Read Alladian GÍLEN KUNAM 13 Bible Online

GÍLEN KUNAM 13 - Alladian bible

GÍLEN KUNAM 13

¹RUUTUMbí Mosime poto,

²“Oge yalumnam milokong dem, ngok kepe tolík langka. Tani dokom taro dokom, ane akii miyo lokke len-ge yalumnade ngokke.”

³Mosi bí ami kídíem poto, “Noluke abílpe iko among, Ijiptlok gílen doku longe sim ríngge ayar langka, kapeila lakbíng tolnamlok RUUTUMbí nolum laalen toku. Siiyé kana atí domapeka.

⁴Abib poolo lokke kerang longe so, silo nolu gílen dungku.

⁵RUUTUMbí Kanaanit kídíke, Hittit kídíke, Amorit kídíke, Hibit kídíke, delokke Jebusit kídíke among kídíem, noluk buku kídílo bipe emla toge sunam among kídílo, edílo nolum langaayédí, delo nolu sim gíídí-siipe sim so kerayalum poolo so ibo sulangka.

⁶Longe kínídko, siiyé líkmanam ettíngem dolangka, delokke kíníd nana longe delo, RUUTUM kíng adeng-ape ilík langka.

⁷Siiyé líkmanam ettíngem, longe kíníd araso dolangka. Dekena moodí delo siiyé líknam ato-siro, demangkom siiyé atíe noluke among aralo kape aimang.

⁸Delo longe delo, ‘RUUTUMbí ngokke Ijiptlok gílen dokuem, ingko kodí ngom ibitone dem rínggela, ngo sim idung,’ emla nolu agí ome-uem poyil sulangka.

⁹Si igenam si, noluk legape noluke alag kídílo iyod kísane, delokke RUUTUMke ayonem noluke nappalo yidgedope, nolume míípa sumonane. Kapeila bík lakbíng tolnamlok, RUUTUMbí nolum Ijiptlok laalen toku.

¹⁰Nolu sim gíídí sim dítak takamlo, moodíem iyar gelangka.”

¹¹“RUUTUMbí nolukíng lang, noluke buku kídílo toge sunampe, nolum Kanaan amonglo bí langaayé. Edílo nolum bí amodem biyédí,

¹²depe birongem, nolu milokongpe, oge yalumnam koodem, RUUTUM kíng tolík langka. Taro lok oge yalumnam milokong dekom RUUTUMke.

¹³Idola opong yalumnam gado milokong dem, mér sobén lok biyanla, repít lenkupe aido. Nolu biyan kupe mííma yémílo, delokke alíngem dírlangka. Noluke oge yalumnam oo kídí tabungem, repít lenkupe aiyé.

¹⁴Yépenamlo nok ue, ‘Sikepe inam si ingkue?’ emla ííyéme, no bím sikepe poyil langka: ‘Ijipt amonglo ngoluke abílpe ila yédungem,

¹⁵edílo Pharaoh bí, aapíe tolla ngolum gímo kumape itodí, delo RUUTUMbí bík lakbíng ralnamlok, Ijipt among elok laalen toku. Depe ilamin ngolu taro lokke, oge yalumnamem RUUTUM kíng ipak líkdun, delokke ngoluke oge yalumnam oo dem repít lendung kune.

¹⁶Si igenam si, ngoluke tukta so míípa sumonape, gesii pename, kapeila RUUTUMbí ngolume Ijipt amonglok, bíkke lakbíng tolnamlok laalen toku.’”

¹⁷Edílo Pharaoh bí, Israel kídíem gímo tokudí, Shédí bí bulum Philistiape gína bedangde, jon-yala ande yatuakom, delok gíbokumato. Kapeila, Shédíbí mííto, “Bulu mimakko ríksumílo, buluke aapí-aange angupe ilangkula, Ijiptpe enlat sulangkukom iyépe.”

¹⁸Depeila Shédíbí bulum bilgoona yépol mooruk bedalok, gíbola Silíng Siyéngpe enboto. Israel kídíde mimak leemo gela Ijiptlok gílentoku.

¹⁹Mosibí Josephke alongem bíkkíng bomtak sutoku. Legade Joseph bí Israel kídíem pésu mopala poto, “Shédíbí nolum aropakpe igulpe emla aayé. Delo nolu ngok alongem among sokke bomlangkuka.”

²⁰Israel kídíde Sukkoth lok gíla yépol moorugem duuríksuna Etham emko delo doopoto.

²¹Buluke bedang gítínglo, longem doomug adongkope RUUTUMbí bulum gíboto, delokke yumem angun bidope eme medongpe, buluke keralo en-geto. Depe ikolok bulu longe yohpe enlato.

²²Ami kídíke kerang delo, agínpe longem doomug adongde, delokke yueme eme medongde en-ge getíto.