Read Alladian GÍLEN KUNAM 29 Bible Online

GÍLEN KUNAM 29 - Alladian bible

GÍLEN KUNAM 29

¹“Ngome miripe agér ibidope, buluke teyolo ordén agérem sikepe ilíktoka. Atí tarí-tape kamana rubo kolang mérbo annyiko laala,

²delokke atalok laala siiyé hoyél sumape, kék amanpe ila, olib télem hoyélsula, mola delokke tél kadope remyakna séruk ettíngpe ilangka.

³Dekedem aapé kolo mela lekope rubo demlang mérbo annyidem bomalangka.

⁴“Delokrodem Aaron melang bík oo kídíem, ngokke dungko Tombu delokke aatak delo aabola asilok bulum írsu molangka.

⁵Ege-galuk dem laala Aaronme lukdor dem, Ephod arang lokke gasor bodonadem, Ephod agí sudem, angkelo genam alopdem delokke uugdem pillíkla lemo líklangka.

⁶Bík dumpong delo dumel emla atket líknam alop dem ilík langka.

⁷Delok rodem ordén inana tél dem laala, bík dumpo delo pídé líkdola kumlíktoka.

⁸“Bík oo kídíem aabola lukdor kídíem píllíkla,

⁹gasor alop kídíem buluke ugílo ginlíkla dumpong kídí delo dumlup kídíem luplík langka. Sikepe no Aaron melang bík oo kídíem ordén ilangka. Bulula buluke otíng-oyin loope, ngok miri kídípe agínpe bulu agér iyar biyé.

¹⁰“Ngokke dungko Tombu kerang delo ruboem bomala Aaron melang bík oo kídíem, buluke alage rubo tukku delo meda sudope polangka.

¹¹Ngokke Tombu aatak delo ngokke deena kerang delo rubo dem pakalangka.

¹²Rubo delokke iyyi ayokonem laala runggu delokke patkenna tuubu kídí delo, nok lakkénglok ilíkla, abídem runggu leríng delo purlík langka.

¹³Delok kékonlo adín arangem ilumna una kídí emla, ayin lokke gaiyalumna adín emlang katpí annyiemla delokke una kídíem laala runggu delo ngokke legape amanpe romlangka.

¹⁴Idola rubo delokke adínem, ayoem, akii-asalem notko luyulo rompak langka. Depe inamde miri kídíke paab kídíem laabín dope paab ipak amane.”

¹⁵“Mérbo akonem laala Aaron melang bík oo kídíem delokke tukku delo buluke alag kídíem leelík molangka.

¹⁶Dem paka geyéla, runggu delokke abe appi delo iyyiem kungkat líktoka.

¹⁷Mér dem tarongpe tekmík langka delokke akii-asal kídí dem arbín langka delokke alemte arbín geyéla tukku delola abíd adín teyolo megeyéla,

¹⁸runggu teyong delo amanpe romlíkpe aiyé. De RUUTUMke airupe míínam emelok romlíknam aríkana amane.”

¹⁹“Tosak líknam mérbo kondem laala, Aaron mela bík oo kídídem delokke tukku delo, buluke alag kídíeme leelík molangka.

²⁰Deme paka geyéla delokke iyyi ayokonem laala, Aaron kelang bík oo kídí ruubík ruutínglo mollíkla, lakbík lakne kídílo mollíkla delokke lebík lene kídílo mollík langka. Depe irodem, runggu delokke abe tuubulo, ingonam iyyi kídíem kuujéng líktoka.

²¹Runggu delo duuna iyyi ayokonem laala delokke ordén inana télem laala, dekedem Aaron kela bík oo kídíke ege-galuk delo kungkat líklangka. Depe irong delo bíla bík oo kídíde delokke buluke ege-galuk kídí tabude, ngok kepe ordén nampe iyé.

²²“Mér sokke una kídíem, tamé lokke unem, adín arang lokke una kídíem, ayineme dunggona unem, katpí annyi lokke unem delokke lebík letík em gatbín langka. (Si mér lok ordén iname.)

