Read Alladian GÍLEN KUNAM 36 Bible Online

GÍLEN KUNAM 36 - Alladian bible

GÍLEN KUNAM 36

¹Dekepe ikolok Bejalel lang Oholiab delokke ijiinamem lang kénnamem RUUTUMke Deena Tombu dem mokén dope imonam ami tabungde RUUTUMke lulíknam ségulok ato takamem mope aido.”

²Delo Mosibí Bejalel melang Oholiabme, delokke agérdem erappe mííbomna, Shédíke ijingdope ruulíknam kénna ami tabungem tomdum suto.

³Bulu deena Tombu dem modope, Israel tabungke bomanam aman kídíem Mosi kelok paato. Delok teyolo ami kídíe rodípe, buluke ashéng amanem boma mayinto.

⁴Depe irodem, agérlo ijiina, kénna mistri kídíde gíla,

⁵Mosime popato, “RUUTUMke lukampe agér ilík nana atoem ngatbope ami kídíe bomangkai.”

⁶Depe mankolok Deena Tombu agérlo, igul amanem bipo yimadope notko doopom miyong delo Mosibí lutum gotoku. Depeila ami kídíe bomdum supo yimato.

⁷Idolate, edít kodí bomatone, dekede agér tabudem iyinnana penemte ngatyato.

⁸Agérem ina kídí arang lokke, iji-simana ami kídíe, RUUTUMke dungko Tombuem moto. Bulu Tombuem siipyak enno yasanna, yamugna, yalína, delokke kampope yadnam ennolok sumyél sunam delokke Sérubim noksalok omyél sulíknam botte bodongna gasor íying kolok moto.

⁹Gasor egedem mitar íying kolang annyi bodongpe, delokke mitar annyi apepe ila miyoodem akam pakpe omto.

¹⁰Bulu gasor pilngo dem atel kope omdumsula, pilngokon demte dekepe ito.

¹¹Bulu omdum sunam luyu tuubu terelo dakyiisudope, yasanna egelok pírílpe omyét líkto.

¹²Bulu dekena omyédem íying pilngoko méélam omdum sunam delo ilíkto. Depe ipala omyét teredem dagrík tereng sumoto.

¹³Delo bulu uunlok raké íying pilngoko mola, omdum annyidem omyét kídí delok hodum sula, abor atel kope ito.

¹⁴Delokrodem Tombu ekumdem, ikap nadope sobén amídlok bodo bortakpe íying kolang atel ege aborko omto.

¹⁵Dekedem mitar íying kolang angum bodong pelang, mitar annyi apepe omla akam pakpe omyinto.

¹⁶Delo bulu abor pilngo kondem, abor atelpe omdum sula, delokke abor akké kondem abor atel kope omdum suto.

¹⁷Aborkon delokke luyu tuubu terelo dakyiisudope pírílpe omyét namem íying pilngoko, delokke dekepe aborkon delote omyétnamem íying pilngoko omlíkto.

¹⁸Depe irodelo, bulu raké íying pilngoko pitollok mola, dekedem omyét kídí delo ilíkla, abor annyidem ikapna atel kope idope kéédum suto.

¹⁹Bulu teyong yalumlo tamkap dope, yalípe nunam mér ayolok lang kampope inam gooru ayolok ila, lennyi kokai tamlík dope tamkabem ito.

²⁰Depe irodem bulu akasia esinglok Tombu delokke siipangem ilíkto.

²¹Siipang miyoodem mitar appi bodongpe, delokke séntimitar íying akké kolang akképe apeme ito.

²²Siipang kídíde gyapla duuyi sudope gomrík suna annyi-annyipe ilíkto. Siipang miyong delo dekena gomrík sunem iyin líkto.

²³Bulu siipangem sokko danlo íying annyiko ilíkto.

²⁴Tombu delokke dagpupe baldínlok íying appiko, siipang miyong delo dakpu annyikope ila, gomrík suna annyidem gombom dope ilíkto.

²⁵Bulu Tombu delokke línggídan suppi legapete, borying annyiko siipangem ilíkto.

²⁶Delokke dagpupe baldínlok íying appiko, siipang miyong delo dakpu annyi kope idopete ilíkto.

²⁷Tombu delokke anggodan méélam delo siipangem borkéko ilíkto.

²⁸Delokke abe kéényung legape siipangem bornyipe ilíkto.

²⁹Kéényung siipang kídídem, rumkílo leko bosumola deme teyong loope imoto.

³⁰Depeila baldín duupue siipang bortello annyipe ila, íying kolang akkéko siipang abor píínyi delo ilíkto.

³¹Dekepe morong dem, bulu akasia esinglok daabepe íying kolang pilngoko pala, deloge olekon suppi legape pilngoko, delokke

³²ole konke suppi legape pilngo konem, delokke méélam anggodan suppi legape pilngo konem ilíkto.

³³Raadang daabe dem, siipang kídíke teyong raadape leedungla, Tombu delokke arotkon lokke arotkon lope ila tuldope díílíkto.

³⁴Delok rodem bulu siipang kídíem uunlok pílumla, uunlok kelongpe mopala, uunlok pílumnam daabe kídídem gagbomdope ilíkto.

³⁵Delokrodem bulu kampope yadnam enno lokla yasanna, yamugna delokke yalína siipyak ennolok sumyél sunam porda egem sumla, Sérubim noksalok omyél sulíkto.

³⁶Bulu porda kídídem gedope, akasia esing lok gaang appiko pala, dem uun lok pílumto, delokke uun rakélok bulukelo ilíkla, gaang kídídem edíípe gagbom dope baldínlok duupu appiko ilíkto.

³⁷Tombu delokke aatakdem, bulu kampope yadnam yasanna, yamugna delokke yalína ennolok sumyél sunam porda egelok ilíkla, porda delo kampope pooré appunem omlíkto.

³⁸Bulu porda dem kéébomna uun petkélok ila, petké dakkeng asék demteng uunlok pílumla, dekedem gedope akasia esinglok gaang pilngoko, pitol duupu ilíkla díílíkto.