Read Alladian GÍLEN KUNAM 33 Bible Online

GÍLEN KUNAM 33 - Alladian bible

GÍLEN KUNAM 33

¹RUUTUMbí Mosime poto, “Ngokke Abraham, Isaak delokke Jakob buluke otíng-oyinem biyé emla, toge sunam amonglo, nokke Ijiptlok laalen kunam ami kídíem gíbola, sok among sok gílen langkuka.

²Ngokke teyong kotoki konem noluke keralo melíkla, Kanaan amiem, Amorit amiem, Hittit amiem, Périjjit amiem, Hibit amiem delokke Jébusit amiem monpak geyé.

³Ngullang elang gakíre bingko amonglo gílangka. Idola ngo agíedan nolukíng gímín gemayé. Kapeila nolu aapí tolneke, delokke ngo nolum bedalo nyokmo lateng iyé.”

⁴Edílo ami kídíde míídírnam agomem tattodí, bulu kapla-rííla, sékote lunggu tadok atíem geyimato,

⁵kapeila RUUTUMbí Mosime poto, “Israel kídíem sikepe polangka, ‘Nolu aapí tolneke, anyong moodí lega peteng, nolukíng ngo gímín gemílo, nolum ngo nyokmo late iyé. Iname noluke lunggu tadogem laabín sulangka, delo ngo kape imíloi emla mííyé.’ ”

⁶Depeila Israel kídíde Horeb díítelo, buluke lunggu tadogem ibín suto.

⁷Israel kídíke notko ipom miyolo, anyongko mooteng gampe Mosibí Tombuko hodungai. Deme RUUTUMke Tombu [11] emdungai.

⁸Edí-edílodí Mosibí RUUTUMke Tombu delo gíatodí, delo ami kídíe agí-agíke tombu keralo daglenla, Mosike Tombu aradelo aama tetengem toyang dungai.

⁹Mosike Tombu delo gíala, delokke RUUTUMke Mosime lupo sudungem, doomug adoode gyangala, Tombu kerang delo dakkap dungai.

¹⁰Tombu kerang delo doomug adoodem dagdupe kaayé tetengem, ami kídíe agí agí tombu keralo dagdula kumsula iyin dungai.

¹¹Tani terenge angongem luposunam kísa, RUUTUMbí Mosime mikmo gerík sula lupo sudungai. Depe irongem Mosibí agí tombusulo aalat sudungkuai, idola igulna yaamé koo Nunke oo Joshua bí, Tombu delo duuya dungai.

¹²RUUTUMme Mosibí poto, “Ami kídísim no gíbo langka emla, no ngome potídung, idola ngokkíng lekope séko meda no melíkyén, deme no ngome kénmomang. No agíe, ‘Ngo nom amínlok kéndung, delokke nokke teyolo ngo airupe míílík dung, emla mansudung.’

¹³Ngo arope nok keralo airupe míílík nampe idumílo, nom ngo kénla, nok keralo agínpe airupe míílík nampe yéyardope nokke ségu-siyangem ngom poyilyika. Si opín si nokke ami kídíe emla míípasulangka.”

¹⁴RUUTUMbí poyan suto, “Ngokke yémín-dakmín gename, nokkíng gímín geyé, delokke nom ngo aapí eetetmoyé.”

¹⁵Delo Mosi bím poto, “Nokke yémín-dakmín gename ngolukíng gímín geyémílo, ngolum soge gílen kumomapeka.

¹⁶No ngolukíng gímín gema tetedem, kapekísa ngo lang nokke ami kídíe, nokke keranglo ayang paadung emla kénsuyén? Kapekísa ngomlang nokke ami kídarem, tani among sokke angu ami kídí keralo kaangu suyén?”

¹⁷RUUTUMbí Mosime poto, “Nokke íngkínam pakdem ngo iyé. Kapeila nokke teyolo ngo airupe míílík dung, delokke ngo nom amínlok kéndung.”

¹⁸Mosi roguto, “Supak nokke angun-abéem ngom lengkanbi.”

¹⁹RUUTUM poto, “Ngo nokke keralo, ngokke aina angun-abéem gímoyé, delokke nokke keralo, ngokke deena amínem polenyé. Ngokke ullennam amilo, ngokke míílen sunam ayang elang ayang yaasamname kayé.

²⁰Idola no ngokke mikmoem kaala mayé, kapeila ngokke migmoem kaala sékote turmayé.”

²¹RUUTUMbí poto, “Lííne-lííreng kolo nokke dakpeko alopko ngokke anín si kadung.

²²Edílo ngokke angun-abée gíyédí, delo ngo nome lííne-lííreng delokke lííbung-língang kolo mela, ngokke nom gíboomang tetengem, ngokke alage nom pikap bomyé.

²³Depe gíbong rodem, ngokke alage ibínyéku, delo no ngokke lamkuem kaapayé, idola ngokke mikmoem kaamomayé.”