Read Alladian GÍLEN KUNAM 32 Bible Online

GÍLEN KUNAM 32 - Alladian bible

GÍLEN KUNAM 32

¹Edílo ami kídíde, Mosibí dííte delok oikumape adol along líkkai emla kaatodí, bulu Aaronme gargo bomla poto, “Ngoluke kerangem gíbodope ngolum uyu mimangko píbi langka. Ngolum Ijiptlok gílen bokuna Mosi keepe, bí kape ikadí ngolu atí kényi kumang.”

²Aaronbí bulum poyan suto, “Noluke mime, ome-oo kídíke nyorulo, genam uun tekbang kídíem laala, ngokke so bomalangka.”

³Delo ami takame buluke uun tekbang takamem Aaronke keralo bomdum suyin bito.

⁴Bí buluke bomdum sunam kídídem laadum sula, yolla, píkeng kolo toodum sulangkula deke delok ruo mimang kope moto. Depe irodem ami kídíde pobo suto, “Israel kídía, simino ngolume Ijiptlok gílen bokuna shédíe.”

⁵Delok rongem Aaronbí ruo mimang kerang delo, rungguko píla pokanto, “Nyampo RUUTUM keepe adeng-ape longe kope iyé.”

⁶Longe kondem rokompe ami kídíe darepla, romnam aman soboem pala, delokke ashéng amanem bomdum suto. Méélamdem bulu doman ila, dobo-tííbo sula, ashéng paksong ila tíngír-dobat suto.

⁷Delo RUUTUMbí Mosime poto, “Ijipt lok nokke gílen bokunam ami kídíe, atímape paab ikai. Iname, no menape toklat sulang kuka.

⁸Ngokke bulum lulígnam agom-aangpe imape, bulu menarupe ipéésukai, delokke bulu uunlok romla ruo mimangko píla, deme sobo amanem ilíkla, kumsula sikepe manbo sudung, ‘Israel kídía, simino ngolume Ijiptlok gílen bokuna ngoluke uyue.’

⁹Si ami kídísi edítko aapí tolneke, deme ngo kangkai.

¹⁰Supak ngokke marname bulukíng kala, bulume nyokmodope, ngokkíng petom mebít líklangka. Delo nom ngo botteruna opín kope imoyéku.”

¹¹Idola Mosibí, RUUTUM bíkke Shédíme roguto, “E RUUTUM, nokke botteruna ralnam lokla pauarlok, Ijipt amonglok ipít lenkunam, nokke ami kídí teyolo kape no siddípe markan?

¹²Kapeila Ijipt ami kídíem, ‘Bí tani among sok bulum nyokyin mope emla, atímana aapí gela, dííteso petnyokpe emlamin laalen tokune,’ emla lupu-lulé agomem pomoyén? No yagope marmapeka, no aipe míísi-míímo sula, nok ami kídí teyolo itung iréem boma mapeka.

¹³Nokke agér ibina, Abraham, Isaak delokke Israelme míípa sutoka. Buluke otíng-oyinem takar kísa milung-mola, nokke pébi sunam amongem bulu agínpe yéyar bomdope emla, buluke teyolo nok agísu pésunamem míípa sutoka.”

¹⁴Delo RUUTUMbí aapíe míísi-míímo sula, bíkke itung-irépe emla ami kídí teyolo míínamem bomamato.

¹⁵Ngiitom lulígnamem arot annyi lokai atlíknam líítam annyidem bomla dííte delok Mosi oitoku.

¹⁶Shédí agísue líítam annyidem mola, lulígnam ngiitom kídíem delo atlíkto.

¹⁷Edílo Joshuabí ami kídí delokke érla, ngomla inam adud-ayudem tattodí, bí Mosime poto, “Notko belo mimak adude muudung.”

¹⁸Mosi bím poyan suto, “De mimak ikum adudmang delokke ikum kosunam adud petemang. Be miri lunam adude.”

¹⁹Edílo Mosibí notko abelo píílang kula, ruo mimang demla paksong soonam dem kaatodí, bí marla dííte lebe delo líítam annyidem elletla dírmíkto.

²⁰Bí ruo mimang demte laala emelo romlíkto, depe igeyéla deme paudarpe nyotmíkla, asilo hoyél sulíkla Israel ami kídíem tíímoto.

²¹Bí Aaronme luto, “Sikena botteruna paabem no ibodope, si ami kídísi nome kape itonamda?”

²²Aaron poyan suto, “No marmapeka. Si ami kídísi edítpe atímana agérem ilíngneke, no dem kénmang.

²³Bulu ngome, ‘Ngoluke kerangem gíbo dope, ngolum uyu mimangko píbi langka. Ngolum Ijiptlok gílen bokuna Mosi emnam ami sim dan, bí kape ikadí ngolu kényi mang,’ emla pokolok,

²⁴ngo bulum uun lunggu kídíem bomadope emla políkla, bulu gena kídíe laasula ngom bidum suto, deme ngo emelo yolmola, si ruo si lenkai.”

²⁵Ami kídíem Aaron bí taaya líkla, bulum tumna kísa séduk mola, miru kídíke ngilkang kaapompe imotung emla Mosibí kaato.

²⁶Depeila bí notko delokke bedang gítak delo dagdola ugla manto, “Séko-sékodí RUUTUM kepe doodune de ngokkíng aalangka.” Delo Lébi kídíe aadumsuto.

²⁷Delo bulum bí poto, “RUUTUM Israelke Shédíbí sikepe podung, ‘Miyonge yoksa gela, notko lokke arotkon lokke arotkonlo, gídung-gítok sula agíke kumrí-donggong emla angong-arumem delokke bíro kídíem moka langka.’”

²⁸Mosike pokampe Lébi kídíde ila, delo longe delo éjar angum kokai amie sikai.

²⁹Lébi kídíem Mosi poto, “Nolu agíke oo kídí simla, bíro kídíem moka kolok silo nolu RUUTUMke miripe idope ingusukai. Depeila RUUTUMbí noluke teyolo bíkke utepooroem ruulíkto.”

³⁰Longe kondem Mosibí ami kídíem poto, “Nolu reyub runam paabem ito. Idola supak ngo lekoda noluke paabem ayala, mepak bidokupe dííte telo resang langkula RUUTUM kíng rogu kíyéku.”

³¹Depe empala RUUTUMkíng Mosibí saalat sulang kula lupoto, “Ami kídar si reyub ruunam paab ito; bulu agísue uun lok uyu mimangko pípala kumsuto.

³²Idola supak buluke paabem ayala mesam toika, depe imayémílo nokke ami kídíem amín atlíknam kitab delok ngok amínem ipak langkuka.”

³³RUUTUMbí Mosime poyan suto, “Sékodí ngok mirupe paab itone, bím min ngok kitab delok ipak yékune.

³⁴Supage gílangkula, ngokke nom popanam moolop delo, ami kídíem gíbo langkuka. Ngok teyong kotokie noluke keralo gígeyé. Idola sim ami kídí sim buluke paab legape itung-irédí moodíe píímílo, bulum ngo itung-iréyé.”

³⁵Depeila bulu Aaronme uun lok ruo mimangem momonam legape, bulu kelo RUUTUMbí itung-iré dope kilii-ramliem melíkto.