Read Alladian GÍLEN KUNAM 21 Bible Online

GÍLEN KUNAM 21 - Alladian bible

GÍLEN KUNAM 21

¹“Israel kídílo sim idong kídí sim bilangka:

²Nolu Hibru arasulok abíl reyémílo, bí dítak akkéko nolum agér ibiyé, idola dítak kíníd delo, noluke teyo delo are-ame atí dortemmape, bí apítpe gíladoku.

³Bí agí atelpe aatomílo, agí atelpe gíkupe aiyé, delokke bí mimeko kala, aaduem aabotomílo, mimede bíkkíng gímín gekupe aiyé.

⁴Bíkke ruutumde bím mime tombila, mimede ome-oo ola iyémílo, mime delang ome-oode ruutum kepe iyé, delokke milokong petomde apítpe gísuyéku.

⁵Idola abílde, ‘Ngok ruutum emlang méngem delokke ome-uem ayasudung, delokke apítpe gíkupe ngo míímang,’ emla polen suyémílo,

⁶bík ruutumde bíme, Shédíke keralo gíbope aido. Delo ruutumde bíme eyab delo demangkom, eyab gaang delo aabola, bíkke nyorungem íkul nana lok íkulla ipe aido. Delok rongem bí, bíkke yédolope ruutum delokke abílpe iyé.

⁷“Ami akone agíke omem abílpe kosuyémílo, bí milokong abíl kísa, gípít sulang kumayé.

⁸Abíl mimepe renamem méngpe bompe emla míípala, míngkumayé mílo, mimedem abu delo kolat sukupe aiyé, idola bíkke ruutumde bíme mibo amilo kolík lamayé, kapeila mimedem bí ai-kampope irík sumangkai.

⁹Amikone abíl mimeko agí oo kepe rebiyémílo, mime dem bí agí ome kísape ipe aiyé.

¹⁰Ami akone ééméko layémílo, bí éépong dem kerang kísa, dope-tíípenamem, ege-galugem, delokke kerangke mime-milo ségu paklok duubope aiyé.

¹¹Milode mime teyong delo dekepe ilamayémílo, are-ame atí kamape mime dem apítpe melenkupe aiyé.”

¹²“Séko amikonem mola ikayédí, bím mokape aiyé.

¹³Idola ikanamdem kénmape imempe ito emmílo, ngokke lupeknam moolop delo bí duunyok gepe aido, delo bí duupísuyé.

¹⁴Idola amikone míírung dola, amikonem mokaruupe mokayémílo, bí ngokke runggulo dukpísupe dugatuakom, delok bím laala mokape aiyé.

¹⁵“Sékodí agí abuem demangkom anem dííla-mola iyédí, bím mokape aido.

¹⁶“Sékodí ami akonem, kodope demangkom abílpe duubodope emla umyédí bím mokape aido.

¹⁷“Sékodí agíke abuem demangkom anem bééyédí, bím mokape aido.

¹⁸“Ami annyikone momínsula, akonde akonem elílok demangkom, lakbí lok kítmínsula moka bosumaduakom, ippulo ketbyadope moyémílo,

¹⁹delokke mobyanam amide méélampe duula-dagla, gígola iyékumílo, mona amide atí ajéng kamayé. Idola monade, mobyanam lokke longe loodumem dorla delokke amidem ipíkupe aido.

²⁰“Ami akone agíke milokong, demangkom mime abílem banggén lok itka yémílo, dem amidem ingéépe aido.

²¹Idola abílde longko-loonyiko irongem, duurep-dagrepla iyékumílo, bím ingéémayé, kapeila abílde bíkke ekurange.

²²“Milokong terenge momín sudungem, akone nganga gena mime konem motaksula koodem opak moyémílo, delokke mimede gérmang-paamangko kamang dagakom, dekepe mona amidem mime delokke milo pokampe, ajéngem dorpe aido delokke kebangete tolíkpe aiyé.

²³Idola mimede atímape ila, tarí-tape gekamílo, yénam ayanpe yénamem,

²⁴amig ayanpe amigem, iipang ayanpe iipangem, alag ayanpe alagem, ale ayanpe alem,

²⁵romnam ayanpe romla, tarí ayanpe tarípe, delokke tupgít ayanpe tupgítla iyansupe aido.

²⁶“Amikone agíke abíl mimeke, demangkom milokongke amigem kítla, kítpet yémílo, delok amig adupe abíl dem apítpe gílen mokupe aiyé.

²⁷Delokke bí iipangko kítpuu yémíloteng, iipang adupe abíl dem apítpe gílen mokupe aiyé.

²⁸“Gooru rubokone, tani milokong mangkom mimekonem tupka yémílo, rubodem elílok gepetpe aiyé. Delokke gooru delokke adínem domapeka. Idola ruto dem atí ajéng imapeka.

²⁹Idola rubode dekepe ami tuptí goonako, delokke rutodem kerapekai popaalate, rubo dem atí imape, milokong mangkom mimeko tupkala iyémílo, rubodem elílok gekape aido, delokke ruto demte mokape aido.

³⁰Sok kékon so ajéng inamko kayémílo, bíkke yénam ayanpe kape kísa ajéngem luyédí dekepe bí dorpe aiyé.

³¹Rubode yaamé koo ko demangkom mimum koo ko tuppet yémílokom sikena idong si kayé.

³²Rubode abíl milokong demangkom mimeko tuppet yémílo, rutode abíl ruutumdem, baldín nogdi íying angumko ajéngpe dorpe aiyé, delokke rubodem elínglok gepetpe aiyé.

³³“Ami kone arung ikapnamko iyala, demangkom arungko koola ikap kumape ikolok, ruboko demangkom gadoko delo olíkyémílo,

³⁴arung delokke atode, areme dorpe aiyé. Bí taro delokke atodem dorpe aiyé delo simade bíkkepe iyé.

³⁵Ami akonke rubokone, ami akonke rubokonem tuppet yémílo, tuppetna rubodem bínyi kobosula, abalem ipan bosupe aiyé, delokke gooru simadem akampe dopansupe aiyé.

³⁶Idola rubode tuptí goonako delokke rutodem kerapekai popaalateng rubodem atí imape idumílo, rutode taro ayanpe taroko dorpe aido, delokke taro simangde bíkkepe iyé.”