Read Alladian GÍLEN KUNAM 28 Bible Online

GÍLEN KUNAM 28 - Alladian bible

GÍLEN KUNAM 28

¹“Nokke aní Aaron melang bíkke oo kídí, Nadab, Abihu, Eleajar delokke Ithamar bulume tomdumsula, bulu ngokke miripe agér idope, bulum Israel kídílok langu sulangka.

²Nokke bíro Aaronme edíí-sirí pelang kampope kaadope miri galukko ibilangka.

³Ngokke iji-sajing dope ruunam agér ina kídíem tomdum sula Aaronke galugeme sumdope potoka.

⁴Bulum sim ege-galuk kídísim ommo langka: Angkenglo gepenam alopko, Ephod ko, ege tayiko, sumnam lukdor kolang dumel gasorko. Aaronla bík oo kídíe gela, ngome agér ibidope, sikena deena miri legape ege-galugem bulu sumla ipe aido.

⁵Ege agér ina kídíe siipyak enno yasanna, yamugna delokke yalína muja enno, delokke uun ennolok ipe aido.”

⁶“Bulu kampope omtak líkla, kampope yadnam enno loklang uun ennolok, delokke siipyak enno yasanna, yamugna delokke yalínalok ila Ephod ko sumpe aido.

⁷Gordung gepu annyiko mola, deme hodum sulanadope Ephod delokke abe elen delo omlík langka.

⁸Kampope ekurang atellok sumnam uugko, Ephod delo amíl atel kope idope omtak líklangka.

⁹Oniks líítam bésorna annyiko laala delo Jakobke oo íying kolang annyi amínem,

¹⁰okor ségupe, adongpe ila líítamkon delo amín akké eme delokke líítam konlo amín akké kondeme atket líklangka.

¹¹Silo kapekísa atket líkdudí, dekepe yogmo monako tomla líítam annyi delo Israelke oo kídí amínem atket langka, delokke líítam abe elen dem uunlok pílumla,

¹²annyi deme Ephod gepu delo ilíkla, Israelke opín íying kolang annyidem lengkan nanape idope imolangka. Sikepe Aaronbí buluke amínem bík gordulo gela delo RUUTUM ngo agíke ami kídíem agínpe míípa suyaryé.

¹³Uunlok gepu annyiko pílangka,

¹⁴delokke uunlok hotkya kísape yadnam lunggu annyiko mola gepu delo pakda sulík langka.”

¹⁵“Shédíke míínamem kénlen dope, miri írne legape, angkelo gepenam alopko ilangka. Deme Ephod em inana, ekurang atellok ilen langka, delok teyolo kampope moi-muang emte omlík langka.

¹⁶De kéényung appie akamla, annyi kope pilla dope bodong emlang apeem 22 séntimitarpe ilangka.

¹⁷Delo gairuna elíng aménalok, adong appiko ilík langka. Kerang adong delo rubi, topaj delokke beril lok ilík langka.

¹⁸Adong annyi nana delo emerald, sapphir delokke daimon lok ilík langka.

¹⁹Adong angum nana delo jasinth, agat delokke amethist lok ilík langka.

²⁰Adong appinana delo khrisolite, oniks delokke jasparlok ilík langka. Deke delokke abe tubu dem uunlok pílík langka.

²¹Israelke opín tabungke amín mimangem gekan sudope elíng aména íying kolang annyi delo Jakobke oo kídí amínem píket líklangka.

²²Angkelo gepenam alopdem genanape rímo kísa yadnam, uun kootír lunggulok molangka.

²³Uunlok kelong annyiko molangka, delokke dem annyidem angkelo genam alop delokke teyong kéényung elenlo píket líklangka.

²⁴Delokke kelong annyi delo, uun lunggu annyiko ilík langka.

²⁵Lunggu annyi lokke tubu elendem, abe lokke adong annyi delo éélíkla dekepe Ephodke gordung gepu kera delo ilík langka.

²⁶Delok rongem uunlok kelong annyiko mola, Ephod kékon delokke angkelo genam alop lokke, rumkíng arang tubulo píket líklangka.

²⁷Uun lok kelong annyiko motem langkula deme kampope sumnam uug teyong delo idasula, elu madope angkelo genam alop delokke kelong annyidem Ephod lokke kelong annyi delo yasanna rímo kolok ngotdum sulangka.”

²⁹“Edílo Deena Alop delo, Aaronbí aayédí, delo Israelke opín tabungke amínem atlíknam, angkelo genam alop dem, gela aape aido, delo RUUTUM ngo, agínpe ngok ami kídíem míípang suyaryé.”

³⁰“Ngokke deena dungko keralo Aaronke aayém, Urim demla Thummim dem bíkke angkelo genam alop delo ilík sula gela aape aido. Dekepe aayém, Israel ami kídílo ngokke míínamem kénlen dope bí agínpe angkeng lokke alop dem gepe aido.”

³¹“Ephod aradelo aana ege lukdordem, yasanna enno kotírlok sumlangka.

³²Lukdor delo dumponge aadope, arungko kape aido, delokke arung abe kídíem bétmadope omyét líklangka.

³³Lukdor rumkíng abe delo yasanna, yamugna delokke yalína ennolokla gaipe yadnam ennolok dalim ayépe tulíkla apí-arí idope uun gontilok bilgodope ombí-omyél sulíkpe aido.

³⁴Abe delo ennolok bilgodope dalim kísa tulíkla, delok kékonlo uun lok gonti kísa omlíkla, delo lekoda ennolok dalim kísape tulík langkula ombí-omyél sulík langka.

³⁵Aaronke miri agér iyéme deme gepe aido. Edílo bí Deena Alop delo ngok keralo aayédí delokke lenyékudí, gonti adudem tatpape aiyé demamílo bí siyé.”

³⁶“Uun kotírlok ekungko mola, siillo atket líknam kísape, ‘RUUTUM keepe deene,’ emnam sim atket líklangka.

³⁷Deme dumel keradelo yasanna rímo kolok ngotlíkpe aido.

³⁸Deme Aaron bí dumpolo gepe aido. Depe gemílo, ami kídíe aman bomala bikolo imemname kadagakom, Israel kídíke ngokkepe tolíknam aman kídí tabungem RUUTUM ngo toríksuyé.”

³⁹“Aaron keepe kampona ennolok, lukdorko sumbi langka delokke kampona ennolok dumelko kellangka. Kampona ennolok gasorko sumla deme kamporudope pooré-appunlok omtak líklangka.

⁴⁰“Aaronke oo kídíe kampo-taiyo rupelang edíng-siríngpe idope buluke legape lukdorlok, gasorlok delokke dumluplok ilangka.

⁴¹No ege-galuk kídísim nok bíro Aaron kílang, bíkke oo kídílo gemorongem, bulum no tél pílíkla ordén ilangka. Bulum ngokke legape miri agérlo gérbidope kumlíktoka.

⁴²Buluke legape ugíng lok ila lebíng loope píídope amíl aralo gepenam egelok ilangka. Depe imílo bulu amíl arang mayé.

⁴³Aaron lang bík oo kídíde dekedem agínpe gepe aido. Edílo bulu ngokke dungko Tombu delo aayédí, delokke Deena Alop delo demangkom runggu kerang delo miripe iyédí, bulu amíl araape ikolok simadope, ege kídíem geyarpe aido. Si Aaron kelang bík oo kídíke legape duuyarpena ayone.”