Read Alladian GÍLEN KUNAM 12 Bible Online

GÍLEN KUNAM 12 - Alladian bible

GÍLEN KUNAM 12

¹RUUTUMbí Mosi melang Aaronme Ijipt amonglo poto,

²“Si poolo si, noluke dítak lokke kerayalumna poolope iyé.

³Israel doolung tabungem, sim dooying sim pokan langka; sok poolo sokke longe íyinglo mipil miyonge, mér oo mangkom sobén bénboko bík ekum- erang legape tola melangka.

⁴Taro dem dodope bík erangde anyoruyé mílo, bí lang bík kumríde, erang delokke mipil doduem isapbom dola, tarodem tarong tekpan sulado.

⁵Nolu mér oo mangkom béno ko laalado idola de tarí-tape kamana, dítak dugríkna milokongko ipe aido.

⁶Delo poolo delokke looying kola loopi yumelo, Israel doolung tabunge taro kídíem moka toka.

⁷Ami kídíe, delokke iyyi ayokonem laala, tarodem doko ekum delokke eyab gaang lokke abe lolang teyolo mollíkpe aido.

⁸Delo yoh delo, adín demla kosana neyalok lekope emelo bayél sula, banyula, delokke siiyé líkmanam ettíngem dobosupe aido.

⁹Adín dem éépe domapeka demangkom asilo keemapeka, idola tukku, ale-alag, delokke arangke amíl tabungem, emelo baanyupe aido.

¹⁰Roe píímang adape, adín anyong kote mepe aimang, ngatnako kayémíloteng dem emelo rompakpe aido.

¹¹Sikepe, nolu lukdorem uuglo ilíksula, noluk leyugem alelo delokke noluke banggénem alaglo bomla, lomla dope aido. Kapeila de RUUTUMke gíbongdí moodíe.

¹²“Delo yoh delo, ngo Ijipt lokke kéényung regolo gígola tanike lang taroke olen genam milokong oo kídíem mokagooyé, delokke Ijipt lokke uyu kídíem itung-iréla iyé, kapeila ngo mino RUUTUMbí.

¹³Eyab gaanglo iyyi kaanamde, noluke dungko ekume emla kangkén monana iyodpe iyé. Edílo ngo Ijipt amiem itung-iré yédí, delo ngo iyyiem kaamílo nolum gíboola, nolum ngo atí itung-irémayé.

¹⁴Sim longe sim, nolu angkupena siirum takam loope, RUUTUM ngo ingkuem itodí dem míípa suyar gela yéyar gedope, adeng-apepe iyar gelangka.”

¹⁵RUUTUMbí poto, “Longe kíníd kokai, nolu siiyé líkmanam ettíngem dobosupe aido. Kerang longe delo, noluke ekumlok takam siiyém laapak langka, kapeila sékodí kerang longe kíníd loope, siiyé líknam ettíngem doyéne, bím Israel goora lokke ami konpe hanyimayé.

¹⁶Kerang longe delo lang longe kíníd nana delo, nolu duudumsula kumsu bosulangka. Dekena longelo agér atí imapeka, idola dope-tíípenamem ita-hata lado.

¹⁷Nolu siiyé líkmanam ettíng doman sim ilangka. Kapeila so longe so, noluke opín kídí tabungem, Ijipt amonglok ngo laalen toku. Angkupena siirum tabulote, sim turyarna doman kope nolu igap bomlangka.

¹⁸Kerang poolo sokke, longe íying kola appi lokke yume loope, nolu siiyé líkmanam ettíngem dobosuyé.

¹⁹Longe kíníd loope, noluk ekum kídílo siiyé kape aimang. Delokke agí ami sudokom, demangkom miying dokom, sékodí siiyé líknam ettíngem doyéne, bím Israel goora lokke ami konpe hanyimayé.

²⁰Siiyé líknam ettíng atí domapeka. Nolu ingkolo yégo yédí, siiyé líkmanam ettíngem dope aido.”

²¹Delo Israel lokke miro kídí tabungem, Mosi bí tomdum sula poto, “Nolu menape gílangkula, noluke erang legape taroem ullenla gíboonam legape, méro mamílo béno ko petla ibosulangka.

²²Hissop riyong lok gagbomko laala, ekunglo duuna iyyi delo ilum líkla ipala, eyab gaang abe kídí lolang teyonglo, iyyidem mollík langka. Roh mangadape sékote agí ekumlok gílen mapeka.

²³Edílo Ijiptlo ami kídíem RUUTUMbí mokape emla rego takamlo magooyédí, bí eyab gaang lokke abe kídí lolang, teyolo iyyiem kaala, bí eyabem gíboola, moka nadem nolum moka madope noluk ekumlo aamo mayé.

²⁴Nolu lang noluk ome-oo kídíe, sim nyonam sim agínpe nyoyar gepe aido.

²⁵RUUTUM, nolum biyé emla toge sunam amonglo, edílo nolu pííyédí, sim nyonam sim nolu igepe aiyé.

