Read Alladian GÍLEN KUNAM 1 Bible Online

GÍLEN KUNAM 1 - Alladian bible

GÍLEN KUNAM 1

¹Sike si Israelke oo kídí lokke, agí-agí edung-erangem, Jakob kíng lekope Ijipt amonglo aabosuna kídíke amíne.

²Reuben, Simeon, Lebi, Judah,

³Issakhar, Jebulun, Benjamin,

⁴Dan, Naphtali, Gad delokke Asher.

⁵Jakob kelok lenna ami kídíe, midum íying kíníd ko kato, delokke Joseph kerapekai Ijipt amonglo yéto.

⁶Moodílo Joseph lang, bíkke bíro kídí elang, deke delokke siirum yédonge sinyokto,

⁷idola Israel kídíe parla, deddína otíng-oyine kala, yagorupe milu-mibampe ila Ijipt amongem yébomto.

⁸Delokrongem, Ijipt amonglo Joseph me atí kénmana, roja aníko, ruutumlento.

⁹Bí ami kídíem sipe poto, “kaatola, Israel ami kídísi amie bojé aloodung, delokke ngoluke legape pesonampe ikai.

¹⁰Midu-mimak atíko kamílo, bulu ngoluke mirulo leko bosula, ngolum mimak ila, among sok dugnyok langkukom iyépe. Depeila ngolu bulum ami parmomadope ségulok ipe aiyé.”

¹¹Depeila bulu kelo aid-alo kaimadope Ijipt ami kídíe, agér kaabomna ruutum kídíem ullenla, buluke teyolo tebegruna agér kídíem gérmoto. Bulu Pithom delokke Ramases doolung luune me donam-tíínam mekengpe Pharaoh me mobito.

¹²Idola edítko bulum iré todí, deddíko bulu parto, delokke bojéyape amie amonglo bííbomto. Depe ila Ijipt ami kídíe Israel ami kídíem pesoto.

¹³Depe ikolok, Ijipt ami kídíe, bulum pakyape aré-anyo dope tolna agérem imola,

¹⁴ekum monam, itang elíng agérlo, arík agérlo ikang aloosumoto.

¹⁵Ijipt lokke Pharaoh bí, Siphrah melang Puah emnam, Hibru lokke okiibona pakne annyidem sipe poto,

¹⁶“Edílo nonyi Hibru mime koo okolo, okii bonape iyédí, delo oo kope oyém moka langka, delokke ome kope iyém turmo langka.”

¹⁷Idola pakne annyide Shédíme pesola, Pharaohke pokampe imape oo kídíem turmoto.

¹⁸Delo Ijipt lokke Pharaoh bí, pakne annyi dem tomla íngkíto, “Nonyi kape sikepe ikan? Kape nonyi oo kídíem turmokan?”

¹⁹Bínyi Pharaohme sikepe poyan suto, “Ijipt mime kísa Hibru mime imang; bulu opoope oneke, bulu okii bopena lok píímang adapekai kooem odung.”

²⁰Depeila Shédí bí pakne annyi teyolo ayato. Ami kídíe parla yago yangko milung yangkai.

²¹Pakne annyide Shédíme pesonam legape, bí bínyik teyolo agí edung-erang kadope ruulíkto.

²²Delo Pharaoh bí ami kídíem ukumla, sikepe lulíkto “Oo onam tabudem koronglo yoplíkpe aido idola omepe onamem turmo langka.”