Read Alladian GÍLEN KUNAM 39 Bible Online

GÍLEN KUNAM 39 - Alladian bible

GÍLEN KUNAM 39

¹Miri kídare Deena Alop delo agér iyém, gai-gakona ege-galugem gedope, bulu yasanna, yamugna, delokke yalína ennolok, kampo-tatporupe miri ege-galugem sumbito. Bulu RUUTUMke Mosime lulík nampe dekedem ibito.

²Bulu kampope yadnam enno loklang, yasanna, yamugna, delokke yalína ennolok, delokke uun ennolok Ephodem molento.

³Bulu uunem abyorpe demjépla, deme remiyope adong dope gatla, deme kampope yadnam enno delo lang yasanna, yamugna, delokke yalína enno kídí delo, iyél sudope ito.

⁴Bulu Ephod legape gordung gepu annyiko mola deme hodum sula nadope, Ephod delokke abe teredelo omlíkto.

⁵RUUTUMke Mosime lulíknam adupe, bulu kampope ekurang atellok sumnam uugko Ephod delo amíl atel kope idope omtak líkto.

⁶Bulu oniks líítam kídíem iruula uunlok pílumla, Jakobke oo íying kolang annyi amínem dekedelo atjing-atma líkla atket líkyinto.

⁷RUUTUMke Mosime lulíknam adupe, bulu Israelke opín íying kolang annyiem lengkannana ayanpe, amín atket líknam líítam kídíem, Ephodke gordung gepu annyi eelen delo ilíkto.

⁸Bulu Ephod dem monana ekurang atellok, angkelo genam alop dem mola, delokke moi-muang demte akampe ilíkto.

⁹Deme kéényung appiem akampe neyi sumola delokke, annyikope pildope bodong emla apeem 22 séntimitarpe moto.

¹⁰Delok teyong delo bulu gairuna elíng aménalok, adong appiko ilíkla, kerang adong delo rubi, topaj, delokke béril elínglok pílíkto.

¹¹Adong annyinana delo emerald, sapphir delokke daimon elínglok pílíkto.

¹²Adong angumnana delo jasinth, agat delokke amethist elíng lok pílíkto.

¹³Adong appinana delo khrisolite, oniks delokke jaspar elíng lok pílíkto. Deke delokke abe tuubu dem uunlok pígolíkto.

¹⁴Israel tabungke amín mín-gangem gekan sudope elíng aména íying kolang annyi delo Jakobke oo kídí amínem píket ketyin líkto.

¹⁵Angkelo gepenam alopdem genanape, rímo kísa yadnam uun kotír lunggulok moto.

¹⁶Bulu uunlok abelo lunggu kísa idope, annyiko pílíkla uunlok kelong annyiko mola, kelong annyidem angkelo genam alop delokke teyong kéényung terelo píket líkyinto.

¹⁷Delok rodem bulu kelong annyi delo uun lunggu annyidem éélíkto.

¹⁸Delokke lunggu annyi delokke tuubu teredem, abe lok adong annyi delo éélíkla, dekepe Ephodke gordung gepu keradelo dekedem ilíkto.

¹⁹Bulu uunlok kelong annyiko mola, dem annyi dem Ephod kékon delokke angkelo genam alop lokke rumkíng arang tuubulo píket líkto.

²⁰Bulu uunlok kelong annyiko motem langkula, deme kampope sumnam uug teyo delo lang tuubu gerík suko Ephodke gordung gepu annyi kerang lokke rumkíng delo item líkto.

²¹RUUTUMke Mosime lulíknam adupe, angkelo genam alopde uug teyong delo ida sula, elumadope angkelo genam alop delokke kelong annyidem Ephod lokke kelong annyi delo yasanna rímo kolok ngotdum sulíkto.

²²Ephod arang delo aana ege lukdor dem bulu yasanna enno kotírlok sumto.

²³Dumponge aadope arung inam abe kídíde bétma dope omyét líkto.

²⁴RUUTUMke Mosime lulíknam adupe, lukdor rumkíng abedelo yasanna, yamugna, yalína ennolok lang gaipe yadnam ennolok, dalim ayépe mola,

²⁵deme apí-arí idope ila uun gontilok bilgo dope ombí-omyél sulíkto.

²⁶Abe delo bilgo dope ennolok dalim ayépe mola delok kékonlo uun gontilok omlíkla, delo lekoda ennolok dalim ayépe mola dekepe ombí-omyél sulíkto.

²⁷Dekepe irongem bulu Aaron kepelang bík oo kídí legape galugem ombito.

²⁸Aaronke dumel delokke oo kídí kepe dumluplok, kampona lukdor lok,

²⁹RUUTUMke Mosime lulíknam adupe, yasanna, yamugna, yalína delokke kampope yadnam enno kídílok gasor kídíem pooré-appun molíkla sumbito.

³⁰Bulu lunggu tadok kídíemte píbila, uun kotírlok ekungko mola, siil lo atket líknam kísa: “RUUTUM keepe deene,” emla deena iyodem ilíkla ito.

³¹RUUTUMke Mosime lulíknam adupe, bulu deme dumel kerang delo yasanna rímo kolok ngotlíkto.

³²Dekepe irodem, RUUTUMke dungko Tombu delokke agér tabungem iyin-sayinto. RUUTUMke Mosime lulíknam adupe, Israel ami kídíe ato takamem ipí pílíto.

³³Bulu Mosi kelo, Tombu demlang delokke ekurang tabungem, petké kídíem, siipang kídíem, daabe kídíem, gaang kídíem delokke duupu kídíem,

³⁴eredope mepala, yalíng dope nukunam mér ayo tamkabem delokke kampope nunam abíd ayo tamkap kídíem, porda kídí,

³⁵Lulígnam Ngiitom Íying atlíkko líítam annyiem mekeng Daapong Sondugem delokke dem joonana daajongem, Ipítna Ayang Dungkengem delokke,

³⁶tébul emlang bíkke ekurang kídí takamem delokke Shédíkelo tosak líknam ettíngem,

³⁷uun kotírlok pínam sérak dungkengem lang sérak kídíem, delokke deke delokke ekurang takamem, sérak legape tél kídíem,

³⁸uun runggu, pídé líknana tél, nampona ato, Tombu aatak lokke porda,

³⁹pitol runggu demlang, delokke pitol lokke esap kísana, delokke daajong kídíem, ekurang kídí takamem, arbín supom ekung demlang, dakkeng em,

⁴⁰baatum lokke porda kídíem lang gaang kídíem, delokke duupu kídíem, baatum aatak eyabke pordem lang rímo kídíem, Tombu legape hokeng petké kídí, delokke Tombu delo ilíkpenam ekurang tabungem,

⁴¹miri kídarke Deena Aloplo agér iyém kampo-tatpope gepenam ege-galuk, delokke Aaron kelang bík oo kídíke gepenam deena ege-galuk kídí tabungem boma mayinto.

⁴²RUUTUMke Mosime lulíknam adupe, Israel kídí takamde agér tabungem iyinto.

⁴³RUUTUMke lukam pakpe, bulu ato-siro takamem itudín imadín deme Mosi bí kaabeng-tatbengkíla aipe kaayinto. Dekepe ila buluke teyolo utepooroem Mosibí políkto.