Read Alladian GÍLEN KUNAM 30 Bible Online

GÍLEN KUNAM 30 - Alladian bible

GÍLEN KUNAM 30

¹“Nampona aríem nyotdope, Akasia esinglok rungguko molangka.

²De neyisupe bodong elang apee 45 séntimitarpe, delokke kedone 90 séntimitarpe ipe aido. Kéényung appi delokke patkoona tuubu kídíde, amíl delo atel kope ilíkpe aiyé.

³Teyong emla abe elen delo, uunlok etorpe pígo líklangka.

⁴Delokke legape joonana kelong annyiko uunlok etorpe iko rumkílo, delokke abe elenlo píket líkla deloge daajong lok deme joobom nadope ilangka.

⁵Daajong kídídemte akasia esinglok ila, uunlok pílum langka.

⁶Sim runggu sim Daapong Sonduk keralo donnam porda luyu delo melíg langka. Delokke dungko delo mino ngo nolum kaarík suyéne.

⁷Rodíke Aaron ke sérak dem isi-simope aayém, delo bí nampona arínem nyotlíkpe aido.

⁸Kaamo momí-rorílo, bíkke séragem nyotkupe emla aayékuemte, nampona arínem nyotlíkkupe aiyé. Sikepe nampona arídem memit mape agínpe nyotyar bompe aiyé.

⁹So runggu so lutumnam abíd arínem nyotmapeka delokke romnam aman ilík mapeka, demangkom ali-ayé amanem ilík mapeka. Delok teyolo, onggur alang amanem tojé líkmapeka.

¹⁰Aaronbí dítaklo letelko, paab ikut legape sobo palíknam taro delokke iyyiem, runggu delokke tuubu appi delo kuujélíkla, runggudem deebín mope aiyé. Sikena agérem dítak mipíke agínpe iyarlangka. Si RUUTUM kepe deenarung atoe.”

¹¹Mosime RUUTUMbí poto,

¹²“Edílo no Israel ami kídíem kanggoyédí, delo mipil miyonge hanyéme RUUTUM kíng bíkke balulem, bíkke yénam ayanpe bipe aido. Depe imílo nok hanyéme sékoke lokom atung-aréée aamayé.

¹³Hanko so hanlíknam miyode, kebangke tolíknam tebeg begdupe abalem bila, RUUTUM kíng aman bidongem bilangka.

¹⁴Dítak íying annyina, delokke teyona ami hannam miyode, RUUTUM kíng aman bigíng sim bipe aido.

¹⁵Buluke yénam ayanpe bidongso, mireme biban yamayé, delokke opane anyoyape bimayé.

¹⁶Israel ami kídílok abal sim ulla ngokke dungko Tombuem kaabom-tatbom kolo koros ilík langka. Si RUUTUMke keralo Israel kídíke míngge penam balule. Delokke sok ayanpe RUUTUMbí bulum kaabomyé.”

¹⁷RUUTUMbí Mosime poto,

¹⁸“Pitol lok ekung bottenako ila, dakkeng emte pitollok ilangka. Deme ngokke dungko Tombu keela runggu pénsamlo melíkla asilok purbí líklangka.

¹⁹Aaronla bíkke oo kídíe ale-alagem delok asi deloge,

²⁰buluke ngok dungko Tombulo aayém demangkom runggulo aman romlíkpe gíyém arbínsupe aido. Depe imílo bulu simayé.

²¹Bulu simadope, buluke ale-alagem arkut supe aido. Sim idong sim bulula, buluke oten-siirek loope agínpe iyar gepe aiyé.”

²²RUUTUMbí Mosime poto,

²³“No nampona gairuna nesi-neyang kuséréngem kilogram akkéko, kosana mirrh alanglok kilogram angumko, nampona siri-porilok kilogram angumko, nampona sondon esing alopko,

²⁴delokke kilogram akkéko téjpat lok, kebangke tolíknam adupe laadum sula, dekedeme litar appiko olib téllok pítem líkpala,

²⁵hoyél sula, namponape imodola pídé líknana télpe ilangka.

²⁶Tél delok ngokke Tombuem, Daapong Sondugem,

²⁷deena tébul demla delokke ato-siro tabungem, nampona nyotlíkko runggudem,

²⁸aman kídíem romlíkko runggu emla, delokke ato-siro tabung dem, delokke arbín supom ekung demlang, dakkeng dem pídé langka.

²⁹Dekepe tolíkla ilíkmílo, ato takamde deena ekurangpe iyé, delokke ingkue delo ugayédí dekedete deeyé.

³⁰“Depe irongem Aaron melang bík oo kídíem pídé líkla, ngokke miripe idope kumlíklangka.

³¹Israel kídíem sipe polangka, ‘Siirum-siirum loope ngok agérlo si pídé líknana télpe iyé.

³²Sim no momem amilo, purlíkpe aimang. Delokke sok akampe, no angu télkon koteng pímapeka. Si deene delokke, sim no deenarupe míngge langka.

³³Séko amie dín, sok tél sok kísa angukon télem píyéne delokke miri kékonlo, amikon kolo purlík yédí, bíme ngok amikon kope hanyimayé.’ ”

³⁴RUUTUMbí Mosime poto, “No akam pakpe nampona nesi-neyang kuséréng: istakte, onikha, galbanum delokke deena pakyak lok laadum sula,

³⁵bulume nampona atokope ilangkuka.

³⁶Dekedelok alop konem paudarpe tummíkla, ngok dungko Tombu delo bomala, Daapong Sonduk keradelo melíklangka. Sim nampona atosim deena ekurangpe ibom langka.

³⁷Nok agí sukepe, sikena télem, sikepe ikam pakpe ilen sumapeka. Sime RUUTUMke ekurange emla deenarupe mííbi langka.

³⁸Séko sékodí agí legape sikena nampona télem ilen yéne, dekedem ngok amipe ngo hanyimayé.”