Read Alladian GÍLEN KUNAM 25 Bible Online

GÍLEN KUNAM 25 - Alladian bible

GÍLEN KUNAM 25

¹RUUTUMbí Mosime lulígto,

²“Ngom aman boma bidope, Israel kídíem polangka. Mipil-miyonge eraprupe, míísat sula aman bomanamem no ngok legape laarík subilangka.

³Bulu kelok sikena aman kídar sim, no laarík sulangka: uun, baldín, Pitol,

⁴yasanna, yamugna delokke yalína, bésorpe monam siipyak enno, delokke sobén amídlok monam ege.

⁵Kampope ere mopala remyakdope ikunam mér ayo, gairupe inam ayo, delokke akasia esing,

⁶sérak legape olib téllok, kumlíkla pídé líknana tél legape, nesi-neyang kuséreng alang, nampo mona legape pakyak,

⁷delokke morí kasumana Oniks elíng lokla, asirna lungguem miri ríneke Ephod lolang angkeng aloplo kyamlík penam legape bomanam ato-siro kídíem.

⁸Ngo ami kídí gooralo duumín gedope, ngokkepe deena tombuko ami kídíem momolangka.

⁹Deena tombu demlang delo duumín gepena ato-siro tabungem, ngokke nom lengkan nampe no ilangka.”

¹⁰“Akasia esinglok bulume 110 séntimitar bodope, 66 séntimitar apepe, 66 séntimitar kedondope sondukko ommo langka.

¹¹Deme uun kotírlok luyu emlang arangem pílum líkla, uunlok etorpe pírgo líklangka.

¹²Sonduk dem joobomnana jongkepe, uunlok kelong kísa pírílpe appiko, mola deme sonduk delokke abe konlo kelong annyiem, delokke abe konlo kelong annyiem pílíkla, appi dem píket elen líklangka.

¹³Akasia esinglok daajonglok mola, dekedeme uunlok pílum líklangka.

¹⁴Delokke kékonlo, daajong annyi dem, sonduk delokke abe elenlo, píket líknam kelong kídílo, jonnampe íkbung líkla leeyin líkmotoka. Sonduk dem daajong delok joobom nadope,

¹⁵kelong kídí delo laalen kumape meyar líklangka.

¹⁶Depe irodem sonduk delo ngokke nom ngiitom lulíg namem atlíkla bipenam líítam annyidem leelík langka.

¹⁷“No uun kotír loge 110 séntimitar bodona, 66 séntimitar apena, Ipítna Ayang Dungkengko [10] pílangka.

¹⁸Delokke kampope demjépla uunlok inam Sérubim annyiko pílangka.

¹⁹Sérubim annyidem Ipítna Ayang Dungkeng delo atel kope ibosudope abe elen delo píllík langka.

²⁰Sérubim annyidem, migmue gerík tere sudola Ipítna Ayang Dungkengdem kaasudope delokke, bínyike alapde Ipítna Ayang Dungkeng dem laplum bomla ibomdope ipe aido.

²¹Delokrodem, Ipítna Ayang Dungkeng dem Daapong Sonduk teyong delo ilíkpala, ngokke nom ngiitom lulígnamem, atlíkla bipenam líítam annyidem sonduk aradelo melík langka.

²²Ngo nome delo kaarík-lurík sula, Sérubim annyi pénsamke, Ipítna Ayang Dungko teyo delok, ngo Israel ami kídí legape idong ayon tabungem biyinyé.”

²³“Akasia esinglok 88 séntimitar bodonge, 44 séntimitar ape, delokke 66 séntimitar kedonna tébulko molangka.

²⁴Dem uun kotírlok píkapla, uunlok etorpe abe teyonglo pígo líklangka.

²⁵Delok aradelo, 75 milimitar kope bortak dope, pegona abe kope mela, abedem uunlok etorpe pígo líklangka.

²⁶Delokke joonanape uunlok pírílna appiko, kelong kísape píla tébul delokke ale appi delo píket líklangka.

²⁷Tébuldem jonadope, daajong annyidem íkbung líkkeng kelong kídíde pegoona abe ampeng delo kape aiyé.

²⁸Daajong kídí demte akasia esinglok ila, uunlok pílumpe aiyé, delokke tébul dem delok joobompe aiyé.

²⁹Uun kotírlok ekungem, lukung bottena emlang, alang amanlo tolen-tuang legape, kaglag kídí emlang egug kídíem mope aiyé.

³⁰Tébul dem Daapong Sonduk keradelo leepe aido, delokke tébul teyong delo ngok legape deena ettíng binam amanem leepe aido.”

³¹“Uun kootírlok sérak mekengko ilangka, delokke dungkengem ilíkla, jonna amíldem, demjépnam uunlok mola, delokke appun kísana bati kídí delo, batkeng emla pundope inam appun mimang kídíem, amíl atel kope ilangka.

³²Arot konlo aagem angum-angumpe meko delo ilíkpe aido.

³³Agí delok ilenla aag akké miyoode, batkeng elang punne lekope ila, Almond appun mimangpe ina bati angum-angumpe kape aido.

³⁴Sérak mekeng dete batkeng elang pundope inam, Almond appunpe monam bati appi mimangko kape aido.

³⁵Aag pumsu angum delokke leríng kídí delo, batkengem atel asakko ilíkpe aido.

³⁶Batkeng kídí, aag kídí delokke sérak mekeng kídí agíem, demjépnam uunlok monam ekurang atel kope ipe aido.

³⁷Sérak mekeng delok kerang dan delo angun kadope, sérak kínídko pílíkpe aido.

³⁸Sérak kídídem sépbomna kídí emlang ekung kídíem uun kotírlok molangka.

³⁹Sérak mekeng demlang ato-siro takam dem kilogram íying angum kolang pilngope tebegna uun arolok pína langka.

⁴⁰Dííteso ngokke lengkannam adupakpe, no ato takam dem pílangka.”