Read Alladian GÍLEN KUNAM 31 Bible Online

GÍLEN KUNAM 31 - Alladian bible

GÍLEN KUNAM 31

¹RUUTUMbí Mosime poto,

²“Kaatola, ngo Judah opín lokke Hurke oten, delokke Uri ke oo Bejalel me ullento.

³Ngo bíme mistri agér ato-siro kénjing-kénma dope kénnamem Shédíke Aidlok ruulíkto.

⁴Bí kampo tatpope uun agérlo, baldín agérlo, delokke pitol agérlo iji-simadope delokke,

⁵elíngem gatjila, ruujila, esing agérlo iji-simala delokke dekena ato-siro tabunglo ai-kampope ijingdope kénnamem bilíkto.

⁶Sok teyong so bím igul dope, Dan opín lokke Ahisamakh ke oo Oholiab me ullento. Sok kékon loote, ngokke nom políknam tabungem iyin dope abíd mistri kídí looteng ijiinam séguem ruuyin líkto. Bulu sike takam sim ilayé.

⁷Ngokke dungko Tombu dem, Daapong Sonduk demla Ipítna Ayang Dungkodem, Tombu delokke ato-siro tabungem,

⁸tébul demlang delokke ekurang kídíem, uun kootírlok pínam sérak mekeng demlang, delokke ato-siro tabungem, namponem nyotko runggu,

⁹aman kídíem romko runggu demlang delokke ekurang kídí, ekung demlang dakkedem,

¹⁰delokke miri agér iyém gepenam Aaron kelang bík oo kídíke deena ege-galuk kídí,

¹¹pídé líknana tél, delokke Deena Alop delok legape nampona ato, sim tabung sim iyéme, ngokke nom lulígnam adu pakpe bulu ipe aido.”

¹²RUUTUMbí Mosime lulígto,

¹³Israel kídílo sipe polangka, “Nolu ngokke Sabbath em nyolangka. Nolum deedope ina, ngo RUUTUMbí, emla nolu kéndope delokke, siirum-siirum loope noluke lang ngok pénsamlo lengkan nana iyodpe si nyonam si iyaryé.

¹⁴Sabbath sim nyolangka, kapeila nolukepe si deena longe. Sékodí sime nyomape iyéne, bím mokape aido. Sékodí so longe so agér iyéne, deme Israel ami konpe hanyimapeka.

¹⁵Longe akkéko agérem ilangka, idola longe kíníd nasi apéédí Sabbathe, RUUTUM kelo deene. Depeila sékodi Sabbath longelo agér iyéne, bím mokape aiyé.

¹⁶Israel kídíe siirum-siirum loope, iyar bomnam Daapong ayonpe nyoyar bomlangka.

¹⁷Si ngokke lang Israelke pénsamlo, agínpe duuyarpena iyode, kapeila longe akkélo RUUTUMbí taleng emla amongem pílen geyéla longe kínídnana longe delo bí agér imape apééto.”

¹⁸Edílo Sinai dííte delo, RUUTUMbí Mosi kíng lupoem poyintodí, Shédíke agísu lakkéng lok ngiitom lulígnamem, atket líknam líítam annyidem bím bito.