²³RUUTUMke keralo melíknam aapé delo duuna siiyé kamana ettínglok apíngko, tulang lok inam kék amanko delokke remyakna séruk ettíngko laala,

²⁴dem takam dem Aaron kelang bík oo kídí alaglo melígla lenggola, leesak amanpe imotoka.

²⁵Delo no buluke alag delok laalangkula, romnam aman teyolo, runggu delo romtem langkula, RUUTUMke keralo nampodope ilangka. Si emelok RUUTUM kíng aman biname.

²⁶“Aaronme ordén igape mér delokke angkeng adín dem laarongem, deme RUUTUMke keralo lenggola, leesak amanpe imotoka. Sidan noluke dopename.

²⁷“Miri kídíem ordén inana mér letíg emla lenggonam angkeng adínem ngokkepe tolíkla bilangka.

²⁸Simoko Aaronla bík oo kídí legape, agínpe paapenam taronge. Si Israel kídíke ashéng aman lokke bidum supenam taronge.”

²⁹“Aaronke deena ege-galukde, bík sirongem bík oo kídíem ordén irongem geyar bompename.

³⁰Bím miripe itítna oode ngokke dungko Tombu delo aala, Deena Alop delo agér iyayém longe kíníd kope dem ege-galuk dem gepe aiyé.

³¹“Aaron melang bík oo kídíem, ordinéson inana mér delokke adínem deena alop kolo keelangka.

³²Ngokke dungko Tombu aatak delo Aaron lang bík oo kídíde, mér delokke adínem dola aapé delokke ettíngem dope aido.

³³Bulu ordén ila kumlíkla ido delo ipít kunam agérlo ilíknam adínemte dope aido. Idola dekede deena atope itoname sékote domín gepe aimang.

³⁴Ordén inana mér adínem demangkom ettíngem dongonamko rookon lote kayémílo, dekedem rompak langka. Dekedem dope aimang kapeila dekede deena ekurange.

³⁵“Sikepe no, Aaron melang bík oo kídílo, longe kíníd kope ordén agérem ngokke pokampakpe ilangka.

³⁶Loodí mipí delo paabem ipak sudope, amanpe ruboko dada sobope palík langka. Si runggu dem ardémoyé, delok rodem deme deemope tél lok pílík langka.

³⁷Longe kínídko runggu dem kumlíkla, delokke ipít agérem ilík langka. Depe irongem runggude yagorupe deeyé, delokke ingkuedí delo ugyédí, deke dete deeyé.”

³⁸“Loodí mipíem nolu agínpe, sike sim amanpe runggu delo bilangka; dítakna mérbo annyiko,

³⁹akonem roeme delokke akoneme yume kamo momí-rorílo.

⁴⁰Kerangke aman bigenam mérbo delo olib tél lok litar kolo kampope ínam ettíng kilogram kolo hoyél sula bitak sulangka. Amanpe onggur alang litarko purpakpe aiyé.

⁴¹Yume kamo momí-rorílo, mérbo kondemte sobope palíkla roh delokke ikampakpe télem, ettíngem delokke onggur alang amanem ilíkpe aido. De RUUTUMke airupe míínam, emelok romlíknam aríkana amane.

⁴²Siirum tabunglo RUUTUMke keralo, ngokke dungko Tombu ekum aatak delo agínpe romnam aman sim ilík langka. Delo ngo Israel kídíemte kaarík sula lupo-manmuem ibosuyé.

⁴³Delo ngo Israel kídí emte kaarík sula iyé, delokke ngokke angun abée alop dem deengkut moyé.

⁴⁴Ngo ngok dungko Tombu demlang runggu dem idéésula delokke Aaron melang bík oo kídíemte ngokke miripe idope idélíkyé.

⁴⁵Delo ngo Israel kídí aralo duumín gela buluke Shédípe iyé.

⁴⁶Delo bulum Ijipt amonglok laalenkuna, RUUTUM buluke Shédíbí ngo, emla bulu kényé. Legade ngo buluke aranglo duumín gelangkai. Ngo mino RUUTUM buluke Shédíbí.”