Read Alladian GÍLEN KUNAM 14 Bible Online

GÍLEN KUNAM 14 - Alladian bible

GÍLEN KUNAM 14

¹Delo RUUTUMbí Mosime poto,

²“Migdol kela Silíng Siyéng pénsamke, Pi Hahiroth anínlo, gílat sulang kula doolang kuka. Nolu Baal Jephonke ampengkon Silíng Siyéng robelo doope aiyé.

³Pharaohbí sikepe mííyé, ‘Israel kídíe tumgo sula, among delo bilgo dung, delokke yépol mooruklo bulu gílat sulíkdung.’

⁴Ngo Pharaohke aapí-aang dem tolmola, bí bulum mona bomyé. Idola bíkkela bíkke maglíng teyolo, ngok ikumnamde, ngom yidnam kope iyé. Delo RUUTUMbí ngo, emla Ijipt ami kídíe kényé.” Israel kídíe bulum pokampe ibito.

⁵“Edílo ami kídíe ennyok kaku emla Pharaohme pokan todí, delo bí lang bík migom kídíke aapí-aange angu langkula, ngolu kapei dekepe imotone? Ngolu Israelem ennyok motoku, delokke ngoluke abílpe inem ngolu nyokmoto,” emla pobosuto.

⁶Pharaoh bí, bíkke mimak guré gaari kídí demlang, sipaying kídídem iruuto.

⁷Dekedem irodem, bí mimak guré-gaari kídí tabung demla, língko akké miram sipaying emla, ruutum kídíem laadum sula gílen boto.

⁸RUUTUMke igul aralok enkuna, Israel kídíem Pharaoh bí, RUUTUMke rungkolok aapíe tolla monmín geto.

⁹Israel kídíke Pihahiroth anínlo, delokke Baal Jephonke ampengkon Silíng Siyéng robenglo doope idungem, bulume Ijipt lokke sipaying kídíe, guré- gaari kídíe delokke guré sipaying takame píímín geto.

¹⁰Pharaoh kelang sipaying kídíke, Israel méélamlo píímín genamdem bulu kaasula, yagorupe pesola RUUTUM kíng kapgu suto.

¹¹Bulu Mosi me poto, “Ijipt amonglo ago yuko kamanía? Ngolum, sikena yépol mooruklo sidope emlangía laalen tokun? Ngolum Ijipt lok laalen bolangkula, no ingko atokoda ipa botun? Kaasutola.

¹²Sikepe ipelo emla ngoluke lenkumang adape, nom ngolu popa manía? Ijipt kídíke abílpe inamde aiyatuai.”

¹³Mosi bí ami kídí dem poyan suto, “Nolu peso mapeka. Nolu edíípe daklangka. Nolu Ijipt ami kídíem lekoda kaapa yimayé,

¹⁴RUUTUMbí noluk legape mimagem iboyé, nolu asoope ipe aido.”

¹⁵RUUTUMbí Mosi me poto, “Nolu ngokkíng kape kapgu sukan? Israel kídíem ‘En-ge tete langka,’ emla lulík toka.

¹⁶Nok banggén dem leedu sula, nok alage siyéng teyo delo lagon bomtoka. Delo asie péépan suyé, delokke Israel kídíe asi raadang delokke pítílko moopí delok gíyé.

¹⁷Ngo Ijipt kídí, delokke aapí-aangem tolmoyé. Delo bulu Israel kídí méélamlo aamín geyé. Delo Pharaohke teyolo lang bík sipaying kídí teyolo, ngo ikumla ngo yidnamem paayé.

¹⁸Edílo ngo, bulum ikum yédí, delo Ijipt kídíe, RUUTUMbí ngo, emla kényé.”

¹⁹Israel maglíngke keralo, gígena Shédíke kotokide, gílat sulang kula, buluke méélamlo gítoku. Doomug adong deteng gyalang kula buluke méélam delo,

²⁰Israel kelang Ijipt sipaying kídíke pénsam delo dakpan subom toku. Yoh rubudem doomug adongde arot konem kaamo mola, delokke arot konem angun bila itíto. Depe ití kolok, maglíng annyide aanín bosu laamato.

²¹Mosi bí siyéng teyong delo, bík alagem lagon líkrongdem, muttíkna sanggo asarem RUUTUMbí yoh rubungem muttí mola, siyéng dem pítílna amongpe mutpímoto. Depeila asidem ipan suto.

²²Delo siyéng delokke pítílko among delok Israel ami kídí de gíto. Asi siparde suppi kísa bulum dakbombito.

²³Ijipt kídíde bulum monmín geto. Pharaohke gaari kídíde, guré kídíde, delokke guré sipaying kídíde siyéng delo aamín geto.

²⁴Doonyi saamang adape, eme medong deloklang doomug adong delok RUUTUMbí Ijipt sipaying kídídem, kaatok sula bulum akén-ayén yimadope ito.

²⁵Bí buluke gaari kídí lokke kelong kídíem, yullum mola bulum gaari dukbom kolo ebín along moto. Delo Ijipt ami kídíde pobosuto, “Ngolu soge gílangkupe, RUUTUMbí Israel kepe doola ngoluk mirupe mimak modung.”

²⁶RUUTUMbí Mosime poto, “Asie eedum sulangkula Ijipt ami kídíem, buluke gaari kídíemla, guré sipaying kídíem eelum bomdope, siyéng teyonglo nok alage lagon toku.”

²⁷Mosi siyéng teyong delo alage lagonto delokke doonyie saado delo, siyéng aside agí dakkollo binga sutoku. Ijipt ami kídarde siyéng delok duknyok gekupe ito. Idola RUUTUMbí bulum siyéng aralo aadope asiem eelum moto.

²⁸Aside eelat sulangkula, Pharaohke Israelem monmín gena maglíng takamem, gaari takam dem, guré sipaying takam dem eelum bomkai. Buluke midum atel kokom turna kamato.

²⁹Idola Israel kídíde arotkonlo, asie suppipe ina siyéng, delokke pítílko among delok gíto.

³⁰Delo longe delo Ijipt kídíke alaglok, Israel kídíem RUUTUMbí mopítto.

³¹Edílo RUUTUMbí, botterupe miga-ralnamlok, Ijipt kídíem ikumnamem, Israel kídíe kaatodí, RUUTUMme ami kídíe pesoto, delokke bímla, bík béérang Mosime míngkesuto.