Read Alladian GÍLEN KUNAM 34 Bible Online

GÍLEN KUNAM 34 - Alladian bible

GÍLEN KUNAM 34

¹RUUTUMbí Mosime poto, “Kerangke akam kísana, líítam annyiko gatlen langkuka delo ngo, nokke getír tonam líítam annyi delo attuanam agom kídarem atlík yéku.

²Nyampo roem deme iyin-sayinla ipala, Sinai dííte teyong so saalangkuka.

³Sékote nokkíng saamín gepe aimang, demangkom dííteso ami kape aimang delokke taro kídíete dííte lebeso yégope aimang.”

⁴Dekepe RUUTUMke polík kolok, Mosibí kerangke kísana, líítam annyiko gatlen langkula, roh kondem rokomope dííte delo bomsatoku.

⁵Delo RUUTUMbí doomuglok oila, bíkkíng dagbo sula RUUTUMke amínem mínsuto.

⁶Delo RUUTUMbí bíkke keradelo gídola poto, “RUUTUM ngo, agí agomem mesiisuna, ayang mesiisuna, ayang miremna, martu mana, ayang mínsuna, delokke apíípe ayang yaasamna Shédí bí,

⁷ngo agíke pésunamem, éjar-éjar siirum loope mesiisula, paab emlang atímangem mesam bine. Idola ane-abu lokke paab imemem, ome-oo delokke oten siirek angum appi loope edo rakune.”

⁸Delo Mosibí menape among delo gubala kumsuto.

⁹Bí lupoto, “E RUUTUM, arope no ngok teyolo airupe míílík dumílo, ngolu kíng gímín gedope nom rogudung. Ami kídar si aapí-aange toltuakom, ngoluke atímangem lang paabem no mesam bila, ngolum agí amipe torík sutokuika.”

¹⁰Delo RUUTUMbí Mosime poto, “Supak ngo Israel kídílo, daapongko ibosuyé. Buluke keralo sikena botteruna agérko ikanyé, dekena agérem, tani among sokke ingko opín lote ikan kímang. RUUTUM ngokke botteruna agér ikannamem, ami kídí tabunge kaayinyé, kapeila nokke legape ngo yirí-pedínamko ibiyé.

¹¹Siloke, ngokke nom binam ayon kídísime igelangka. Noluke gítílo ngo Amorit amiem, Kanaan amiem, Hittit amiem, Périjjit amiem, Hibit amiem delokke Jébusit ami kídíem monbiyé.

¹²Noluke entíng-gítílo, sok among sokke ingkon amiemkom daapong atí ibo sumapeka. Depe inamko kamílo, noluke legape dekede nolum batjém kupena etku-eda pekom ipelo.

¹³Delokke ayanpe, buluke runggu kídíem dírmík bilangka, buluke kumsu bomnam elíng gaang kídíem itír-iyir langka, delokke buluke mime uyu Ashérahke moi-muang kídíem papak-payak bilangka.

¹⁴“Abíd uyuem kumsumapeka, kapeila nena amín gena RUUTUM ngo, nena Shédíko.

¹⁵Among sokke ami kídílo daapong atí ibo sumapeka, kapeila edílo bulu, buluke mipak uyu kídíem kumsula, sobo pala ipak yédí, bulu nolum yébo sudope ajon jonyé, delo nolu mipak uyulo líknam donam-tíínamem domín-tíímín gela iyé.

¹⁶Noluke oo kídíe mipak mime kídíem mimepe bomla, de mime kídíde bulume ngokkíng míngke sumomadope, buluke uyu kídílo bulume kumbo langkula iyé.”

¹⁷“Arem yongmolok monam mimang uyu atí kummapeka.

¹⁸“Siiyé líkmanam ettíng domanem dobo sulangka. Abib poololo ngokke lukampe, longe kíníd kope siiyé líkmanam ettíngem dolangka. Kapeila so poolo so nolu Ijiptlok gílen toku.

¹⁹“Ane akiilok kerayalumpe ogenam oode ngokke, delokke ekumlo duuna taro lokke oge yalumnam oo tabung dete ngokke.

²⁰Idola opo yalumnam gado oo deme, mér oo ko biyanla ipít lenkupe aido. Nolu deme ila mayémílo alíngem dírlangka. Oge yalumnam oo kídíeme ipít langkuka. “Alag lakraape ngok keralo sékote aamapeka.

²¹“Nolu longe akkéko agér ilangka, idola longe kíníd nana delo apéé langka. Aal gurdí lolang aam gaddí lote apéé langka.

²²“Nolu arík lokke kerayalumpe ali-ayé len-geyém, gaddí domanem ibo sulangka delokke dítak gíyinlo siipí-siiyé isi-sasi yéme ippo pola domanem ibo sulangka.

²³“Dítaklo noluke milokong tabunge, RUUTUM Shédí, Israelke Shédíme kumsu kolo lengumko aape aido.

²⁴Ngokke mibo-miying opín tabungem, noluke keralok monkut rongkuem, delokke noluke among rísuem iban rongeme, noluke dítaklo lengum kokai RUUTUM noluke Shédíme kumsu godolote, sékote nolum mimak iyalína kamayé.”

²⁵“Noluke sobo ipak iyéme, iyyi delo siiyé líknam ettíng amanem biyél sumapeka, delokke Gíbong adeng-ape lokke sobo adínem roh konlo melík mapeka.

²⁶“RUUTUM noluke Shédíke ekumlo, len-gena ali-ayéme boma langka. “Anyun tíína mér demangkom sobén ngangem keemapeka.”

²⁷RUUTUMbí Mosime poto, “Agom kídí sime atlangka, kapeila, agom kídí sok idasula, ngokke daapongem nokkíng lang Israello ibo sudung.

²⁸Mosibí atí doma-tíímape, looying appi kolang yoying appiko, RUUTUM kíng yébosuto. Bí líítam annyi delo, Lulígnam Ngiitom Íying agom kídíem delokke daapong agomem atto.”

²⁹Sinai dííte delok edílo Mosibí, Lulígnam Ngiitom Íyingem atlíkkeng líítam annyi dem bomtokla tokdokuem, bíkke RUUTUMme agom pobosula ikolok, bí atí kénsumape bíkke mikmue angunto.

³⁰Edílo Aaron lang Israel tabunge, bíkke mikmo angunem kaatodí, bulu bíkke anínlo gíape pesoto.

³¹Mosi bulum gogla, Aaron lang opín tabungde delokke ruutum kídíe bíkkíng gíala bí bulum luposuto.

³²Méélamdem Israel tabunge bíkke ayirlo aadumsula, Sinai díítelo RUUTUMke lulígla ngiitom tabung binamem, bí bulum bito.

³³Edílo Mosibí bulum poyin bosutodí, bí mikmo delo gasorko tungkap suto.

³⁴Idola RUUTUMke dungko Tombu delo bíkke RUUTUMme luposupe emla aayé tabungem, bí gasordem gemape, bíkke luyulo lenkumang tabungem bí laabín suto. Edílo bí luyulo lenlang kula bím lulíg namem Israel kídíem pobi yékudí,

³⁵delo bíkke mikmo angunem bulu kaadungai. Delo bí RUUTUM kíng lupo supe emla angkumang tetengem, gasor dem tungkap sudungkuai.