Read Alladian GÍLEN KUNAM 26 Bible Online

GÍLEN KUNAM 26 - Alladian bible

GÍLEN KUNAM 26

¹“Ngokke duupeko Tombu ekum arangdem yasanna, yamugna, yalína enno loklang kampope yadnam ennolok, sumyél sunam delokke, Sérubim noksa lok omyél sulíknam botte-bodona gasor íying kolok molangka.

²Gasor ege dem, mitar íying kola annyi bodong pelang, mitar annyi apepe ila, ole takam dem tubue neyi-suyin dope omlangka.

³Gasor pilngokon demte dekepe ilangka.

⁴Omdum sunam delokke luyu tuubu terelo dakyii sudope, yasanna egelok pírílpe omtak líklangka.

⁵Dekena omtage íying pilngoko kerang omdum sunam delo, delokke íying pilngoko méélam omdum sunam delo ilík pala, dem omtak teredem dakrík tereng sumope aiyé.

⁶Raké íying pilngoko uunlok mola, omdum annyidem omtak kídí delok hodumsula abor atelkope ipe aido.

⁷“Tombu ekumdem ikapnadope, sobén amídlok bodo-bortakpe, íying kolang atel ege aborpe omla molangka.

⁸Dekepe dem mitar íying kolang angum bodong pelang, mitar annyi apepe omla, ole neyi-suyinla akampe iyinpe aido.

⁹Abor pilngo kondem abor atelpe omdumsula, delokke abor akké dem abor atel konpe omdum sutoka. Borkéna abordem annyikope pilpala, Tombu keradelo donlangka.

¹⁰Aborkon delokke, luyu tubu tere delo dakyii sudope, pírílpe omtak namem íying pilngoko, delokke dekepe aborkon delote omtagem íying pilngoko omlík langka.

¹¹Raké íying pilngoko pitollok mola, dekedem omtak kídí delo ilíkla, abor annyidem akamna atelkope idokupe kéédum sutokuka.

¹²Ngatboope lenna abor arotkondem, Tombu lokke méélamdanlo dagmotoka.

¹³Sok teyolo séntimitar íying pilngokope, adongpe abor kídí delok ngatna tabungdem, Tombu delokke olekonlo lang olekonlo yobéépe idope tamlíktoka.

¹⁴“Teyong yalumlo tamkapdope, yalípe nunam mér ayolokla, kampope inam sobén ayolok tamkabem ila, lennyi kokai tamlíkdope ilíkpe aido.

¹⁵“Tombu delokke siipangpe Akasia esinglok ilangka.

¹⁶Siipang miyoodem mitar appi bodope, delokke séntimitar íying akké kola akképe apeme ilangka.

¹⁷Siipang kídíde gyabla duuyi sudope, gomríksuna annyi-annyipe ilík langka. Siipang miyoo delo dekena gomrík sunem ilík langka.

¹⁸Tombu lokke sokkodan suppi legape, borying annyiko ilangka.

¹⁹Delokke baldín lok dakpupe íying appiko, siipang miyoo delo dakpu annyikope ila, gomríksuna annyidem gagbomdope ilangka.

²⁰Tombu lokke línggíngdan suppi legape borying annyiko ilangka.

²¹Delokke baldín lok dakpupe íying appiko, siipang miyong delo dakpu annyikope idope ilík langka.

²²Tombu delokke anggodan suppi legape borkéko delokke abe kéényung legape, bornyi-bornyi kope ilík langka.

²⁴Kéényung siipang kídídem, rumkíng lokke lekobosu mola deme teyolope imotoka. Kéényung annyi delokke siipang annyi kídídem, dekepe imolangka.

²⁵Depeila baldín duupue, siipang bortello annyipe ila íying kolang akkéko, siipang abor píínyi delo ilík langka.”

²⁶“Akasia esinglok daabepe íying kolang pilngoko ilangka. Deme Tombu delokke olekon suppi legape pilngoko,

²⁷olekon suppi legape pilngo konem delokke méélam anggodan suppi legape pilngo konem ilík langka.

²⁸Raadang daabe dem siipang kídíke teyonglo raadangpe leedungla, Tombu delokke arotkon lokke ila, arotkon lope tuldope díílík langka.

²⁹Siipang kídíem uunlok pílum líkla, uunlok kelongpe mopala, daabe kídídem gagbom dope ilíkla, daabe kídí emte uunlok pílum líklangka.

³⁰Dííteso ngokke lengkannam ayonpe Tombu dem ilangka.

³¹“Kampope yadnam enno loklang yasanna, yamugna delokke yalína siipyak ennolok sumyél sunam, porda egem sumla Sérubim noksalok omyél sulík langka.

³²Porda kídídem gedope, akasia esing lok gaang appiko laala, deme uun lok pílumla delokke uun gakarlok bulu kelo ilíkla baldín lok, gaang kídídem edíngpe gagbom dope duupeko appiko ilík langka.

³³Porda kídídem arep-areppe, raké pakkengem míílongdan delo ilíknam kídí delo holík líkyin toka. Delokke porda méélam delo, líítam annyiem mekeng Daapong Sonduk dem melík langka. Pordade Deeya Yalumna Alop deme Deena Alop delok ipan subomyé.

³⁴Depe irongdem Ipítna Ayang Dungkeng dem Daapong Sonduk teyong delo mekap líklangka.

³⁵Deeya Yalumna Alop delokke luyu delo tébul deme Tombu lokke línggíng danem gekasudope, delokke sérak mekedem Tombu lokke sokko danem gekasudope melík langka.

³⁶“Tombu delokke aatak dem, kampope yadnam yasanna, yamugna, delokke yalína ennolok sumyél sunam porda egelok ilíkla porda delo kampona moi-muangem omlík langka.

³⁷Pordem kéébomna uun rakélok ila, raké dakkeng asék demte uunlok pílumla, dekedem gedope akasia esiilok gaang pilngoko pitol duupu ilíkla díílík langka.”