Read Alladian GÍLEN KUNAM 6 Bible Online

GÍLEN KUNAM 6 - Alladian bible

GÍLEN KUNAM 6

¹Delo Mosime RUUTUMbí poto, “Pharaoh me ngo ingkokodí iyéne, dem no supak kaayé, ngokke lakbíng ralnam lok bí bulum gímoyé, ngokke lakbíng ralnamlok, bí bíkke among lok ami kídíem gílen moyéku.”

²Shédíbí Mosime poto, “Ngo mino RUUTUMbí.

³Ngo Abraham kílang Isaak kíng, delokke Jakob kíng Ralya yalumna Shédípe lengkan suto. Idola ngokke amíne RUUTUM, emnam sok bulume ngo lengkan sumato.

⁴Buluke mibope dungko, Kanaan amongem bulum bidope ngo bulu kelo daapongem ilen bosuto.

⁵Delok teyong delo, Ijipt kídí lokke Israel kídíem, abílpe irééla ankí-kenonamem, ngo tatto delokke ngokke daapongem ngo míípasukai.

⁶“Depeila Israel kídíem polangka, ‘Ngo mino RUUTUMbí, delokke Ijipt kídí lokke abílpe imokolok, ngo nolum laalenyé. Buluke pakne-pakbope ikolok, ngo ilenla alage yamtar bomdola nolum ipityé, delokke miga-ralnam íngkí-bengkí agér lok,

⁷ngo nolum agí amisupe laasula, ngo noluke Shédípe iyé. Delo Ijipt kídíke aralo abílpe ibom kolok ngokke nolum laalen yékueme, RUUTUM noluke Shédí bí ngo emla nolu kényé.

⁸Delok teyolo, ngokke arorupe Abraham, Isaak delokke Jakob kíng, pésu bomnam among delo, ngo nolum langaayéku. Dem ngo noluke yéyar bompenampe biyé, kapeila ngo mino RUUTUMbí.’ ”

⁹Sim agom kídí sim, Mosi bí Israel kídíem pokan toku. Idola bulu bík agomem tatmato, kapeila atírung mape itung-iré kolok buluke aid-aloe kaimanape ito.

¹⁰Delo RUUTUMbí Mosime poto,

¹¹“Ijipt lokke Pharaoh roja kíng gíla, bík among lok Israel kídíem gílen modokupe polangka.” emla poto.

¹²Idola Mosi bí RUUTUMme poyan suto, “Israel kídíe ngok agomem tatmarodem, Pharaoh name ingkoko tatyén? Kapeila ngo agom pojimanako.”

¹³Delo Mosi melang Aaron me RUUTUMbí ukumpe políkla poto, “Ijipt lok Israel kídíem gílen bodokupe, ngo kebangem bíntobong.”

¹⁴Sikesi buluke opín-odong lokke dumpong kídíe: Israelke ogenam Reubenke oo kídíe: Hanok delokke Pallu, Hejron delokke Karmi, sikesi Reuben opíne.

¹⁵Simeonke oo kídíe: Jemuel, Jamin, Ohad, Jakin, Johar, Kanaan mime lok onam Shaul. Sikesi Simeon opíne.

¹⁶Lebike oo kídíe buluke hannampe: Gershon, Kohath, delokke Merari. Lebi bí 137 dítakko turto.

¹⁷Gershon oo annyiko kato: Libni lang Shimei, delok kékonlo buluk otíng oyine kato.

¹⁸Kohath bí oo appiko kato: Amran, Ijhar, Hebron lang Ujjiel. Kohath bí 133 dítak ko turto.

¹⁹Merari oo annyiko kato, Mahil lang Mushi. Sikesi Lebike opín elang otíng oyin kídíe.

²⁰Amram bí agíke abu lokke bírme Jokebed me mimepe ila Aaron delokke Mosi me oto. Amram bí 137 dítak ko turto.

²¹Ijhar bí oo angumko kato: Korah, Napheg delokke Jikri.

²²Ujjiel kom oo angumko kato: Mishael, Elijaphan delokke Sithri.

²³Aaron bí Aminadabad ke ome delokke Nashonke bírme Elisheba me nyamran ibosula bíme, Nadab, Abihu, Eleajar delokke Ithamar bulum obito.

²⁴Korah bí oo angumko kato. Asir, Elkanah delokke Abiashap. Bulu Korah opín lokke pínmík kídíe.

²⁵Putielke ome konem Aaronke oo Eleajar nyamran ila, Phinehas me bí obito. Sikesi Lebi opín lokke pínmík kídíelang edung-erang dumpong kídíe.

²⁶RUUTUMbí Aaron melang Mosi me, “Israel opín kídíem, Ijipt lok gílen bolangkuka,” emla pokeng líkto.

²⁷Bínyi, Israel kídíem Ijipt among lok gílen modokupe, Ijipt lokke roja Pharaoh me poríksune.

²⁸Ijipt amonglo Mosime RUUTUM ke lupo sudodem,

²⁹Bí poto, “Ngo mino RUUTUMbí, ngokke ponam kídí tabungem Ijiptke roja Pharaohme polangka.”

³⁰Idola Mosi bí, “Ngo agom poji manako emla no kéndung. Kapekísa Pharaoh bí ngok agomem tatyén?” emla poyan suto.