Read Alladian JOB 1 Bible Online

JOB 1 - Alladian bible

JOB 1

¹Uj amonglo Job emnam amiko katuai. Bí Shédíme kumsula edíírupe míngkeng suna amikuai. Bí airuna ami kope ila atímana agérem ansula yénakuai.

²Bíkkíng oo kíníd kolang ome angumko katuai,

³delokke mére éjar kínídko, uut simone éjar angumko, aal gooru pumsue língko pilngoko, delokke gadoe língko pilngoko kato. Bíkkíng béérang eteng bojérungko kala sanggo among lokke mirem yalumna amipe bí ito.

⁴Jobke oo kídíe agí ekumlo, akon irongem akone ila, angong arumeme tomla doman dotí bodungai. Dekepe ikolo buluke bírme angumem dobo miyonglo tomtítuai.

⁵Dekepe doman-tíímanem irongem, agínpe Jobbí rokompe gerepla koo kídíke deemangem idééku legape romnam amanlok romtí dungkuai. Bíkke oo kídíke akone Shédíke keralo lumem-imemla paab iket sulangkom itope emla bí míítíla, agínpe bíkke idong kope bí deme iyarbomto.

⁶Longe konem Shédíke oo [1] kídíe RUUTUMke keralo lengkan sula aayinto. Buluke aralo Soitan[2] kom aamín geto.

⁷Soitanme RUUTUMbí, “No kolokda aadune?” emla ííto. “Ngo tani amonglo maying goola aadung,” emla Soitan bí poyansuto.

⁸RUUTUMbí Soitanme poto, “Ngome agér ibina Jobme no kaadunía? Tani among araso bík kísape míngkeng suna delokke aina ami kamang. Bí Shédíme pesola atímana agérem ansula imanako.”

⁹Soitan poyansuto, “Atí kamape, emmumpe Jobbí nome kumsuyénía?

¹⁰No agínpe bík teyolo lang, bíkke edung-erang teyolo, delokke bíkke ekuserang takam teyolo etor torgong manía? Bíkke agér-anam iko teyolo utepooroem ruulíkla among takam loope bíkke bomnam simon-siliem bííyin momanía?

¹¹Idola nok alagem leelíkla, bíkke ato-siro tabulo tong-aryangem aamotoka, delo bí nokke atuk migmoloope béélíkyé.”

¹²RUUTUMbí Soitanme, “Aiyé, bíkke ato-siro kanam takamem nokke ralnam aralo melíkdung, idola Job agímedan nok alage uktet mapeka,” emla poto. Delo Soitan bí RUUTUMke kerang delok gíkaku.

¹³Longe konem Jobke oo abíng yalum ekumlo bíkke ome-oo kídíe doman-tíímanla duudungem,

¹⁴agom popa bina amikone Job kíng dugala, “Ngolu gooru kídíem aal durbodungem, delokke gado kídíete ayirlo neyang dota dungem,

¹⁵Sabia ami kídíe mimakpe iyala, takam deme goonyok bomkaku. Bulu béérang kídí takamem moka kayinto. Nome pokan dokupe turne ngo petom,” emla pokantoku.

¹⁶Ami delokke agom poyin mangadape, agom popa bina ami konko duga langkula, “Taleng telok Shédíke eme [3] oletla mér kídíem lang kaabomna béérang kídíem guka kayinto. Nome pokan dokupe turne ngo petom,” emla pokantoku.

¹⁷Bíkke agomem poyin mangadape amikon koteng dugalangkula, “Línggona Saldia ami maglíng angum kone ngolum mimakpe aabomla uut simon tabungem gíyin bokaku, delokke béérang kídí takamem moka kayinto. Nom pokan dokupe turne ngo petom,” emla pokantoku.

¹⁸Bíkke agomem poyinmang adape amikon koteng duga langkula, “Nokke ome-oo kídíe, oo abíng yalum ekumlo doman-tíímanla idungem,

¹⁹menang asak gumnam botteko yépol mooruk amonglok mudala, ekum dem mutpénla, koo kídar takamem ojémla siyinkai; nom pokan dokupe ngo petom turne,” emla pokantoku.

²⁰Depe tatrodem, ankílok Jobbí gerepla, agí galugem bétgeyéla, bík dumídem ngíkutsula, bí amonglo gubala kumsuto.

²¹Delo bí poto, “Amíl araape ngo ane akiilok lento, amíl araape ngo gíyéku. RUUTUMbí bito, delokke supak RUUTUMbí laatoku; depeila bíkke amínem yidgedung.”

²²Dekepe bíkkíng atímange ilateng, Jobbí paab imang demangkom Shédíme imemdo emla pogemang.