Read Alladian GÍLEN KUNAM 35 Bible Online

GÍLEN KUNAM 35 - Alladian bible

GÍLEN KUNAM 35

¹Mosibí, Israel opín tabungem tomdum sula bulum poto, “Sikesi nolum idope emla RUUTUMke lulígname.

²Longe akkéko agérem ilangka, idola longe kíníd nanade, RUUTUMke keralo deene, apéédí Sabbath longe. Sékodí so longe so agérko iyédí bím mokalangka.

³Sabbath longe so, noluke dungko kídílo eme koteng parmapeka.”

⁴Israel ami takamem Mosibí poto, “RUUTUMbí sikepe lulígdung.

⁵Noluke aralo ingkona ekuserang delokke ato-siroe kadudí, deke delok RUUTUM keepe aman bomalangka. Mipil-miyonge ashéng lok míísat sula RUUTUM keepe; uun, baldín, pitol,

⁶yasanna, yamugna delokke yalína, bésorpe monam siipyak enno, sobén amíd lok monam ege,

⁷kampope ereng mopala remyak dope nukunam yalína mér ayo, gaina ayo, akasia esing,

⁸sérak legape tél, kumlík dola pílíknam tél legape nesi-neyang kuséreng alang, nampomona legape pakyak,

⁹delokke oniks elíng loklang, asirna lunggu kídíem, Ephod lukdorlo omlíknam legapelang, angkelo gepenam alop delo kyamlík legape, bomanam ato kídí tabungem bomlangka.”

¹⁰“Noluke aralo agér ijiina kídar tabunge, RUUTUMke lulígnampe agér idope aadum sudola,

¹¹Tombuem delokke arangemla luyuem tamkap penana ege kídídem, petké kídíem, siipang kídíem, daabe kídíem, delokke gaang kídíem lang leeríng dagpu kídíem,

¹²Daapong Sondugem, daajong kídíem, Ipítna Ayang Dungkengem, hokapna pordaem,

¹³tébul dem lang daajong kídíem, delokke ekurang tabungem Shédí keepe tosak líknam ettíngem,

¹⁴angun dope sérak emlang télem, delokke dakkeng emlang, delokke ato kídí tabungem,

¹⁵nampona romko rungguem lang daajong kídíem, pídé líknana télem delokke nampona ato, Tombu aatak lokke porda,

¹⁶amanem romlíkko runggu demlang, pitol lok esap kísape inam, delokke daajong kídíem lang ekurang tabungem, arbín supom ekungem lang dakkengem,

¹⁷baatum delokke porda kídíem lang dakkeng kídíem, delokke gaang kídíem, baatum lok aatak porda kídíem,

¹⁸Tombu demlang baatum dem hokeng petké, delokke rímo kídí,

¹⁹miri kídarke Deena Aloplo agér iyém kampo-tatpope gepenam, ege-galuk, delokke Aaron kelang bík oo kídíke gepenam, deena ege-galuk kídí tabungem iyin langka.”

²⁰Dekepe porodem Israel opín tabunge gípan suyintoku.

²¹Delokke agom kídídem arope tatla, míína kídí miyoode RUUTUMke dungko Tombu dem mooga pelang, Tombu delokke dormo agérlo gérlík nana ato-siro kídí legape, delokke miri kídíke deena ege-galuk legape aman kídíem bomato.

²²Mime dak milokong dak, erapna tabude aala uun lokke lunggu tadok ato tabungem: kampona pesi koonyingem, nyorung tekbangem, koosiem delokke lunggu kídíem bomala RUUTUM kíng kumlíkto.

²³Kampope sumnam ege, yasanna, yamugna, demangkom yalína ennolok sumnam, sobén amídlok sumnam, yalíng dokupe nukutnam mérbo ayo, demangkom kampona asig-ayo kídíem mipil miyoode bomato.

²⁴Séko buludí pitol demangkom baldín katone, RUUTUM kelo amanpe bomato. Agér ikolo ilík lanam akasia esing bomna kídíeteng bomato.

²⁵Iji-sajina mime kídíe, buluke kampope yadnam enno kídíem lang, yasanna, yamugna, delokke yalína enno kídílok sumnamem bomato.

²⁶Erapna ijiina mime kídíe sobén amídlok enno mola bomato.

²⁷Kebang ruutum kídíe oniks elíng emla abíd moyéknam elíng kídíem, Ephod delo lang angkeng alop delo píket líkdope emla delo bomato.

²⁸Bulu nesi-neyang kuséreng, delokke sérak legape olib tél, delokke pídé líknana tél emlang nampona atoemte bomato.

²⁹RUUTUMke Mosi kíng lulíg nampe, Israel lokke mime-milo ami tabunge, agí-agíke ashéng mííbang supe, amanem RUUTUM kíng boma mayinto.

³⁰Israel kídíem Mosibí sipe poto, “RUUTUMbí Judah opín lokke Hurke oten, delokke Uri ke oo Bejalel me ultung.

³¹Shédíbí bíme, mistri agér ato-siro tabunglo, kénjing-kénmang dope agér kénnamem bíkke Aidlok ruulíkla,

³²bí kampo-tatpope uun agérlo, baldín agérlo, delokke pitol agérlo iji-simadope,

³³sok teyolo, lungguem gatji dope, esing agérlo ijing dope, delokke dekena agér tabulo ruuji-ruumadope ilíktung.

³⁴RUUTUMbí Dan opín lokke Ahisamakh ke oo Ohaliab melang Bejalel bínyime, bínyike kénnamem abíd emkom poyildope kénnamem ruulíktung.

³⁵RUUTUMbí bínyim, píket líkdope kénnamem, ruuji-rumanamem, kampope yadnam enno delokke yasanna, yamugna, yalína enno atílok ege sumnam, delokke abíd ege galuk agér inamem, kénjina kénnamem ruulíktung. Depeila bínyi mistri agér tabung lolang, ato-siro rungkolo, ruuji-rumana amipe ikai.