Read Alladian GÍLEN KUNAM 16 Bible Online

GÍLEN KUNAM 16 - Alladian bible

GÍLEN KUNAM 16

¹Israel milude, Ijiptlok lenrong kuem, poolo annyi delokke longe íying kolang pilngolo, Elim kela Sinaike pénsamlo duuna, yépol mooruk Sin emko delo, Elim lokke gílen langkula dootoku.

²Yépol mooruk delo, milung tabungde Mosime lang Aaronme ebín-eson manbomto.

³Israel kídíde bínyim poto, “Ijiptlo RUUTUMbí ngolum moka duamílo aiyatuai. Delo ngolu duula, adín dola agí míínampe dopa-tíípatuai. Idola sikena yépol moorukso, nonyi ngolum gíbola milung tabung sim kenolok pínka modak.”

⁴Delo Mosime RUUTUMbí poto, “Ngo nolu takamke legape, taleng telok ettíngem paadope lettok biyé. Ami kídíe loodí mipíke, gílenla, longe delokke tetengko itape aiyé. Sikena ngok poyilem igedudí emla ngo bulum ikang kíyé.

⁵Longe akkénana longe delo, bulu longe abíd lokke aduko bojéyape itala irusupe aido.”

⁶Mosi lang Aaron bínyi, Israel tabungem pokanto, “Siyumke yumeso, RUUTUMbí ngolum Ijiptlok laalentoku emla ngolu kényé,

⁷delokke nyampoke roem, RUUTUMke angun-abéem kaapayé, kapeila bík teyolo noluke ebín-eson mantí bomnam ngonyi sékoda?”

⁸Mosi sikepe poto, “Bík teyolo nolu ebínrupe mantí bomkolok, yumem nolum adínem bila, roem noluke míínampe ettíngem bila ipena bí RUUTUM, emla nolu kényé. Kapeila nolu ngonyik teyolo ebín-eson manbommang, idola RUUTUMme min nolu manbomdune.”

⁹Delo Aaronme Mosi poto, “Israel milung tabung dem polangka. RUUTUMke keralo aayin langka, kapeila noluke ebín rupe manbomnamem bí tatsuto.”

¹⁰Aaronke Israel milung dem podungem, bulu yépol mooruk delo RUUTUMke angun-abée doomuglo lendupe kaayinto.

¹¹RUUTUMbí Mosime poto,

¹²“Israel kídíke ebínem ngo tatsuto. Bulum sipe polangka, ‘Yume paang rísulo, nolu adín doyé, delokke rokomem noluke míínampe ettíngem paayinyé. Delo nolu, RUUTUM noluke Shédíbí ngo, emla kényé.’ ”

¹³Delo yume delo pettange yobala, notkodem bííbomto. Roh dem rokompe aapame notkodem bííbomto.

¹⁴Aapam lokke nyokrong kueme, yépol moorukke kédéng teyong delo bésorna tekyakna tapam kísaneke lenkai.

¹⁵Israel kídíe edílo dekedem kaatodí, dem kénbo sumala “Sikesi ingkueke?” emla ííbo suto. Mosi bulum pobito, “Ngolum dodope RUUTUMke binam ettínge si.”

¹⁶Sikepe RUUTUMbí lulíkto, “Mipil miyonge agí dotepe italangka, noluke tombulo duuna legape Omerpe [3] miyonge laalangka.”

¹⁷Israel kídíde bulum pokampe iyinto. Idola ayokone bojépe itato delokke ayokone anyope itato.

¹⁸Edílo bulu dem omer lok kíkí tokudí, sékodí bojépe ita tuadí, bí bojéyape kayamato, delokke sékodí anyope itatodí bí anyoya mato. Mipile agí tetepe iyinto.

¹⁹Delo Mosi bulum poto, “Roh akon karku mang adape, sékote dekedem mesiimapeka.”

²⁰Idola ayokone, Mosike agomem tatmape rohkon lope ayokonem mesiito, idola dekede roh kondem tapumpe ila namsito. Depe ila buluke teyolo Mosibí marto.

²¹Rodípe mipile agí tetepe ita tayinto. Edílo doonyie saala pamki todí dekede yolyin toku.

²²Longe akkénalo bulu donamdem bojéyape isito. Mipile Omer annyipe ising kolok, milung delokke miro kídíe aala, Mosime sim legang sim popato.

²³Bí bulum poto, “Sikepe RUUTUMbí lulíktung; nyampoke longede, apéédíe, delokke RUUTUM kíng tolíknam deena Sabbath longe. Depeila noluke ettíngpe pampenamem pamlangka, raapenamem ralangka. Ingko-ingkuem dongo yédí, nyampoke legape dem mesiilangka.”

²⁴Mosike pokampe bulu longekon lope mesiito. De atí tapum kamape namsi mato.

²⁵Mosi poto, “Silo nolu dolangka, kapeila siloke longe si, RUUTUM kíng tolíknam Sabbath longe. Nolu silo amonglo dekena atoem paamayé.

²⁶Longe akkéko nolu deme ita-hata gootoka, idola longe kíníd Sabbath longe delo nolu atí paamayé.”

²⁷Depe emtuakom, ayokon amie longe kíníd nana delo, dekeme itape malento, idola bulu atí mapaamato.

²⁸Delo RUUTUMbí Mosime poto, “Edít longe koda ami kídí nolu, ngokke ngiitom luyilem tatmala delokke igemape itíyén?

²⁹Míngge langka, RUUTUMbí nolum Sabbath longem bitung, dekepeila longké nana longe delo, nolum longe annyi legape donamem bidung. Sékote gílen-gíangmape mipile, agí dungkolo longe kíníd delo duupe aiyé.”

³⁰Depeila longe kínídlo ami kídíe apééla duuyinto.

³¹Israel ami kídíe ettíng dem Manna [4] emla amín mínto. Dekede yasila aména amí kísaneke, delokke ngullang hoyél sunam remyakna biskut kísa doponeke.

³²Mosibí poto, “RUUTUMbí sikepe lulík dung, ‘Nolum ngo dodope ngokke binam ettíng sim, aapena siirum tabunge kaayin dope, mannalok omerko mesing singgap langka.’ ”

³³Depe lulík kolok Mosibí Aaronme poto, “No toguko laala manna lok Omerko ilíkla, deme aapena siirum tabung legape, RUUTUMke keralo mesing singgap langka.”

³⁴RUUTUMke Mosime lulíknampe, Aaron bí manna dem isila Daapong Sonduk keralo mesiisiyar dope meto.

³⁵Israel kídíde, buluke eetet-monetpe dungkuko Kanaan amonglo, píímang yaryardem, toodí takying appiko manna dem dotíto.

³⁶Ephah [5] atelde Omer íyinge.