Read Alladian GÍLEN KUNAM 11 Bible Online

GÍLEN KUNAM 11 - Alladian bible

GÍLEN KUNAM 11

¹Delokrodem RUUTUMbí Mosime poto, “Ijipt lolang Pharaoh kíng, itung-irénamem atelko ngo boma poyéku. Delok rodem, bí nolume gímo yéku, delokke edílo bí dekepe iyédí, bí nome apíípe soge monlen yéku.

²Ami kídíem, mimedak milodak, agí-agíke kumrí-donggolok, uun delokke baldín ekuranglok, kogo sudope emlangka.”

³Delo longe delo, Israel kídíem Ijipt kídíe airupe míídope, RUUTUMbí imoto. Mosi agísuemte Pharaohke migom kídíe lang Ijipt ami kídíe airupe mííto.

⁴Depeila Mosi Pharaohme poto, “RUUTUMbí sikepe podung: Yoh raajangem ngo Ijipt among lokke rego miyolo gígoyé.

⁵Ijipt kídí lokke oge yalumnam oo kídí tabude siyinyé. Roja paleng lo duuna Pharaohke oge yalumnam oo lok ila, dolot ína abíl mime lok oge yalumnam oo loope, delokke simon-sili lokke oge yalumnam kídíete siyé.

⁶Delo kerapete kakímanam, delokke méélam lote kaku pemanam yagorupe ulo gogla kapname, Ijipt among lokke kéényung regolo kayé.

⁷Idola Israel kídí aralo, tani lolang taro teyolo, ekii kyakdut kote tatpa mayé. Delo no, Israel kelang Ijipt ami pénsamlo, RUUTUMke ríson inamem kangkényé.

⁸Delo nok kaanam migom tabusi, ngokkíng aala, ngok keralo gubala, ngok ami kídíem laala gídokupe roguyé. Depe irongem, ngo gíyéku.” Depe popala, yagorupe marla, Pharaohke keralok Mosi gítoku.

⁹RUUTUMbí Mosime poto, “Ijipt amonglo, ngok irisinyoem bojé yape imodope Pharaoh bí nokke agomem tatbimayé.”

¹⁰Pharaohke keralo Mosi lang Aaron bínyi, sim irisinyo tabung sim ikan bito. Idola RUUTUMbí Pharaohke aapí-aang dem tolmola bík among lok Israel kídíem gímo kumato.