Read Alladian GÍLEN KUNAM 15 Bible Online

GÍLEN KUNAM 15 - Alladian bible

GÍLEN KUNAM 15

¹Delo Mosi lang Israel kídíe, sim miri sim RUUTUMme lubito. “Ngo RUUTUM kíng miri luyé, Kapeila bíkkíng botterupe yidname kakai. Guré kídíem lang dukbona kídíem, bí siyéngem pulub moto.

²RUUTUMbí ngokke ralname lang miri lukenge. Bí ngokke turkepe ikai. Bí ngokke Shédíe, delokke bím ngo yitgeyé, ngok abuke Shédíe, delokke bík bottenamem miripe ngo lugeyé.

³RUUTUMbí miram rungko, RUUTUMde bík amínsue.

⁴Pharaohke gaari kídíem lang bík sipayingem, bí siyéngem pulub moto.

⁵Eerína asie bulum eelum bomkai, elíng kísa bulu jilum angkai.

⁶Nok lakbíkde E RUUTUM, Yirí-pedínam ralname. Nok lakbíkde E RUUTUM, miru kídíem dírmíkto.

⁷Nokke yirí pedípe ikum kolok, nom akna kídíem olet modung. Nokke marnam emem dorlen mola, de bulum eerena anne kísape gupakdung.

⁸Nok nyobung ngalík kolok, asi kídíe eedum sudung. Dekede suppi kísa jonnampe dakto, eerí rungko siyéng dete tolbom sukai.

⁹Mirue lukím suto: ‘Ngo monmín gela, bulum píímín geyé, ngo buluke sérangem orpansula míínampe, ngo laayé, ngokke yoksem pusat sula, ngok alage bulume nyokyin moyé.’

¹⁰Idola nokke ngalen letel lok, bulume asie pulubto, bulu pesonam asilo, pakrang kísa jilum angkai.

¹¹E RUUTUM nokke kísape, shédí kídí aralo séko kadun? Sékoda nok kísa, míírí-míínyope deena amiko kadun? Sékoda nok kísa, irisinyo miram agérem inako kadun?

¹²Nokke lakbíge yamtar kolok, mirueme amonge métto.

¹³Nokke nyokmana ayalok no gíbola, nok ami kídíem ipíttoku. Nokke ralnamlok no bulum gíbola, nokke deena dungkolo no gíboyéku.

¹⁴Ami kídí tabunge tatla, bulu pesolok dan-go sukai. Phillistia kídíe pesolok, míngkén yimape ikai.

¹⁵Edomke ruutum kídíe pesolok akén geyimangkai, Moabke miram kídíe dan-gekai, Kanaan among lokke ruutum kídíe aapí-aange amérungkai.

¹⁶Akén-ayén yimanam pesue, bulum aabomkai, E RUUTUM bulu nok ralnamem kaala, nokke abíllok ipít kunam, nok ami tabunge, yon-yinmaadem, bulu pesolok dakkén dakyén gemape iyé.

¹⁷No agí amiem laalangala, nok díítelo dagmodung. RUUTUM nokke ulsunam, Deena Tombu delo, nokke mosunam kumko ekum delo, ami kídíem daga modung.

¹⁸RUUTUMno agín lokke agínpe, roja duuyar bomne.”

¹⁹Edílo, Pharaohke gaari kídí delang guré kídí delokke dukbona kídíde, siyénglo angkadí, delo RUUTUMbí asiem taadum sulangkula bulum eelum moto. Idola Israel kídíde, siyéng delokke pítílko moopílok gíto.

²⁰Delo Aaronke bírme, kaalu miripe ina Miriam bí, batnam tapung lok bík alaglo bomla, delokke mime tabunge batnam tapung lok bomla, bíkkíng gímín gela paksong sooto.

²¹Miriam bulum miriko luboto: “RUUTUM kíng miri lulangka, kapeila bíkkíng botterupe yidname kakai. Guré kídíem lang dukbomna kídíem, siyéngem eelum moto.”

²²Delok rongem, Mosibí ami kídíem Silíng Siyéng delok gíbola, Shur emnam yépol mooruk delo gíboto. Longe longum kokai asi paamape yépol mooruk delo ento.

²³Depe enrong dem, bulu Marah emko moolop kolo pííto, idola delokke aside yagorupe kosala tíngkan mato. Depeila moolop dem Marah[2] emla mínlíkto.

²⁴Ami kídíe Mosime ebín-eson manbomla luto, “Ngolu ingko kodí tííyéne?”

²⁵Mosibí airupe RUUTUM kíng kapgu suto. Delo RUUTUMbí, bím esing lokke asékko lengkanla, deme asilo yoblík toname, aside tííbang kaku. Delo RUUTUMbí, bulum yégenape yédong ayonem lubila bulum ikang kíto.

²⁶Bí poto, “RUUTUM noluke Shédíke agomem, aipakpe tatgapla, delokke bík kangkolo ingkuedí aidune dekeme igela, bíkke lunamem aiyope tatbila, bík yédongem bomgap yémílo, Ijipt ami kídílo bomanam kilii-ramli kísanem, noluke teyolo boma mayé, kapeila ngo mino nolum ipítna RUUTUMbí.”

²⁷Longekon dem bulu, sirung íying kola annyiko kala delokke íying kíníd palm esing kako, Elim delo pííla asi anínlo notkoem ito.