Read Alladian GÍLEN KUNAM 17 Bible Online

GÍLEN KUNAM 17 - Alladian bible

GÍLEN KUNAM 17

¹Israelke maglíng tabungde, yépol mooruk Sin lokke gílen langkula, RUUTUMke polík nampe, moolopkon lokke moolop konlo gítí-gooto. Bulu Rephidim emko delo notko ito, idola ami kídí legape asi tíípa mato.

²Depeila bulu Mosime lumín sula luto, “Ngolum tíídope asi bilangka.” Mosi poyan suto, “Kape nolu ebín-ebon mantíkan? Kape nolu RUUTUM me ikangkan?”

³Idola ami kídíde asi tíílíng aloola, Mosime ebín bomto. Bulu luto, “Ngolum Ijipt lok kape gílen bokakun? Ngolum lang, ngoluke ome-oo kídíem, delokke simon-sili kídíem asi tíílí lok simope emla míídunía?”

⁴Mosibí RUUTUM kelo airupe kapbi suto, delokke poto, “Sim ami kídí sim, ngo kape imílodí aiyéne? Bulu ngom elíng lok gepet dakbong.”

⁵RUUTUMbí Mosime poto, “No Israel kídíke abu-abíng ayoko laalenla, ami kídí kerape gígeto, nokke Nail asiem itnana banggén dem bomlangka.

⁶Ngo nok kerape Sinai dííteke lííreng kolo daggeyé. Delo banggén delok lííreng dem itlangka, depe imílo ami kídíe, asi tíípadope asie lenbiyé.” Mosibí Israel kídíke abu-abíng keralo dekepe ibito.

⁷Moolop delokke amínem Massah [6] delokke Meribbah [7] emla bí mínto. Legade, delo bulu Shédíme ikang dola sipe emto, “RUUTUMbí ngoluke aralo kadunaya kamanaya?”

⁸Rephidimlo Amalek kídíe aala Israelem mimak iyabomto.

⁹Joshua me Mosi poto, “Ngoluk amilok ayoko ullenla, Amelek kídíem mimak imín sutoka, nyampo ngo Shédíke banggén sim bomla, díítum teyong telo dagyé.”

¹⁰Mosike lulígnampe Joshua bí mimak imínsuto. Mosila Aaron delokke, Hur bulu díítum teyolo saato.

¹¹Mosike alage lagdung tete dudem Israel kídíe ikumto. Idola edílo bík alage meyi tokudí, Amalek kídíe ikumto.

¹²Edílo Mosike alage lakpé kadí, Aaron lang Hur bínyi Mosike umkepe, elínglok joonga bito. Aaron lang Hur bínyi abe elenlo dagla, Mosike alagem bomdí bomto. Depeila Mosike alage doonyi uaang lope edííto.

¹³Depeila Joshua bí, Amalek kídíem yoksalok ikumto.

¹⁴Delo Mosime RUUTUMbí poto, “Sim ikumnam legang sim, kakot lo míngge ayar gedope atlangka, Delokke Joshuake tatkolo popa langka. Kapeila ngo taleng rumkíso, kénpa yimadope Amalek ami kídí sim nyokyin moyé.”

¹⁵Delo Mosibí rungguko píla delok amínem, “RUUTUM bí ngokke tamte,” emla mínlíkto.

¹⁶Kapeila bí sikepe emto, “RUUTUMke tamtem kedonpe ígon langka. RUUTUMbí agínpe Amalek kídíem mimak imín suyaryé.”