Read Alladian GÍLEN KUNAM 2 Bible Online

GÍLEN KUNAM 2 - Alladian bible

GÍLEN KUNAM 2

¹Méélamdem Lébi opín lokke ami kone, Lébi mime sukonem mimepe bomla,

²de mimede koo gela oo ko oto. Koo dem anede kamporupe kaala, poolo angum kokai rumnyokto.

³Idola edílo bím rumnyok layimape itodí, bí tapiilok aapéko pola, dem líínyong lokla déngkyam lok mollíkla, irongem aapé aradelo koo dem melík pala, Nail korong robeng lokke líok pasum lo leelíkto.

⁴Bíkkíng íngko atíko kayédí emla, bíkke bírmede mooteng gaamlo dakla kaabomto.

⁵Méélamdem, Pharaohke omede írsukape emla korong delo oila, bíkke mime béérang kídíde korong robeng delo gígoto. Depe iduem bí líok pasumlo aapédem kaala, bík béérang kondem langaamoto.

⁶Bí aapédem lubyala koo dem kaato. Koo de kaapla bí koodem ayala, “Si Hibru kídíke oo ko,” emla manto.

⁷Delo bík bírmede Pharaoh ke ome dem, “Ngo gíla bím anyun sunla, kaasa-tadsa dope Hibru mimeko tombipía?” emla popato.

⁸Delo Pharaoh ke omede “Aiyé gíkaala,” emlíkto. Delo mime koo de gíla koo delokke agí anedem aabotoku.

⁹Pharaoh ke ome bím, “No koo sim bomlang kula ngok legape kaasa-tatsang bilangka, ngo nome dormang biyé,” emla lulígto. Delo mimede koo dem laalang bím kaasa-tatsang bikai.

¹⁰Edílo koo de mine kadí, bíme Pharaoh ke ome keralo, bí boma bila, bí Pharaoh ke ome lokke oo pe ikai. “Bím ngo asilok holento,” emla bí koo delok amínem Mosi emla mínto.

¹¹Mosike minerongem, longe konem bí agíke ami kídí aralo gílento, delokke buluke agér ika sunamem kaato. Delo bí agíke Hibru ami konem Ijipt ami kone demdupe kaato.

¹²Delo Mosibí dei-degongem kanggo-tatgo sula, séko mete kaapa maala, Ijipt ami dem, bí mokapala yépol delo yunyokto.

¹³Longe kondem bík gílen dokuem, Hibru annyi konem momín sudupe bí kaato. Imemna amidem bí ííto, “No agíke Hibru amisuem kape modun?”

¹⁴Delo amide bím luyan suto, “Ngonyike teyolo nom sékoda ruutumpe kebang ludope itone? No Ijipt amidem mokanam kísape, ngomte mokape emla míídunía?” Dem tatla Mosi bí pesola “Ngok inamem kényinkai,” emla mííto.

¹⁵Edílo Pharaoh bí legang sim tattodí, bí Mosime mokape ito, idola Pharaoh ke kera delok bí dugnyok gela, Midian amongpe ennyok geto, delokke delo gíla asi déérung anín kolo dungaato.

¹⁶Delo Midian lokke miri kone ome kínídko kato, bulu abu lokke taro kídíem asi bidope emla dotkolo asi kaalíkpe aato.

¹⁷Mér sobén kaabom neke aala bulum lupakto, idola Mosi bí gerepla bulum igulla, buluke taro kídíem asi bito.

¹⁸Edílo mime kínídde buluke abu Jethro kíng aato kudí, delo bí bulum, “Silo kapeda nolu menarupe píídung kune?” emla ííríkto.

¹⁹Bulu poyan suto, “Ijipt ami kone ngolum mér sobén kaabomna kídílok ipítla, ngoluke legape asiemte joobila, taro kídí emte asi bibito.”

²⁰Delo bí ome kídíem, “Ingkolo bí? Kape nolu bím mepakkan? Dobo-tííbo sudope tomto kaku,” emla íídola lulíkto.

²¹Ami delo Mosi bí duumín gedope elíkto, delokke bík ome Jipporah me Mosi kíng mimepe nyamran ilíkto.

²²Jipporah bí ooko ola dem Mosi bí, “Mibo amonglo ngo miyingpe ikai,” emgeyéla, Gershon emla amínem mínlíkto.

²³Dekepe deddína longeko irongem, Ijipt lokke rojade sikai. Israel kídíde buluke abíl agér ikolok ankí-keno geto. Buluke abílpe ikolok ipít-igul legape kapnam kídíde Shédí kíng pííto.

²⁴Shédí bí buluke ankí-keno kapnamem tatla, bíkke Abraham, Isaak delokke Jakob kíng daapong dobo sunamem míípasuto.

²⁵Depeila Israel kídíke ankí-kenoem Shédí bí kaala buluke legape mííbito.