Read Alladian GÍLEN KUNAM 18 Bible Online

GÍLEN KUNAM 18 - Alladian bible

GÍLEN KUNAM 18

¹Midian ami kídí lokke miripe ina, Mosike ato abu Jethro bí, Mosike teyolo lang Israelke teyolo, Shédíke agér inam takam emlang kapekísa RUUTUMbí Israel kídíem Ijiptlok laalen tokudí, dem takamdem tatyinto.

²Delo Mosike ato abu Jethro bí, agí ekumlo melík pongkunam, Mosi ke mime Jipporah melang, bík oo annyi dem kaasi bito.

³Oo annyi delokke akonem, Gershon emla amínem mínto, kapeila Mosi bí, “Ngo mibo amonglo mibo-miyingpe ikai,” emsula dekepe mínto.

⁴Delokke akonem, “Ngok abuke Shédíbí, ngom Pharaohke yoksalok mopítto,” emla Mosi bí amínem Eliejer emto.

⁵Shédíke dííte anínke yépol mooruklo, Mosike notko ila duudoem, bíkke ato abu Jethro, Mosike mimem lang oo annyiem gíbola aaboto.

⁶Depe aadungem Jethro bí, “Ngo nokke ato abu Jethro. Nokkíng nok mimem lang oo annyiem aabola aadak,” emla agomem poge líkto.

⁷Mosibí ato abudem gíríkla, gubla mumpupla iríksuto. Bínyi ashéng lupoem pobosupala, notko tombupe aabosutoku.

⁸Israel kídíem, laalen dokupe Pharaoh melang Ijipt ami kídíem, RUUTUMbí kape kísa itodí, deke tabungem Mosi bí Jethrome popato. Sike sokke teyong lote kape kísa RUUTUMbí bulum ipít todí, dekemte bím pokanto.

⁹Edílo Jethro legang takamem tattodí, bí ashédola,

¹⁰bí yidgeto, “Ijipt lokke ami kídí loklang, Pharaoh kelok nolum ipítna RUUTUMbím yidgedo,

¹¹RUUTUMbí uyu kídí takamem pemílo, botteyane emla ngo supak kénkai. Israel kídíem atí siripe míímape ina kídíem, RUUTUMbí sikepe ito.”

¹²Delo Jethro bí, Shédí kíng ipak ilík penam ekurang emla, romlík penam amanem bomato, delokke Aaronla Israel lokke miro tabunge, deena ettíngem bíkkíng lekope, Shédíke keralo dobo sudope aadumsuto.

¹³Longe kondem Mosi bí ami kídíem kebang lubito. Bulu bíme gargoobomla, roh lokke yume loope kebang lubinam legape daktí bomto.

¹⁴Edílo ami kídí legape, Mosike agér inamem bík ato abude kaatodí, bí lupoto, “Ami kídí legape no ingkuemda idun? Kape no atel kebang lunape ila, ami kídíe nome gargoobomla, roh lokke ila yume loope katíbomkan?”

¹⁵Mosi bí poyan suto, “Legade, ami kídíe Shédíke míínamem kénpe emla ngokkíng aadung.

¹⁶Edílo, bulu lumín-manmínko kayédí. Ngokkíng dem bomala, ngo opéé annyi pénsamem lujon bila, bulum Shédíke yédong emla, lulíg namem pobidung.”

¹⁷Delo Jethro bí poyilto, “No ai bedalok agér sim imang.

¹⁸No lang, nokkíng aana ami kídísi, inga-ngatupe sudung. Nok legape agér si tebeg aloodung. No agér kídí sim agí atele ila sumayé.

¹⁹Nom ngo poyil anyongko pobiyé, dem no tatgap langka, delokke Shédí bí nom igulyé. No Shédíke keralo, ami kídí legape daga bila buluke lumín-manmínem bík keralo boma bilangka.

²⁰Bulum Shédíke lulígnam emlang, yédong ayonem poyilla, buluke yépenam bedangem popabila, buluke agér ipe-sape namem lengkan bitoka.

²¹Idola sok teyoso, no Shédíme pesona ami, míídíílíknam delokke paapu-doopu mana ami aroem ullenla, ami éjar teyolo, língko teyolo, íying pilngo teyolo, delokke midum íying teyolo kebang ruutum pe ibodope tolík toka.

²²Loodí mipíke, bulum kebang ruutum pe imotoka. Amé-aséna kebangem bulu luyin sudope, delokke bottena piyyang kebangem, nokkíng bomadope itoka. Depe imílo nok egetde essayé, kapeila bulu nok eget dem gebosuyé.

²³Shédíke ami kídíete ashéla ekumlo gílayéku.”

²⁴Jethroke poyil dem Mosibí igeto.

²⁵Bí Israel aralok, miro kídíem ullenla, bulum ami éjar lokke teyolo, língko lokke teyolo, delokke midum íyingke teyolo, kebang ruutum pe ilíkto.

²⁶Bulu loodí mipíke, ami kídí kebang ruutumpe ito. Amé-aséna kebangem bulu baabo sula, bottena piyyang kebangem Mosi kíng bomato.

²⁷Delokrodem Mosi bí, Jethrome ai-kampope melík langkula, bí agí amongpe enlatsutoku.