Read Alladian GÍLEN KUNAM 24 Bible Online

GÍLEN KUNAM 24 - Alladian bible

GÍLEN KUNAM 24

¹Delok rongem RUUTUMbí Mosime poto, “Aaron nonyi lang Nadab, Abihu, delokke miro íying kínídko Israellok, ullenla ngokkíng dííte so saalangka. Nolu anyongko moodogamlo, saadung adape gubla kumsulangka.

²Abíd kídíe anínlo aamape, Mosi no petom RUUTUMke keralo dagalangka. Ami kídíde nokkíng saamín gepe aimang.”

³RUUTUMke lulígnam takam demlang, idongem ami kídí delo Mosi gílang kula pobi rongkudem ami tabungde, “RUUTUMke ponam tabudem ngolu iyé,” emla agom atelpe bulu elíkto.

⁴Delo RUUTUMke poyilnam tabung dem, Mosibí atla mesingto. Rodem rokompe bí darepla, dííte lebe delo rungguko píla, delo Israelke opín íying kolang annyiem lengkan genanape, líídung gaang íying kolang annyiko dííto.

⁵Delokrongem bí yaamé kooem lulígla, bulu romnam amanem romlíkla ashéng amanpe rupangem palíkla RUUTUMkelo ipak ilíkto.

⁶Mosibí iyyi ayokonem damalo mesingla, ayokonem runggu delo kuujé líkto.

⁷Depeila bí daapong kitab dem ami kídar delo rikan bito. Delo milude, “RUUTUMke poyilnam tabungem ngolu igela bík agomem tatyé,” emla elíkto.

⁸Delo iyyidem Mosibí laala, milung delo kungkat godola poto, “RUUTUMke lulígnam agom kídí ségupe, simoko daapong lokke iyyie.”

⁹Depe irongem Mosi lang Aaron, Nadab, Abihu delokke Israel kídíke miro íying kínídde dííte delo saato,

¹⁰delokke Israelke Shédíme kaato. Bíkke ale rumkíng delo taleng telok kísa deename ila yasanna Sapphir elínglok monam bedang kísana kope kaado.

¹¹Idola Shédíbí miro kídar dem mokamato. Bulu Shédíme kaato delokrongem bulu dobo-tííbo sula ito.

¹²RUUTUMbí Mosime poto, “No dííteso, ngokke keraso resaalangka. Nokke so saarongem ami kídíem luyil-poyil ikenape, ngokke lulígnam ngiitom emla, idong kídíem atlíknam líítam annyiem nom biyé.”

¹³Delo Mosibí igulnape Joshuame tomsula Shédíke dííte delo resaato.

¹⁴Depe saaduem bí miro kídíem pokut suto, “Ngonyike píngkuma tetengem nolu so dooya langka. Aaron lang Hur bínyi nolukíng duumín gedung, iname noluke aralo lumín-manmín atíko kayémílo, bínyikíng anggelangka.”

¹⁵Mosike dííte delo resaarodem doomuge dem ilum bomkai.

¹⁶Delokke RUUTUMke angun-abée Sinai dííte delo bííbomkai. Longe akké kokai doomuge dííte dem bííbomto, delokke longe kíníd nana delo RUUTUMbí doomug arang delok Mosime gogto.

¹⁷Israel kídíe dan, dííte teyong delo eme guduna kísape, RUUTUMke angun-abéem kaato.

¹⁸Delo Mosibí dííte delo reesang dola doomug aralo gíato. Bí dííte delo looying appi kolang yoying appiko duuto.