Read Alladian ESTHER 5 Bible Online

ESTHER 5 - Alladian bible

ESTHER 5

¹Longumnana longe delo Estherbí bíkke rani egem gela, roja paleng dungko pírtek danpe mikmoe ila, roja ekum delokke arang gíídang delo dagato. Rojade aradelo, mikmoe aatak danpe ila, roja palenglo duudo.

²Bí rani Estherme gíídang delo dagdupe kaayédem, bí bíkke mííbangem paala, bík alaglo bomnam uun banggén dem bíkkelo íklenbito. Delo Estherbí aanínla roja banggén attíng dem ukto.

³Delo rojade bím íngkíto, “Íngkokoda no míídun, rani Esther? Nok rogupenamde íngkoko? Ngom potola, ngok roja dobomnam among ole konem emdokom, nom biyé.”

⁴Delo Estherbí poyansuto, “Roja no aipe míídomílo, nok legape ngok iruubinam domanlo Haman nonyi lekope siyum aabiyika.”

⁵Delo Estherke ponam kísape bí idope emla Hamanme menape aamotoka emla rojade políkto. Depeila roja delang Haman bínyi Estherke irung binam domanlo gíto.

⁶Buluke apong tíídungem, rojade Estherme lekoda íngkítoku, “Nok kumname íngkokoda? Dem nom biyé. Delokke nok rogunamde íngkokoda? Ngok roja dobomnam among ole konem kodakkom nom biyé.”

⁷Delo Estherbí poyansuto, “Ngok kumname lang roguname si:

⁸Rojabí ngom ayang sudumílo, ngok rogunamem ibidope, delokke ngok kumnamem rojabí aipe tatbidumílo, nok legape lang Haman kepe lekoda doman iruubinamlo Haman nonyi yampo aabi langkuka. Delo ngo roja nome ngokke míínamem pobiyé.”

⁹Delo longe delo Hamanbí ashénge ila, delokke amung-aangrupe gílentoku. Idola edílo Mordekaime rojake lamgé delo bí kaatodí, delokke bí bík keralo gerep manam, delokke pesorían koteng kaamangpe inam dem kaala Haman bí Mordekaime yagorupe marbomto.

¹⁰Idokom Hamanbí míímapsula ekumlo gítoku. Delo bí angong kídíem tomdumsula, delokke bík méng Jereshmete lekope duubosudope tomto.

¹¹Hamanbí bík deddína arem tadok, bík oo kídí, delokke rojake bím mínggenam legang takamem delokke migom-mite abíd kídí teyolo bím singon monam legangem buluke keralo koyit subito.

¹²Delo Hamanbí potemto, “Rani Estherke doman tomkolo abídem tommape roja emlang ngom petom tomto. Delokke bí yampo rojakelo lekope ngom lekoda dobolo tomdungku.

¹³Idola rojake lamgélo duuna Jihudi ami Mordekaime ngo kaadu tetengem, sike takamso ngo aange apíímang.”

¹⁴Delo bík méng Jeresh lang bík angong takamde bím poto, “Bodonge íying annyi kolang annyi mitar píína sulpom bobeko pítoka, delokke delo Mordekaime oksuldope nyampo rohlo rojame potola. Delo yume apim dokolo roja kíng gímín gela ashéng-angam itoka.” Sim agom sim Hamanbí aipe míílíkto, delokke bí sulpom bobedem ruurepto.