Read Alladian GÍLEN KUNAM 23 Bible Online

GÍLEN KUNAM 23 - Alladian bible

GÍLEN KUNAM 23

¹“Menam koborem pogomapeka, atímana ami legape menam hakii bimapeka.

²Edílo milunge imemyédí, dekena milunglo gímín gemapeka. Edílo bulu kebanglo agome jonmape menam hakii biyédí, dekenalo menam hakii bimín gemapeka.

³Arééna amiem kebang bangkolo lutu-lurémapeka.”

⁴“Noluk miru lokke gooruem, demangkom gadoem gínyok goodope kaayé míloteng, deme atolo gonga bilangkuka.

⁵Nolum kangkina ami lokke gadoem, eget geramla olet gedupe kaayémílo, dem delo depe kaalíkmape dem igul langka, bím igulmape gíyamkumapeka.

⁶“Kebanglo opan-aréne, ai-kampope kebangem lubidope aabom suyémílo, dekeme ai-kampope kebang lubilangka.

⁷Menam agomlok ainem lujétmapeka. Atí kénmana amiem demangkom, aina amiem simomapeka, kapeila dekepe ina amiem ngo edorayéku.

⁸Sépsu-paasu ato-siro binamem torík sumapeka. Kapeila sépsu-paasupe yiklíknam atode, taniem migma modung, delokke jonna agomem popel modung.

⁹“Mibo-miyingem ipusiléémapeka. Nolu agíe mibo-miyingpe inam séguem kénsudung, kapeila nolu Ijiptlo mibo-miyingpe yétuai.”

¹⁰“Dítak akkélo, noluke arígem ali-ayé ilíkla, isum-sasumla ilangka.

¹¹Idola dítak kíníd nana delo, arígem atí ilík-salíkmape asoope melangka. Delo noluke aradelo opanna kídíe, deke delok dope-tíípenamem paayé, delokke buluke ingong kídíem taro kídíe domín gelayé. Dekepe nolu baarikídí emlang olib ríkséng kídíemte ilangka.

¹²“Longe akkéko nolu agér ilangka, idola longe kínídnana delo, nolu agér imapeka. Depe imílo noluke gooru kídíelang, gado kídíe apééyé, delokke noluke ekum eralo olennam, abíl kídíe delokke mibo-miying kídíke aapí-aange asaryé.

¹³“Nolum ngokke ponam kídíem, airupe ansula igap gelangka. Abíd uyu kídílo kumgomapeka, buluke amín kídíemteng noluke nappang delok mínnamapeka.”

¹⁴“Ngokke legape, dítaklo lengumko adeng-apeme ibosulangka.

¹⁵Siiyé líkmanam ettíngem dobosula, longe kínídko adeng-apepe ibosulangka. Sim Abib poolo lokke moodí paklo ibosulangka. Kapeila so poolo so nolu Ijipt amonglok gílentoku. Ngok keralo aman kamape dagamapeka.

¹⁶“Gatdí-idí adeng apem, noluke aríklo ilíknam ali-ayéme gatlenyém ibosulangka. Dítak gíyin delo, noluke ríkséng lokke siipí-siiyé kídíem isi-sasiyém, ippo pola doman adeng-apeme ibosulangka.

¹⁷Noluke RUUTUM Shédíke keralo, milokong kídí tabunge dítaklo lengumko adeng-ape kídí sim ila kumbo sulangka.

¹⁸“Ngokke keralo sobope ipak inam lokke iyyiem lang siiyé kana atoem, amanpe bomamapeka. Ipak ilíktonam taro lokke una adínem, adeng-apeme idung yaryar delo roh loope melíkmapeka.

¹⁹“Noluke arík-anam lok len-ge yalumna, gaina ali-ayém, RUUTUM noluke Shédíke ekumlo, toodí yaamo takamlo bomyar aalangka. Anyun tíídung adana mér ngangem keemapeka.”

²⁰“Kaatola, ngokke irungko among delo nolum gíbola, bedung-bedalo nolum kaabom dope, noluke keralo ngo agí kotoki konem megelíkyé.

²¹Bíkke ponamem aipe tatbila, bík pokampe ilangka. Bím nolu akmín lumín sumapeka. Noluke akmín lumínem bí tatsammayé, kapeila ngokke amíne bíkkíng kadung.

²²Bíkke ponamem nolu airupe tatgap yémílo, delokke ngokke ponam tabungem igeyémílo, ngo noluke miru kídíke mirupe ila, nolum akna kídíem ngo akyé.

²³Ngok kotoki bí noluke keralo gígela, nolume Amorit, Hittit, Perijjit, Kanaanite, Hibit delokke Jebusit ami kídíke amonglo aabola, ngo bulum petnyok nyokyinyé.

²⁴Buluke uyu kídílo lebíng kooníngla, bulum kumsumapeka. Delokke buluke ayon kídíem igemapeka. Nolu buluke kumnam líídung kídíem dempénla dekedem bénpak bilangka.

²⁵RUUTUM noluke Shédíme kumlangka, delo ngokke utepooroe, noluke asi tíngko lolang donam dokolo kayé. Noluke pénsam lok ngo kinam-ramnamem laabínyé.

²⁶Depe ikolok noluke amonglo, sékote koo okolo atímang ipaasula, demangkom negenpe ila ina kamayé. Ngo nolum aipe yénamem ruubiyé.

²⁷“Noluke kerang keralo, ngo akén-ayén yimanam peso-reyubem megeyé delokke noluke gírík sunam opín-buang tabunglo, ngo míngkén-míngo yimape imoyé. Ngo noluke miru takamem ngéélat sumo langkula dukyin moyéku.

²⁸Ngo noluke kerang kerape mamam sunam pesoem megelíkla, Hibit, Kanaan, delokke Hittit kídíem, noluke bedang gítíng lok monpak biyé.

²⁹Idola bulum ngo dítak atello monpakmayé. Kapeila depe imílo, amongde ronggam aloola, monkír-tangkíre nolum bojéyayé.

³⁰Anyong-anyope noluke keralok, ngo bulum monpakyé. Delo nolu parla among tabungem yébomlayé.”

³¹“Ngo noluke among rísuem, Silíng Siyéng lokke ila Philistain Siyéng [9] loope, yépol mooruk lokke ila Euphrates korong loope ilíkmoyé. Among kídí so duuna ami kídíem noluke alaglo ngo melíkyé, delo nolu bulum noluke keralok monpakyé.

³²Nolu bulukíng daapong dobo sumapeka, delokke buluke uyu kídí lote dekepe ibo sumapeka.

³³Bulum noluke amonglo duumomapeka, demamílo bulu nolume, ngokke keralo paab imoyé, kapeila buluke uyuem kumsunamde nolume etku-edape batjém yéku.”