung. Bulume no kape ipe em míídudí ilangka.”

¹²Dekepe ikolok kerayalum poolo delokke looying kolang longumnana longe delo Hamanbí rojalok atgebona kídíem tomdumsula, ruutum takamlo, gobonor kídílo, delokke migom-mite kídílo bipenam gogying ukumem among delokke agom takam loklang akor takamlok addope atpenamem políkto. Sime roja Jarjeske amínlok bík koosi siilem tublíkla bilento.

¹³Shiti delo, Adar pooloke looying kolang longumnana longe lotel delo, Jihudi takamem, koo emlang mijingem, mime kídíem delokke ome-oo kídíem petyinpe aiyé. Bulume atí ayang kamape petpakpe aiyé, delokke buluke bomnam ekuserang tabungem langkampe aiyé.

¹⁴Delokke, de longe de pííyém takame irung sula duudope, among rego takamlo, tabung amiem taddo-kéndope sim gogying langka emla atlíkto.

¹⁵Roja lulíglok, ukum agomem ruutum leríng luune Susa delo gogyito, delokke daak dukna kídíde legang dem among rego takamlo bomgooto. Delo roja elang Haman bínyi tííbosupe duuto; idola Susalok luune de lalgoosuto.