Read Alladian ESTHER 8 Bible Online

ESTHER 8 - Alladian bible

ESTHER 8

¹Delo longeru delo Jihudi kídíke miru Hamanke duubomnam ekurang takamem roja Jarjesbí rani Estherme bito. Delokke Mordekaibí rojake kerang delo aato, kapeila Estherbí bíkkelo kape ison sududí dem pobito.

²Rojade Haman kelok laalat kunam, bík siil tupnana koosiem bítlen sula, dem Mordekaime bito. Delokke Estherbí Mordekaime Hamanke duubomtuanam ekurang takamem kaabomdope lulígto.

³Estherbí lekoda roja alelo olíkdola, Agagke otíng Hamanke Jihudi kídíke mirupe atímana rubomnam agérdem itumdope emla rojadem kapdola rogutoku.

⁴Delo rojade Estherme bík roja uun banggénem íklenbito, delokke delo bí gerepla bík keralo dagto.

⁵Delokke bí poto, “Rojabí sim aipe míídomílo, delokke bí ngom ayasudumílo, rojake among takam so duuna Jihudi ami kídíem petyindope emla Agagke otíng Hammedathake oo Hamanke agíe míílensula ukum kakot atlenla megong líktonam dem laapakdokupe ukumko atbilangka.

⁶Kapeila ngok ami kídílok gíímang-gérmangem kaala ngo kapekísa dongge layén? Ngok eranglok nyoknamem kaala ngo kapekísa hakjém layén?”

⁷Delo roja Jarjesbí rani Esther melang Jihudi ami Mordekaime poyansuto, “Kaalangka, ngo Hamanke duubomtuanam ekurangem Estherme bito, delokke bulu bím sulpom bobelo oksulto, kapeila bí Jihudi kídíem atímape ibomto.

⁸Nolu supak noluke míngkorpe rojake amínlok Jihudi ami kídí legape ukum kakotko attoka, delokke dem rojake koosi siilem tuplíktoka, kapeila rojake amínlok atnam, delokke delo rojake koosilok siil tupnam kakotdem sékokom gítpak lamayé.”

⁹Delo poolo angumnapena Siban poolo lokke looying annyikola longumnana longelo rojake atgebona kídíem tomto. Bulu Mordekaike lulígnam agomem Jihudi kídílo, delokke India lokke ilangala Ethiopiake idumsue 127 amonglo duuna, ruutum kídí, yégebona kídí, delokke migom-mite kídílo shitiem atkanbito. Sim lulígnam agom kídí sim among takam akorlok, delokke ami takam agomlok delokke Jihudi kídí lokom buluke akor loklang agomlok atto.

¹⁰Delo Mordekai bí roja Jarjeske amínlok atla, rojake koosi siil lok tuplíkla, delokke shiti kídídem, aina guré alilok onam rojake bomnam dugdugna gurélok dugla bidope daak kídílok melíkto.

¹¹Rojake ukumde, luune bottena miyonglo duuna Jihudi ami kídíe aadum sulala, delokke bulum ingkona amonglok demangkom opínlok maglíng kídíe bulume, delo buluke mime ome-oo kídíem atímape iyape ina kídíem, bulu iyasuladope, nyokmo ladope, petla dope, delokke buluke ekuserangem langkam ladope tolíkto.

¹²Roja Jarjeske among takamlo Jihudi kídí legape sim ukum sim ilendope ruubinam longede íying kolang annyinana Adar poolo lokke looying kolang longumnanalo ituai.

¹³Delokke Jihudi kídíe buluke miru kídíem delo longe delo iyan sudope iruupe, delokke legape among takamlo ayonpe medope, delokke ami takamlo pokandope emla orgopenam ukum kakot kídídem iruulento.

¹⁴Rojake guréem dukbomna daak kídíde rojake lulík kolok menape gílento. Delokke Susa lokke ruutum leríng luune deloteng ukum dem takame taddo-kéndope ilento.

¹⁵Delo Mordekaibí yayingna, delokke yalunna roja egem gela, uunlok monam bottena dumlub kolang paajoknam kampona yamukna galugem gela rojake ekum delok gílento. Delo Susalok bottena luune delo ashérupe loodum bomto.

¹⁶Kapeila delo duuna Jihudi kepe de erapnam, mííponam, ashénam, delokke ikumnam moodípe ituai.

¹⁷Ingko amonglo, delokke ingko doolunglo rojake ukume píítodí, delo Jihudi kídí aralo ashérunge ila, doman-tíímanla, nyoman longekope loodumtuai. Delokke delok among delok amie bojéko Jihudi amipe tolíksuto, kapeila bulu Jihudi kídíem pesoto.