Read Alladian ESTHER 7 Bible Online

ESTHER 7 - Alladian bible

ESTHER 7

¹Delo roja delang Haman bínyi Esther kíng dobolo gíto.

²Delokke lonyinana longe delo apong tíídungem, rojade Estherme lekoda íngkítoku, “Rani Esther nok kumname ingkoko? Dem nom biyé. Delokke nokke roguname ingkoko? Ngokke among ole konemkom nom bilayé?”

³Delo rani Estherbí poyan subito, “Rojae ngom ayadumílo, delokke no aipe míídumílo, ngokke kumnam legape ngok yénamem, delokke rogunam legape ngok ami kídíem turmolangka.

⁴Kapeila ngom lang ngok ami kídíem inyokdope, peddope, delokke petyindope emla kotubong. Ngolum milo delokke mime abílpe koduamílo, ngo asoope doyai, kapeila sikena adírde roja kelok nyoknamlo pobí sukanmang.”

⁵Delo roja Jarjesbí rani Estherme íngkíto, “De amide sékoda? Sikena atíem idope míngkína amide íngkolo?”

⁶Estherbí poto, “Ngoluke miru-sogong atímana si Haman bímino.” Delo roja kelang ranike kerang delo Hamanbí pesorunge ito.

⁷Delo rojade yagorupe marla doko delok gerepla, roja ekum baarilo gílento; idola Hamanbí, bíkke teyolo ingééname aayérung emla kénla, rani Esther kíng bík turpenamem rogupe emla duutílto.

⁸Roja ekum baari deloge doman doko ekum delo roja delok aalat dokupakduem, Hamanbí Estherke tapdasula ketkolo bík turnamem rogupe olíkto, delo rojade uugla luto, “Ngok ekum araso, ngokke kerapak loteng raniem bí iyé-siléng iyénía?” Rojalok agom dem tayyéname mumbal kídíde Hamanme migmoem polumto.

⁹Delo rojame ibi-sabina mumbal kídí arang delok akon Harbonabí poto, “Hamanbí bíkke ekumlo 22 mitarna sulpom bobekoteng rojaem moturtuana Mordekaime oksulpe pítung.”

¹⁰Delo rojade luto, “Delo bím oksultoka!” Dekepeila bulu Mordekaike legape Hamanke irungnam sulpom bobe delo Hamanme oksulto. Delo rojake marname ansingtoku.