Read Alladian GÍLEN KUNAM 40 Bible Online

GÍLEN KUNAM 40 - Alladian bible

GÍLEN KUNAM 40

¹RUUTUMbí Mosime poto,

²“RUUTUMke dungko Tombudem kerang poolo lokke longe kerayalumlo holangka.

³Lulíknam Ngiitom Íying kana, Daapong Sonduk dem melíkla delok kerang delo pordem holík langka.

⁴Tébul dem bomala delo ekurang kídíem leelík langka. Sérak dungkeng emte langaala delo séragem leelík langka.

⁵Daapong Sonduk kerang delo nampona atoem romdope, uun runggu dem melík langka. Delokke Tombu aatak lamgé delo pordeme holík langka.

⁷Arbín supom ekung dem Tombu kelang rungguke pénsam delo, melík geyéla asilok purbí líklangka.

⁸Baatum demlang, delokke ekurang kídí takamem molíkla baatumke lamgé aatakke pordem holík langka.”

⁹“Dekepe iyin-sayin rongem, Tombu demlang ekurang tabudem, pídénana tél delok pídé líklangka. Depe irodem de takamde deeyé.

¹⁰Sike sok kékonlo runggu demlang bíkke ekurang takamem pídélík langka. Depe irodem de takamde apíípe deeyé.

¹¹Delok teyonglo arbín supom ekung demlang dakkeng demte pídé líktoka.

¹²“Aaron melang bík oo kídídem, Tombu aatak lamgé delo aabo langka. Delokke bulum dormo idong ursuem imolangka.

¹³Aaronme miri ege-galuklok píllíkla, pídéla, ngome miripe agér ibidope kumlík langka.

¹⁴Bíkke oo kídíemte aabola, ege-galugem pítlík langka.

¹⁵Bulu ngokke miripe agér ibidope buluke abuem kape kísa pídé todí, deke kísapakpe bulumte pídé líklangka. Sikepe pídé rodem bulu agínpe miripe iyaryé.”

¹⁶RUUTUMke lulíknam pakpe Mosibí ato-siro takamem iyinto.

¹⁷Depeila, buluke Ijipt amonglok gílenla irongku lokke, dítak annyi nana lokke kerang poolo lokke kerayalum longe delo, RUUTUMke dungko Tombu dem hosaato.

¹⁸Mosibí duupu kídíem ilíkla, siipang kídíem tamlíkla delokke daabe kídíem píllíkla gaang kídíem dííyin líkto.

¹⁹RUUTUMke lulík nampe Tombu delokke arang tamkap emla delok teyonglo luyu tamkap emte holíkto.

²⁰Delo bí Lulíknam Ngiitom Íying atlíknam líítam annyi dem laala, Daapong Sonduk arang delo melíkto. Bí daajong kídídem Sonduk delokke abe eelenke kelong kídí delo ilíkla, Ipítna Ayang Dungkeng dem Sonduk teyong delo mekap líkto.

²¹Depe irodem, bí Sonduk dem Tombu arang delo melíkla pordem holíkto. Sikepe RUUTUMke lulíknampe bí Daapong Sonduk dem porda delok hokapto.

²²Delok rongem bí porda luyu dan lokke línggíng dan Tombu arang delo tébul dem pyalíkto,

²³depe ipala tébul teyong delo, Shédíkelo tosak líknam ettíng dem melíkto, dekedem RUUTUMke lulíknampe iyin líkto.

²⁴Delok rodem bí tébul lokke arotkondan, sokkodan Tombu arang delo, sérak dakkeng dem melíkto,

²⁵delokke RUUTUMke lulíknampe, RUUTUMke kerang delo bí sérak kídíem nyotlíkto.

²⁶Depe irodem bí porda kerang delo uun runggu dem mela, Tombu arang delo melíkto.

²⁷Delokke RUUTUMke lulík nampe nampona atodem bí nyotlíkto.

²⁸Delo bí, Tombu aatak lamgé delo pordem holíkto,

²⁹delokke porda kerang delo bí soboem palíkla ali-ayé amanem romlíkla ipak ilíkto.

³⁰Delok rodem bí arbín supom ekung dem, Tombu kelang runggu pénsam delo melíkla, asilok purbílíkto.

³¹RUUTUMke lulíknampe Aaron lang bík oo kídíe, delokke Mosi bulu agí ale-alagem,

³²buluke Tombu arang delolang runggu delo gídung-gítok suyéme arkutsuto. Delok rongem Tombu dem bilgo dope baatum emlang rungguem ilíkla, baatum aatak lamgé delo pordem holíkla, Mosibí agér takamem iyinto.

³⁴Dekepe iyin-sayin rongeme, Tombudem doomuge daklum bomla Tombudem RUUTUMke angun-abée bííbomkai.

³⁵Sikepe bííbomnam legape Mosibí Tombu arang delo gíamato.

³⁶Tombu delok doomuge gyabídyéku petomem, Israel kídíe buluke notko dem moolop konlo byakdungkuai.

³⁷Doomug delokke Tombu delo kadung teteng dem, bulu buluke notkolok byakla mato.

³⁸Buluke byakgola en-gong gotídungem, RUUTUMke dungko Tombu teyong delo, longem doomuge dagbomla, delokke yoem doomug delo eme kala, Israel milung tabunge kaayindupe katíto.