Read Alladian ESTHER 9 Bible Online

ESTHER 9 - Alladian bible

ESTHER 9

¹Adar poolo lokke looying kolang longumnana, edílodín rojalok ukum binamem ilíkla, Jihudi kídíke miru kídíe bulum ruutum bomyé emla míínam sutodín, dem igedí longede pííto. Idola delok ayanpe, Jihudi kídíde buluke teyolo ikumlatto.

²Jihudi kídíe bulum inyokpe em ina kídíem iyansudope emla roja Jarjeske among takamlo, delokke doolung takamlo aadumsuto. Séko amiekom bulum dakrík sulamato, kapeila among takamlok amie bulum pesotuai.

³Delokke among takam delok migom kídíe, ruutum kídíe, yégebona kídíe, delokke roja agér iyana kídí takame, Jihudi kídídem igulto; kapeila bulu Mordekaime pesoto.

⁴Mordekaibí roja ekum delo ruutum botterunape ito, delo bík amíne among takam delo byargooto; delokke bí ralya yayang ikai.

⁵Dekepeila Jihudi kídíde buluke miru kídídem míínampe ilato. Bulu bulume atí ayang kamape yoksalok papak pakyinto.

⁶Susa lokke ruutum leríng luune petom delo Jihudi kídíe midum língko pilngoko petto,

⁷delokke Parshandathah, Dalphon, Aspatha,

⁸delo Porahta, Adalia, Aridatha,

⁹delo Parmastha, Arisai, Aridai, delokke Baijatha,

¹⁰emnam Jihudi lokke miru Hammedathake oo Hamanke oo íying kídí bulum takamkom bulu petto. Idola ekurangem langkam mato.

¹¹Delo longeru delo Susalok ruutum leríng luunelo ami petnam isabem roja kelo pokan bitoku.

¹²Delo rojade rani Estherme poto, “Susa lokke ruutum leríng luunelo petom soteng Jihudi kídíe midum língko pilngo kolang Hamanke oo íyingem petto. Dekemílo rojake among abíd kídílo bulu kape itodí? Supak nok kumname ingkoko? Dem nom biyé. Nok roguname íngkoko? Dem nom biyé.”

¹³Delo Estherbí poyansuto, “Rojabí aipe míídumílo, siloke kísape nyampokom idope, Susalo duuna Jihudi kídíem melíktoka, delokke Hamanke oo íying simangem sulpom bobelo dolpít motoka.”

¹⁴Delok legape rojade dekepe idope lulíkla, Susalo ukum dem pokan bito delokke bulu Hamanke oo íying dem takame kaadope dolpítto.

¹⁵Adar pooloke looying kolang loopinana longe delo Susalo duuna Jihudi kídíe aadum suto, delokke luune delo bulu midum língko angumko pettoku; idola bulu ekurang teyolo ukkímato.

¹⁶Depe iduem, rojake among takam delo duuna Jihudi ami abíd kídí dekom agíem iyasudope, delokke buluke miru kídílok bulu apéénamem paadope emla bodumsuto. Bulu buluke miru kídíem 75,000 ko petto, idola buluke alage ekurangem ukkí bimato.

¹⁷Si Adar poolo lokke looying kolang longum nanalo ito, delokke looying kolang loopinanalo bulu apééla, longe deme doman-tíímanla ashéto.

¹⁸Dekepe idokom Susalok Jihudi kídíe looying kolang longonana longedem nyomandí kope ito, kapeila looying kolang longumnana delolang looying kolang loopinana delo bulu amiem mokala, looying kolang longonana delo iyimato.

¹⁹Delok legape doolunglo duuna Jihudi kídíe Adar poolo lokke looying kolang loopinana longedem eraprupe nyomandí kope, ashéng dobo dodí kopelang, akone-akonem dopenam aman bipésula idí longepe ibomdung.

²⁰Mordekaibí sim inam takam sim atkumto, delokke rojake mooteng-mongé among takamlo duuna Jihudi tabunglo bí shitiem melíkgoola,

²¹Adar poolo lokke looying kolang loopinanalo, delokke longonana longe dem buluke aralo dítak miyonglo nyoman longekope loodum dope poto.

²²Kapeila Jihudi kídíe buluke miru kídí loge apéénamem paadíku, delokke buluke ankíe ashéngpe ilatdíku poolope si ito. So longe kídíso doman-tíímanla, delokke ashéngdí longepe ila, akone akonem aman bibosula, delokke opan kídílo aman bila loodum bomdope bí atto.

²³Delok legape Jihudi kídíde Mordekaike poyilnam akorpe igeto, delokke de ashéng loodum bomnamde dítak miyonglo ibomnam idong kope ikai.

²⁴Kapeila Jihudi takam lokke miru Agagke otíng Hammedathake oo Hamanbí bulum inyokdope emla mirupe ruusupla, delokke bulume inyokdíem kaanape bí Pur, emnamde lotori sotoai;

²⁵idola edílo Estherbí roja delo aatodín, Jihudi kídíke mirupe Hamanke míílen sunam atímana budiide bík agí dumpolo aalat dokupe, delokke bím lang bík oo kídíem sulpom bobelo oksuldope rojade ukumem bilento.

²⁶Delok legape nyomandí longe annyidem Pur gompil delok mankedola Purim emto. Mordekaike shiti delok legapelang, bulukelo inam takam atí kídí sok legape,

²⁷Jihudi kídíe bulu kepelang buluke otíng-oyin kepe, delokke Jihudipe ipeem míína kídí buluke supe, Mordekaike poyilnam akorpe dítak miyonglo moodípaklo, sim lonyisim loodum bomyé emla ayonkope ibosuto.

²⁸Sim longe annyi sim siirum miyonglok erang miyonglo, among miyonglo, delokke doolung miyonglo míípasudope, delokke ige bomdope, delokke Purim longe lonyi sim Jihudi kídíe edílokom loodum bommape ipe aimang, demangkom buluke otíng-oyin aralo sim edílokom míínyok supe aimang emla tolíkbosuko berokto.

²⁹Delo Abihailke ome rani Estherbí Jihudi ami Mordekaike attonam Purim delok legang shiti dem lekoda bí edííyape atgaplíktoku.

³⁰Shiti dem Jihudi ami takamem atketlíkla, delokke legang kakodem roja Jarjeske 127 among rego takam delo, eetet delo aro agomlok,

³¹Purim longe kídísim, moodípaklo Jihudi ami Mordekai kelang rani Estherke Jihudi kídílo poyil líknampe, domatíímape nyola, delokke ankíem kíla ibosunam kísape, buluke supelang buluke otíng-oyin kepe loodum bomdope atla megoolíkto.

³²Estherke Purim lok legí-sigang takamem berokdola lulígnam deme tídbuumnam kitabkolo atlíkto.