Read Alladian ESTHER 4 Bible Online

ESTHER 4 - Alladian bible

ESTHER 4

¹Sikepe inam takam sim Mordekaibí kényé delo, bí bík egem bétsuto, delokke ankí gasorem gela, delokke mepilok molsula, bottena luune yirang delo botterupe, delokke ankírupe kapla gíla,

²rojake lamgé deloope gíríto; kapeila ankí gasor gena amiem rojake lamgé arang delo aamomato.

³Rojake ukumem pokan gongko among takam delo duuna Jihudi ami kídíe bojérupe ankí-adírto. Bulu doma-tíímape nyola, séngépe kabbosuto, delokke bulu alumyange ankí gasorem gela, delokke metpilo ketto.

⁴Edílo Estherke mime béérang kídíe lang mumbal kídíde Mordekaike inam legangem bím pokan bitodí, delo bí yagorupe adír runge ito. Ankí gasor genam delok ayanpe gedope emla ege ayoko bíkkelo melíkto, idola bí dekedem laarík sumato.

⁵Delo Esther bí bík legape rojake melík binam mumbal akon Hathakhme tomla, íngko legang kodí adír bomdune dem kéndope emla bíme Mordekai kíng íngkídope emla bí lulígto.

⁶Delok legape roja lamgé keralo duuna bottena luune moolat delo Mordekai kelo Hathakhbí gíto.

⁷Mordekai bí bíkkelo íngkoko itodí dem poyin subito, delokke Jihudi ami takamem petdope emla Hamanke pésula rojake kumsunglo dekena nokdi abalko bilíkyé emnam demkom pobito.

⁸Delokke bulum petyin dope emla Susalok atkan lennam ukum binam kakot kokom Estherme lengkanla, delokke pojon bidope emla bí bito, delokke Estherbí rojake keralo gíla ayang rogula bík ami kídí legape luya bidope, bím pobi langka emla bím pogapto.

⁹Delo Hathakh bí gílattoku, delokke Estherme Mordekaike agomem pokan bitoku.

¹⁰Delo Mordekaime sikepe polat bidokupe emla Estherbí mumbaldem políkto,

¹¹“Rojake béérang takam elang rojake amongsok ami takame sim kényindung. Ingkona milolai demangkom mimelai rojake gogamape roja dungko aralo roja kelo gíamílo ayon atelko kadung; de idung: roja lok uun banggénem íklen binam petom dem meturyé, delokke abíd takamde akampe siyé. Delokke looying angumko ngome rojalo gogamaname ikabong.”

¹²Edílo Estherke agom sim Mordekaime pokantodí,

¹³delo bí sikepe polat líktoku, “Rojake ekumlo no duunam legape Jihudi ami takam lokke no petom turyé emla míímapeka.

¹⁴Kapeila no supakke moodíso asoope duuyémílo, Jihudi kídí legape igulname lang mopítname amongkon lok aayé, idola no lang nok abuke erang kídíe nyokyé. Delokke séko kéndun, sikena nanyiina moodísok legape nome ranipe imolang kom itupe!”

¹⁵Delo Estherbí Mordekaime sikepe poyan sulíktoku:

¹⁶“Gíla Susalo duuna Jihudi takamem tomdum sulangka, delokke ngok legape nyola kumlangka. Longe-yohpe longumko doma-tíímape nyolangka. Ngo lang ngok mime béérang kídí eteng noluke akampe iyé. Sikepe irongem, ayonem ipat sudokom, ngo roja kelo gíyé. Sikepe inam legape siba yémílokom ngo siyé.”

¹⁷Delokke Mordekaibí gíla, Estherke ponam takamdem bí ito.