Read Alladian GÍLEN KUNAM 4 Bible Online

GÍLEN KUNAM 4 - Alladian bible

GÍLEN KUNAM 4

¹Mosi poyansuto, “Bulu ngom arope tatmamílo, demangkom arope míímamílo delokke ‘RUUTUMbí nokkíng lengkan sumang,’ emla manmílo?”

²Delo RUUTUMbí bím poto, “Nok alag delo ingko koda bomdune?” Bí poyan suto, “Banggénko.”

³RUUTUMbí poto, “Among delo dem yoplíkto.” Delo Mosi bí amolo banggén dem yoplíkto. Depe itoname de tabí kope batkai, ila bí delok duggeto.

⁴Delo RUUTUMbí bím poto, “No guba dola, alag de tamé méétínglok laatoka,” Delo Mosi bí guba dola tabídem gagtoname, de bík alag lo banggénpe ikaku.

⁵RUUTUMbí poto, “Si Israellok buku kídíke Shédí, Abraham, Isaak, delokke Jakobke Shédíbí, nom lengkansuto emla, Israel kídíe arope míídope, iyodpe idope iyé.”

⁶RUUTUMbí Mosi me lekoda potoku, “Nok alage, nok galuk aradelo yuasuto.” Delo Mosi bí bík alagem, bík galuk aradelo yuasuto. Delokke edílo bí dem ilen suto kudí, bík alag de tííd kísa yasito.

⁷Delo RUUTUMbí potoku, “Nok alage, nok galuk ara delo lekoda yua sutoku.” Bí dem tatla itoku, depe ipala ilen sudokuem, bík alag de amíl abíd delok kísa aitoku.

⁸RUUTUMbí poto, “Bulu nome arope míímape, demangkom kerangke irisinyo iyodem, arope míímanampe iyékom, si lennyi nana sidan bulum arope míímoyé.”

⁹Delokke sikena irisinyo annyi teyong lote, bulu nome arope míímayé mílo, delokke nom tatmayé mílo, Nail korong lok asi ayoko laala, pítílko among teyong kolo purlík langka, delo aside iyyipe batyé.

¹⁰Mosi RUUTUMme poto, “E RUUTUM, ngo aipe agom pokén manako. Nok béérang si nokke lupo sulendo sokke ila kerapekai, ngo dengepe agom ponako delokke agom kamape ila agom poji manako.”

¹¹RUUTUMbí poto, “Sékodí tanike nappangem bine? Sékoda ruubé mola gommang mone? Sékoda bím kaamola demangkom mikma mone? RUUTUM ngo dekedem imanía?

¹²Supak gíkalangku! Ngo nom agom pokolo igulyé delokke nokke agom popenamem ngo poyilyé.”

¹³Idola Mosi poyan suto, “E RUUTUM, dem idope, ami akonem melík dope ngo rogudung.”

¹⁴Delo RUUTUMbí Mosike teyolo marla poto, “Dekemílo nokke bíro, Lébi Aaron bí kape? Bí agom-aang pojinako emla ngo kéndung. Bí nom kaarík supe emla aadubong, delokke nom kaarík suyém bík aapíde ashéyé.

¹⁵No bím lupo sula, agom popenamem polík toka, delo ngo nonyim agom-aang pokolo igulla, nonyim poyilyé.

¹⁶Bí nokke nappang kísape ila, no bíkkepe Shédí kísape iyé.

¹⁷Idola no sim banggén sim, nok alaglo irisinyo iyodem idope bomtoka.”

¹⁸Dekepe irongem, Mosi bí agíke ato abu Jethro kíng gílat sulang kula bím, “Ngok edung-erang kídíe turdung adadín, dem kangkíkupe ngo Ijiptlo gílat supoyéku,” emla potoku. Delo Jethro bí, “Aiyé, no aiyope enpo tokuka,” emla elíkto.

¹⁹Midian amonglo Mosime RUUTUMbí lulíkto, “No Ijiptlo enlat suto kuka, kapeila nom mokape ina kídíe siyinkai.”

²⁰Depeila Mosi bí, mimem lang oo kídíem, gadolo duumola, Ijiptpe entoku. Delokke Shédíke asék demte bík alaglo bomto.

²¹Mosi me RUUTUMbí poto, “Nokke Ijiptlo pííyékuem, Pharaohke keralo, nok teyolo irisinyo iladope ngokke ralnam binam takamem ikan langka. Idola ngo bík aapíem, ami kídíem gímo madope tolmoyé.”

²²Delo Pharaohme sipe polangka, “RUUTUMbí sipe podung: ‘Israel bí ngok oge yalumnam ue.’

²³Delokke nom ngo poto, ‘Ngom kummo dope, ngok uem gímo langka.’ Idola no bím gímo maato, depeila ngo nok oge yalumnam uem mokayé.”

²⁴Ijiptpe endak kuem doopeko notko kolo RUUTUMbí Mosi me kaarík sula mokape ito.

²⁵Depe idoem bík mime Jipporah bí, agíke oo lokke amílem, ratna elíng kolok dínbíng iyodsula, Mosike aleme delok uktak sula ukto. Dekena dínbíng iyod sunam ayonlok, bí Mosi me poto, “No ngokke legape iyyi lokke miloe.”

²⁶Depeila RUUTUMbí Mosi me turmoto.

²⁷Depe idoem, RUUTUMbí Aaron me poto, “No yépol mooruklo gíla, Mosi me kaarík sulangka.” Depeila bím kaarík supe, deena díítum delo bí gíla, edílo kaarík sutodí, bí bím mumpupto.

²⁸Delo Aaron me Mosi bí, RUUTUMke podope ponam tabungem pokanla, delokke irisinyo iyod tabungem ikan bidope, bíkke polík namem pokan bito.

²⁹Delo Mosi lang Aaron bínyi Ijiptlo gíla, Israel lokke abu mine kídí tabungem, tomdum suto.

³⁰Mosime RUUTUMke ponam tabungem, Aaron bí buluke kerang delo popa bito. Ami kídar delo iyod kídíemte ikan bito.

³¹Bulu dekedem arope mííto, delokke bulu, RUUTUMbí buluke ankí-kenoem kaala, buluk legape mííbidung emla edílo tattodí, bulu lebíng koníngla kumsuto.