Read Alladian GÍLEN KUNAM 19 Bible Online

GÍLEN KUNAM 19 - Alladian bible

GÍLEN KUNAM 19

¹Israel kídíde Rephidim lok gílen toku, delokke Ijipt lokke gílen rongku poolo angum nana lokke kerang longelo, bulu yépol mooruk Sinailo pííto.

²Delo bulu Sinai dííte rumkílo notkoem ito.

³Delo Mosi bí RUUTUMme kaarík supe díítelo resala saato. Dííte teyolok bím RUUTUMbí tomla, Jakobke otíng-oyin, Israel kídíem sipe polangka emto,

⁴“Ijipt ami kídíem, RUUTUM ngo kapekísa itodí, delokke teyolo kape kísa pemíe, agíke uem alaplo yobbo dakdí, dekekísape ngokke keraso nolum ngokke bomanamem nolu kaato.

⁵Nolu ngom tatla, ngok daapongem bomgap yémílo, nolu ngokke agísu amie. Tani among takam si ngokke, idola nolu ngokke ullen sunam amie.

⁶Nolu miripe ngom agér ibiyé.”

⁷Delo Mosibí oilangkula, ami kídíke ruutum kídíem, tomdum sula RUUTUMke bím lulígnam tabungem pokan bitoku.

⁸Delo ami takamde, “RUUTUMke ponam tabungdem ngolu igeyé,” emla lekope poyansuto. Dem agom dem Mosibí RUUTUM kíng popatoku.

⁹RUUTUMbí Mosime poto, “Supak lokke ila ami kídíe, ngokke nom lupo sunamem tatla, nom arope míídope, ngo nokkíng biisamna doomuglok aayé.”

¹⁰Ami kídíke poyan sukunamem, Mosi bí RUUTUMme popa bitoku.

¹¹RUUTUMbí Mosime poto, “No ami kídílo gílangkula, silola nyampo bulum kumlík toka, delokke buluke ege-galuk kídíem etbín sumola, rééke longelo, iru-sarung sumolangka, kapeila delo longe delo takam amie kaadupe Sinai díítelo RUUTUMbí tokyé.

¹²Díítedem bilgola rísuko ilangka. Delo ami kídíem, dem korbo mola demangkom díítelo resamola imo mapeka, delokke anín lote aamomapeka. Sékodí delo ale tuayédí, deme mokape aido.

¹³Bík teyolo alag atí ugamape, elínglok gepet mamílo, epuklok apkape aido. Tanipe idokom tarope idokom turmope aimang. Edílo mér sobén areng lokke bikul adude muuyédí, delokke ila bulu díítelo saape aido.”

¹⁴Mosike dííte lok tokrong kuem, ami kídíem bí kumlíkla, irung-sarung dope emla, bulu ege-galugem etbínsula ito.

¹⁵Delo bí ami kídíem poto, “Rééke longe legape nolu irung-sarung sulangka, sikepe idung so mime-milo ketbo doboem imapeka.”

¹⁶Longumnana longe delokke roh delo, doomír-yaarie ila, dííte delo biisamna doomuge kakai, delokke bayikruna bikul adudko mankai. Notko delokke mipil-miyonge pesolok danto.

¹⁷Delo Mosi bí ami kídíem, notkolok Shédíme kaarík kape lenbola, bulu dííte delokke lebelo dagaato.

¹⁸Sinai díítedem míkkípe bííbomto, kapeila emelok RUUTUMbí delo tokto. Eme romyém míkkí uunam kísa, delok míkkíe uusato. Díítum tabungde [8] yagorupe tonto.

¹⁹Delokke bikul adude muuduk yayang ikai. Delo Mosi lupola, Shédí RUUTUMbí doomír-mírdud lok poyansuto.

²⁰RUUTUMbí Sinai dííte ponyuklo oila, Mosime dííte ponyuk delo tomsaato. Depeila Mosibí saato.

²¹Delokke RUUTUMbí bím poto, “No oilang kula, ami kídíem ngom kaape aala, rísuem korbo madope lutor tokaku, bulu depe iyémílo deddíne siyé.

²²Miri kídíete RUUTUMme kaape emla aane, kerape deesupope aido, demangke bulumte RUUTUMbí nyokmoyé.”

²³RUUTUMme Mosi poto, “Ami kídíde saala mayé, kapeila no agíe dííte em deena kope mííla, dem bilgola rísu ilangka emla ngolum lulígto.”

²⁴RUUTUMbí poyan suto, “No oilangkula Aaronme saabo tokuka. Idola miri kídíe lang ami kídíe, rísudem korbola ngokkíng saape aimang, demamílo ngo bulum nyokmoyé.”

²⁵Delo Mosi bí oilangkula, RUUTUMke ponam tabungem, ami kídíem popa toku.