²⁶Edílo noluke ome-oo kídíe, ‘Sikepe nyonam si ingkue?’ emla nolum iyédí,

²⁷delo nolu bulum sipe pobilangka; ‘Ijipt ami kídíem RUUTUMke moka dagem, bí Israel ekum kídíem gíboola ngolum turmoto. Iname RUUTUMke gíboonam legape ipak ila, bím rííyar gela nyoname si.’ ”

²⁸Israel kídíde gubala delo kumsuto. Delokke RUUTUMke Mosi melang Aaronme políknampe agér takamem ito.

²⁹Yoh raajang delo, Ijipt kídí lokke oge yalumnam oo kídíem RUUTUMbí moka kayinto. Roja palenglo duuna Pharaohke oge yalumnam oo lok ilenla, namsingko patek aralo duuna kídíke oo kídíem, delokke simon-sili lokke oge yalumnam koo loope moka kayinto.

³⁰Delo yoh delo Pharaoh lang bík migom kídíe, delokke Ijipt ami tabunge gerep langkula, yagorupe kapyinto, kapeila sina oo kamana ekum atel kote kamato.

³¹Delo yoh delo, Mosi melang Aaronme Pharaoh tomla lupakto, “En-gé kaku, nonyi lang Israel kídíe. Nonyike rogunampe RUUTUMme kumsukolo gílangka.

³²Noluke gooru-sobén, taro takamem noluk pokampe bomla menape gígéngkai.Delokke ngok teyoloteng, uteporoem políklangka.”

³³Ijipt ami kídíde Israel ami kídíem, among delok menape gígéng dokupe lomlíkla poto. “Nolu menape gígéng kumamílo ngolu takam siyinyé.”

³⁴Depeila Israel kídíde, buluke roti níípom kídílo, siiyé líkmanam ettíngem alempe ilíkla, egelok yétkapla, buluk gordulo joolík sula enbomtoku.

³⁵Mosike pokampe Israel kídíde ikai. Bulu Ijipt ami kumrílo gíla uun, baldín, lunggu-tadok, delokke galuk bisudope koto.

³⁶RUUTUMbí, Israel kídí teyolo, Ijipt ami kídíe airupe míídope imoto, depeila bulu íngko-íngko kodí kotodí, deke tabungem Ijipt ami kídíe biyinto. Dekepe Israel kídíde Ijipt lokke miremem líílangala enlen getoku.

³⁷Israel kídíde Rameses lokke Sukkotpe ento. Mibam ami delo mime, ome-oo kékonlo, alelok enkuna milokong petome língko akké éjar kokai kato.

³⁸Angukon amiete bojé kokai bulukíng enmín getoku. Sok teyo sote deddína gooruem, sobénem, mér kídíemteng bulu goobomtoku.

³⁹Bulu siiyé hoyél sumanamem ettíngpe mola dogetoku. Buluke siiyé hoyél sumape ettíng dogaade, bulum donam irung modí kamo mape, Ijipt kídíde lomla monlen toku.

⁴⁰“Israel kídíde Ijipt amonglo 430 dítakko yéto.

⁴¹Dítak 430 yéyin delokke ila, delo longepak deloope, Israelke opín tabunge Ijiptlok gílen toku.

⁴²Delo yoh delo, Ijiptlok bulum laalen dokupe, RUUTUMbí kaabom bomtíto. Depeila sim yoh sim, RUUTUMme yidgenam legape, siirum takam loope Israel kídíe darla kaabompe aiyé.”

⁴³Mosi melang Aaronme RUUTUMbí poto, “Sikesi gíbong adeng-apelo ige pename; mibo amie gíbong gíídí donamem domín gemayé.

⁴⁴Noluke enbo kunam abíl renam kídíe, dínbíng iyod rongem deme dolado.

⁴⁵Idola duumín gepona, delokke longe yérem bila agér imonamde dola mayé.

⁴⁶Deme ekum aralo dope aido. Ekum luyulo adínem bomlen mapeka. Along kídí lokke atel kote dírmapeka.

⁴⁷Israel doolung takame adeng-apedem ibosupe aido.

⁴⁸“Noluk aralo, duumín gena mibo amikone, RUUTUMke gíbong gíídíem imín gepe mííyé mílo, bík ekum-erang lokke milokong tabunge dínbíng iyod supope aiyé. Depe irongem bím Israel amikon kísape, torík supe aido, delok rongem bí, adeng-apedem imín gelado. Dínbíng iyod sumana milokongde delo domín gemayé.

⁴⁹Noluke aralo mibo ami duuna kídí lolang, noluke agí amisu teyolo, akam pakpe igepenam kídísim igeyé.”

⁵⁰Mosi melang Aaronke teyolo, RUUTUMke lulík nampe Israel tabunge iyinto.

⁵¹Delo longe delo, Ijipt amonglo Israel opín tabungem RUUTUMbí laalentoku.