Read Alladian GÍLEN KUNAM 8 Bible Online

GÍLEN KUNAM 8 - Alladian bible

GÍLEN KUNAM 8

¹Depe iro delo Mosime RUUTUMbí poto, “Pharaoh kíng gíla bím sipe polangka, ‘RUUTUMbí sipe podung, “Ngom kumdope ngok ami kídíem gímolangka.

²No bulum gímo mayé milo, ngo nok among tabungem tatíklok adírpe imoyé.

³Nail koronglo tatíge bííbomla, bulu nokke roja ekumlo saala, nok ipko pírteklo, nok ketpomlo, nok migom kídíke ekumlo, delokke nok ami kídílo, delokke nok roti níípom kídí lolang roti pampom kídí loteng renggo bomyé.

⁴Tatík kídíde nokkíng, delokke nok ami kídílo lang, nok migom kídí tabunglo resang gobomyé.” ’ ”

⁵Delo Mosime RUUTUMbí poto, “Aaronme polangka, no alag delo banggéndem bomdola, lagonla rojik kídílo, nola kídílo lang paatang kídílo lenggo sugotoka, delokke Ijipt amonglo tatík kídíem lenyin motoka.”

⁶Depeila Aaron bí, Ijipt lokke asi kídí teyolo bík alagde lagonto, iname tatík kídíe lenla amongdem bííbomto.

⁷Idola miri kídí dete buluke jadu-montrong lok dekepe ito. Bulukom Ijipt amonglo tatígem lendope ito.

⁸Pharaoh delo, Mosi melang Aaronme tomla poto, “Ngokke loklang ngok ami kídílok tatík kídíem gídokupe, RUUTUM kíng kumbi langka, delo ngo nonyik ami kídíem RUUTUMme ipak idope gímoyé.”

⁹Mosi bí poyan suto, “Ngo ashérupe nok legape kumbilado. Idola nok legapelang, nok migom kídí kepe, delokke nok ami kídíke legape kumdíem no potoka. Delo Nail korongke kékonlo, nokkíng lang abídlo tatíge kayimayé.”

¹⁰Delo Pharaoh pokanto, “Nyampo kumbi langka.” Mosi poyansuto, “Nokke pokampe iyé, delokke ngoluke Shédíke kísana sékote kamang, emla no kényé.

¹¹Tatík kídarde nokkíngla nok ekumlok, nok migom kídílokla, nok ami kídílok gíyéku. Bulu Nail korong petomlo yésu yéku.”

¹²Pharaoh kelok Mosi kelang Aaronke lenrong- kuem, Mosi bí Pharaoh ke teyolo tatík adírem laabín dokupe RUUTUM kíng kumbito.

¹³Mosike konampe RUUTUMbí ibito. Tatík kídíde ekumlok, gíídalok, arík tabunglok siyin kaku.

¹⁴Bulu simang kídíem apom-apom joodum suyinla, deke delok amongde namnyito.

¹⁵Idola edílo Pharaoh bí aikaku emla kaatodí, bík aapí-aangde tollangkula, RUUTUMke pokampe, Mosi melang Aaronme atí tatbi kumato.

¹⁶Delokrodem Mosime RUUTUMbí potoku, “Aaronme polangka, ‘Nok banggén eme leerepla, deemul teyong delo illíkto. De deemulde Ijipt among lokke kéényu regolo, tayubpe batyinyé.’”

¹⁷Dekepe bínyi ila, edílo Aaronbí alaglok banggén dem among deemul delo illík todí, tayube takam tani lolang simon-sililo aayin bomkai. Ijipt among lokke deemul tabungde tayubpe iyinkai.

¹⁸Idola edílo Ijiptlok miri kídíde, buluke jadu-montrong lok tayub em ilenpe emla itodí, delo bulu ilamato. Delokke tani lolang simon-sili tabunglo tayube bííbomto.

¹⁹Miri kídarde Pharaohme poto, “Si Shédíke agére.” Idola RUUTUMke pokampe, Pharaohke aapí-aangde atí tatmape tolkadada.

²⁰Delo RUUTUMbí Mosime poto, “Roem rokompe darepla, Pharaohke korolo gíyéme, bím kaaríksula polangka. RUUTUMbí sikepe podung, ‘Ngom kumsudope ngok ami kídíem gímo langka.

²¹No ngok ami kídíem gímo mayémílo, nok teyolo lang, nok migom kídílo, delokke nok ami kídílolang, nok ekum kídílo ngo tamid mitbamem melíkyé. Ijipt kídí lokke ekum takam delang, Ijipt kídíke yéko-dakko among takam kídídete tamidpe bííyin bomyé.

²²Idola delo longe delo, ngok ami kídí dungko Goshen among dem ngo angukon ségupe iyé. So among so, RUUTUM ngo agér idung, emla no kéndope, delo among delo tamid atí kamayé.

²³Ngo ngok ami kídí kelang, nok ami kídíke pénsamlo, kaapan sumona iyodko iyé. Si irisinyo iyod si nyampo iyé.’”

²⁴RUUTUMbí arope dekepe ito. Tamid mitbame Pharaohke ekumlolang, bík migom kídíke ekum tabunglo, delokke Ijipt among lokke rego takamlo, yoba bomla amongde tamid lok nyokyam gekai.

²⁵Delo Pharaohbí Mosi melang Aaronme tomla poto, “Gíla so among araso so, noluke Shédíme ipak itolangka.”

²⁶Idola Mosi poto, “Depe inamde aimayé. Ngoluke Shédí kíng ipak ilíkpenam simon-silide, Ijipt kídí legape belumnampe iyé. Buluke belum namdem, buluke kangkolo ngolu ipak ilík mílo, bulu ngolum elíng gemayénía?

²⁷Ngolum bíkke lulígnampe, ngolu longumkope bedang enbom suko yépol mooruklo, ngoluke Shédíme ipak ibipe aido.”

²⁸Pharaohbí poto, “RUUTUM noluke Shédíme yépol mooruklo ipak idope ngo melíkdung, idola nolu mooteng gímapeka. Supak ngok legape kumbi langka.”

²⁹Mosi poyan suto, “Nok kerang sokke ngok lenrong kuem, ngo RUUTUMkíng kumbiyé, delo nyampo Pharaoh nokkíng lang nok migom kídílok delokke nok ami kídí kelok, tamid kídíde yobnyok yéku, idola no ngolume yatlang kula, ami kídíem RUUTUMkíng ipak ikolo, gímomape lutlangkula ikumapeka.”

³⁰Delo Mosike Pharaoh kelok lenrong kuem, RUUTUM kíng kumsuto.

³¹RUUTUMbí Mosike kokampe ibito, tamid atel kote kaimadope, tamid kídíde, Pharaoh kelok lang bík migom kídílok, delokke bík ami kídílok nyokkaku.

³²Idola soteng Pharaohke aapí-aangde tollang kula, ami kídíem gímo mato.