Read Alladian GÍLEN KUNAM 27 Bible Online

GÍLEN KUNAM 27 - Alladian bible

GÍLEN KUNAM 27

¹“Akasia esing lok rungguko pílangka. De neyi suyinpe aido. Deme bodongem 2:2 mitarpe, apeeme 2:2 mitarpe delokke kedonem 1:3 mitarpe imolangka.

²Kéényung appi delo patkenna tuubu kadope ilangka. Dekede runggu delo amíl atelpe ipe aiyé, delokke tuubudem pitollok pílum líklangka.

³Metbuem joobín nana ekung, metbu laalen nana lukung, iyyi kuujénana ekung, adín tubnana tabyab kotub, delokke mekol tupnana, deke takamem pitollok pílangka.

⁴Pitollok esap kísanako ila, delokke kéényung appi delo jongkepe pírílna pitol kolok ilík langka.

⁵Esap kísana dem runggu rumkíng delo ilík dola, runggudem anyong kone saabope aiyé.

⁶Akasia esinglok joonana daajong lok ila, dekedem pitollok pílum langka.

⁷Runggu dem jooyéme daajong kídídem, kéényung appi lokke kelong kídílo, íkbula joonadope kelong kídí delo melík langka.

⁸Runggu dem bésorna siipanglok ila arangem ruubung dope melangka, delokke dííte so ngokke nome lengkannampe runggudem pílangka.”

⁹“Ngokke deena Tombu legape, kampona ennolok sumnam porda egelok, baatumko ilangka. Sokkodan lokke egede 44 mitar bodongpe aido.

¹⁰Porda dem pakkenge, baldín lok inam daabe loklang rakélok delokke pitol gaang íying annyi kolang pitol duupu íying annyiko gedope ilík langka.

¹¹Baatum delokke línggíng dan demte deke pakpe ilangka.

¹²Anggodan dem 22 mitar porda ege bodonalok ilíkla, dekedem pakkepe baldín daabe loklang rakélok delokke gaang íying kolang duupu íyingko gedope ilík langka.

¹³Eyab aatak sanggodan demte 22 mitarko bortakpe ipe aido.

¹⁴Aatak delokke arotkonlo 6:6 mitarna porda egelok ilíkla delo duupuem angumko ila gaang angumko díílík langka.

¹⁵Aatak delokke arotkon emte, arotkon delok akampakpe ilangka.

¹⁶Eyab aatak agí deme yasanna, yamugna delokke yalína kampope yadnam ennolok sumyél sunam 9 mitar bodona porda egeko ilík langka, delokke pordadem kampona pooré-appun lok omlík langka. Deme duupu appi kola gaang appiko díílíkla porda dem delo dagmolangka.

¹⁷Baatum dem dunggo bomna gaang kídídem baldín daabelok irík sulangka, delokke buluke raké kídídem baldín lok ila buluke duupu kídídem pitollok ilangka.

¹⁸Baatumde 44 mitar bodong, 22 mitar ape, delokke 2:2 mitar kedonpe aiyé. Porda kídídem kampope yadnam ennolok sumla delokke rumkíng duupudem pitollok ilangka.

¹⁹Tombu delo ilíknam ato-siro tabung dem, delokke Tombudem hokeng petké kídí, delokke baatum dem igo bomna ato-siro tabung dem pitollok píyin líklangka.”

²⁰“Yumdí mipíem nyotbu dope, sérak delokke tél legape, olib esing alangem agínpe bomadope, Israel ami kídíem lulíg langka.

²¹Ngokke kaarík suko Tombu delokke Daapong Sonduk keralo holíknam porda luyu delo, sérak dem melíkla yume lokke ila roh loope gutí dope, Aaron lang bík oo kídíde nyottí líkpe aiyé. Sim idong sim Israel kídíe siirum-siirum loope agínpe ití bompe aiyé.”