Read Alladian GÍLEN KUNAM 22 Bible Online

GÍLEN KUNAM 22 - Alladian bible

GÍLEN KUNAM 22

¹“Ami akone gooruko, demamílo mérko pyoola, dem mokala demangkom kola iyémílo, gooru delok ayanpe gooru pilngoko demangkom, mér delok ayanpe mér pilngoko dorkupe aiyé. Doppyoonade pyootonam delokke edoeme bikupe aiyé. Bíkkíng atí kamamílo, pyoonam delokke adupe bím abílpe kope aido.

²Doppyoonakonem, yoh kaamolo pyoongadungem mokayémílo, dekepe mokanadem petnam delok legape atí ajéng imayé.

³Idola dekena agérde, doonyi saarongem iyémílo, bíkkíng petnam ajéng kayé.

⁴Pyoona delok pyootonam gooru, gado, mér, demangkom sobén atíem turdope paayékumílo, pyoonade atel legape annyiko dortemkupe aiyé.”

⁵“Ami akone bíkke taro kídíem aríklo, demangkom baarilo dotagoomo dungem, dekede rulla gígoola, akon arík lokke ali-ayéem dobila iyémílo, bí agíke alilok demangkom baarilok dobinam aduem bikupe aiyé.

⁶“Ami akone agí aríklo eme rídungem, emede ííng pasum kídílok gula akon aríklo guala, akonke duuna aam kídíem demangkom kumnam kídíem gubiyémílo, delok aduem rílíknade dorkupe aiyé.”

⁷“Ami akone agíke abalem, demangkom sérangem aipe mebidope emla, kumríem birongem, dekeme kumrí delok doppyoola, idokom pyoonadem umto emmílo, pyoonade aredeme annyi arepe dortemkupe aido.

⁸Idola pyoonadem gagmayémílo, erangde Shédíme kumsukolo bík alage deedudí-deemadí dem lengkannape dagape aido.

⁹“Ekuserang lumín piyyalo, goorulai, gadolai, mérlai, ege-galuklai, ingkona sérangko nyokkadí, piyya bosuna annyide kebang keralo lukanpe aido. Kebange sékome imemto emla lengkan yédí, bí annyi arepe amikon dem dorkupe aiyé.”

¹⁰“Amikone agíke gadoem, gooruem, mérem demangkom taro atíkonem, bík kumríem aiyope kaabomdope bíro delo melíkname delo de sila demangkom tarí-tape gela, demangkom sékote kaamadungem, bonyok bomyékumílo,

¹¹bínyike piyyadem, kumríde akon sérang teyolo, alage ugamang emla RUUTUMke keralo pésula kebang dem luyinyé. Tarodem pyoomang emla kénlen rodem, atode nyoknamem togepe aido delokke akonde dormayé.

¹²Idola tarodem kumríde doppyootumílo, bí aredem dorpe aido.

¹³Tarodem monkíre rekkatomílo, bí monkír dongongdem langa langkula, lengkanpe aido, delo bí atí dormayé.

¹⁴“Ami akone, bík kumrílok taro konem narla yéborongem, tarode tarí-tape kala demangkom sila, ato lokke kaamaduem depe imílo, amide are bipe aiyé.

¹⁵Idola taro delokke depe idungem atoe kaamílo, narnade dormayé, kapeila tarodem nardo delo narre binamde, delokke ajéngem ikapsuyé.”

¹⁶“Amikone nyameng tatmang adanam mimum konem míílumla, ketbo-dobo suyémílo, bí nyameng areem bila mimepe bompe aido.

¹⁷Idola mime delokke abude, mimedem bommomayé míloteng, bí abudem nyameng are kísanako bipe aido.”

¹⁸“Jadu-montrong ina mimem turmomapeka.

¹⁹“Sékodí tarolo deemang-amo ibosuyéne dem mokalangka.

²⁰“RUUTUMke kékonlo abíd uyulo ipak aman binem nyokmo langka.

²¹“Mibo-miyingem iréémapeka, kapeila nolukom Ijiptlo mibo-miyingpe yéto.

²²Mime meyéng emla, ane-abu kamana ome-uem iré-inyomapeka.

²³Nolu depe iyémílo, edílo bulu ngokkíng iguldope kabbi suyédí, RUUTUM ngo buluke kabbi sunamem arope tatyé.

²⁴Ngo marla nolum mimaklo petpakyé, delo noluke mimekom meyéngpe iyéku, delokke noluke ome-oo kídíekom abu kaimayé.

²⁵“Nolu ngok opanna ami akonlo, abalem bipoyemílo, bipona ami kísape are laatem mapeka.

²⁶Nolu akonke ege-galugem bondokpe laapong yémílote doonyi uamang adape, bíme bilat sulangkuka.

²⁷Kapeila bík amílem ikap sugenana ege-galuk petomde bíkke sérange. Bí kapekísa ege gemape ipyén? Edílo bí ngokkíng kabgu suyédí, ngo bím tatbiyé, kapeila ngo ayane.

²⁸“Noluke Shédíke teyolo, atímana agom pomapeka, delokke agí kebang ruutum teyolokom pomapeka.

²⁹“Noluke kumsung rarung lok, tél tulanglok, ngome aman bipenamem bimape imapeka. Noluke oge yalumnam uem ngom bilangka.

³⁰Noluke gooru-sobén lolang mér loteng dekepe ilangka. Bulume longe kínídko anelo yémín gepo molangka, delokke longe píínyinalo ngom bilangka.

³¹“Nolu ngokke deena amie. Depeila nolu monkír rekpetnam taro adínem domapeka, dekeme ekiilo yobbilangka.”