Read Alladian GÍLEN KUNAM 3 Bible Online

GÍLEN KUNAM 3 - Alladian bible

GÍLEN KUNAM 3

¹Longe konem Mosi bí, Midian lokke miripe ina, bíkke ato abu Jethro ke taro kídíem kaabom biduem, bí taro kídíem yépol mooruk em gíboola Shédíke dííte Horeblo pííto.

²Delo pasum kolo Shédíke kotokikone, eme meyope dorlenla, bíkke keralo lengkan suto, delo bí kaatoname pasumde emepe írdo idola pasum dem gumado.

³Delo Mosi agíem posuto, “Ngo elo gíla kaarí-kaanyope kaanam ato esim kangkíyé, kapedí pasum deme gumadone?”

⁴Edílo bíkke kangkípe emla aanamem RUUTUMbí kaatodí, pasum delok Shédí bí bíme, “Mosi, Mosi”, emla gogto. Delo Mosi bí, “Sina ngo,” emla poyan suto.

⁵Shédíbí poto, “Aanín momo mapeka. Nokke leyugem pítbín sutoka, kapeila nokke dakkolde deena moolobe.”

⁶Delo bí poto, “Ngo mino nok abuke Shédíe, Abrahamke Shédíe, Isaakke Shédíe, delokke Jakobke Shédíe.” Delopak Mosi bí agí migmoem ikap suto, kapeila bí Shédíme kaape pesoto.

⁷RUUTUMbí poto, “Ijipt amonglo, ngok ami kídí lokke ankí-kenoem ngo kangkai. Buluke abíl kaabomna kídílok mopít dokupe, kapnamem ngo tatkai, delokke buluke ankí-kenoem ngo mííbidung,

⁸depeila Ijipt ami kídíke alaglok, bulum mopít dope, delokke bulum Ijipt lok laalen langkula, aina bortakna amongpe ina, ingkona among lodí gakír elang ngullange biidudí, dekena Kanaan kídíke, Hittit kídíke, Amorit kídíke, Perijjit kídíke, Hibit kídíke delokke Jebusit kídíke duupom amonglo laangang kupe, ngo tokdung.

⁹Supak Israel kídíke kapnam-rííname ngokkíng píngkai, delokke Ijipt ami kídíke iréénam séguem ngo kangkai.

¹⁰Depeila supak gílang kuka, Ijipt lok ngok Israel ami kídíem, laalen dokupe ngo nom Pharaohke keralo melíkdung.”

¹¹Idola Shédíme Mosi bí poto, “Ijipt lok Israel kídíem laalen dokupe, Pharaoh ke keralo gípena ngo, ngo séko?”

¹²Shédí poyansuto, “Ngo nokkíng yémín geyé, ngo nom melíkdung emla lengkan nana iyode: Ijipt lok no ami kídíem laalen rongkuem so dííte so no Shédíme kumsuyé.”

¹³Mosi bí Shédíme poto, “Edílo ngo Israel kídílo gíla, bulum, nolukíng ngome noluke buku kídíke Shédíbí melík dung emyéne, delo bulu ngom, ‘Bík amíne ingkue?’ emla íímílo ngo bulum kape kísa poyan suyén?”

¹⁴Shédíbí Mosi me poto, “Ngomin Ngo.[1] Israel kídíem no sipe polangka. Ngomin Ngo emsuna bí, nolukíng ngom lulíktung.”

¹⁵Shédíbí Mosi me sikepe poto, “Israel kídíem sipe polangka, ‘RUUTUM noluke buku kídíke Shédí, Abrahamke Shédí, Isaakke Shédí delokke Jakobke Shédíbí nolukíng ngome lulígtung.’ Si agín lokke agínpe duuyarna, ngok amíne. Sok amín sok siirum-siirum loope ngome míípa suyaryé.

¹⁶Gílangka, Israel miro kídíem tomdumsula, bulum sikepe polangka: ‘RUUTUM, noluke buku kídíke Shédíbí, Abraham, Isaak delokke Jakob ke Shédí bí, ngome lengkan sula poto, “Ngo nolume kaato, delokke Ijiptlo nolume iréénamem kaayinkai.” ’

¹⁷Dekepe ila, nolume Ijipt lokke ankí-keno adír kolok laalen langkula, gakír elang ngullange biingko, Kanaan amike, Hittit amike, Amorit amike, Perijjit amike, Hibit amike delokke Jebusit ami kídíke amonglo langaang dokupe ngo pésudung.”

¹⁸“Israel miro kídíe nok agomem tatyé. Delo no lang Israel lokke miro kídíe Ijipt lokke rojalo gíla bím polangka, ‘RUUTUM, Hibru kídíke Shédí bí, ngolum kaarík suto. Ngolume longum bedang gíko yépol mooruk amonglo, RUUTUM ngoluke Shédí kíng ipak idope gímo langka’.

¹⁹Idola Ijipt lokke rojabí, lakbíng ralnam lok bím ijém madem nolum gímo mayé emla ngo kéndung.

²⁰Depeila ngok agí alage laktar dola, Ijipt ami kídílo, irisinyo tabungem ilíkyé. Depe irongem bí nolum gímoyé.

²¹“Delokke ngo, Ijipt ami kídíem noluke teyolo kumsudope imoyé. Depe ikolok edílo nolu gílen yékudí, nolu alag arangpe gíkumayé.

²²Israel lokke mime kídíe, Ijipt kumrí mime kídílo delokke bulu kelo duumín gena mime kídílo gíla, bulu kelok ege-galuk, uun, nogdi, lunggu atíem koyé. Israel kídíde deke takamem buluke ome-oo teyolo ilíkla, Ijipt lokke miremem lííla joobomyéku.”