Read Alladian ESTHER 6 Bible Online

ESTHER 6 - Alladian bible

ESTHER 6

¹Delo yoh delo rojade immi mato; dekepeila bí bík ruutum yégenam legangem, atkumkeng kitab dem bík keralo bomala poridope políkto.

²Delo lamgéem dagbomtuana rojake mumbal annyi Bigthanah kelang Tereshke, roja Jarjesme petdope emla ruubosunamem Mordekai bí pokan bito emla legang atkumkeng kitab delo atlíknamem ripaato.

³“Sok legape Mordekaime ngolu ingko yidgenamkoi, delokke ingko amankoi bitone?” emla rojade íngkíto. “Bík legape atí ibimang,” emla bík béérang kídíde poyansubito.

⁴Delo rojade íngkíto, “Ngokke migom kídíe ekum so duuna kadunaya?” Depe iduem Hamanbí Mordekaime oksul dope emla bík sulpom bobe leemonam legangem roja delo lupo sudope emla roja ekum luyu gíídanglo aatuai.

⁵Rojake béérang kídíde bím poyan subito, “Hamanbí gíídanglo nom kaaríksupe dagdung.” “Bím araso aamoto,” emla rojade políkto.

⁶Hamanke aralo aarongem, rojade bím íngkíto, “Rojake yidgepe míínam ami delok legape kape ipe aiyén?” Delo Hamanbí aapílo míísuto, “Ngok kékonlo sékomemda rojabí yidgeyéne?”

⁷Delo bí rojadem poyan subito, “Rojake yidgepe míínam ami delok legape,

⁸rojake genam gaina lukdorem bomala, delokke rojalok dungkítonam, delokke dumpolo roja dumlup gena guréko boma bitoka.

⁹Delo lukdor demlang guré dem rojake aiyalumna ami kídí akonlo bilíkla, rojake yidgepenam amidem lukdor dem leemo molík mopala, delokke guré delo bím gésamola luune bottena bedang yirang delok yon-go bomotoka, delokke bík kerang-keralo aiyalumna amidem sim agom sim gogge motoka, ‘Rojake yidgelínam amiem sikepe moko idune!’ ”

¹⁰Delo rojade Hamanme lulígto, “Menape gíla, lukdor emlang guréem laatoka, delokke nok ponam kísape rojake lamgélo duuna Jihudi ami Mordekaike legape itoka. No ingkuem potodí dekepakpe takamem ilangka.”

¹¹Dekepeila Hamanbí lukdor emlang guréem laala, bí Mordekaime lukdorem bítlíkto, delokke guré teyolo bím dunggemola luune bottena bedang yirang delok yon-goodola, “Rojake yidgelínam amiem sikepe moko idune!” emla pogeboto.

¹²Méélam delo Mordekaibí rojake lamgé delo aalat sutoku. Idola Hamanbí aange ankírunge ila, dumpongem polumsula ekumlo lomang toku.

¹³Delo bík méng Jeresh melang bík angong takamem bíkkelo itonam atí legang takamem bí pobisuto. Delo bíkke kénna ami kídí delang bík méng Jeresh bulu bím sikepe pobito, “Jihudi ami Mordekai kelok nokke gérmange ilenrodem, no bím ikum lamayé; no berokpe nyokyé.”

¹⁴Buluke luposudung adaem, roja lokke mumbal kídíde aala, Estherke irungnam domanlo Hamanme menape gíbotoku.