Read Alladian JOB 10 Bible Online

JOB 10 - Alladian bible

JOB 10

¹E Shédía, ngok yénamem apéé along kabong, ngokke míídír alongla posunam sim ngome no lupak mapeka.

²Ngokke teyolo no íngkona atímang koda kaapatun; ngome pobika.

³No agíke pílen sunam amiem míípak sulangkula, delokke atímanake agérem ngilbomla, nokke sikepe mirolpe inamde ibaadunía?

⁴Nokom tani kangkampe kaanakua?

⁵Nokke yénam dítak kídíete tani kísa andeng along dunía?

⁶Kape no ngokke imem takamem saptíbomla, ngokke paabem mata tatíla itíbomkan?

⁷Ngo atímana ami mangko emla, delokke sékote nok keralok ngom mopít lamang emla no kéndung.

⁸Nokke agí alaglok ngome pílen-ruulento, supak delok alag delogei ngome nyokmokupe idung.

⁹No ngome demullok pílento, no demulpe ngome imokupe idunía?

¹⁰No ngok abuem ngome odope ralnamem bito; no ane akiilo ngome sisamoto.

¹¹No ngok amíl-amoem along lokla oonglok, delokke adín lokla asiglok píto.

¹²No ngom turnamem lang ayangem bila yénamem ruubito.

¹³Idola dekena moodí tabunglo, no ngom itung-irékupe emla míísi sula yétíto.

¹⁴No ngokke teyolo paabko kangket pala, ngome maab bimadope emla kaatíto.

¹⁵Ngo paab imemko kamílo nokkíng ebín bosuyé, idola edílo ngo aina agér iyédí, delok ngo atí paapek paamang; idola annyinge ngome bííbomdung, delokke ngo anka sudung.

¹⁶Ngo gairuna agérko imílo, simyo myomur kísa no ngom matadung, delokke ngok teyolo atímang iketdope no irisinyo emte idung.

¹⁷Nokkíng agínpe ngokke mirupe hakiiem leetung; nokke marname ngokke teyolo bojé yayang idung, delokke nokke ségue atí-atípe ila mirolpe roldung.

¹⁸No ngom kape olen moton? Ngom amie kaamang adapekai, ngo situamílo airuyai.

¹⁹Atí turkímape ane akiilok olenla, agolo yuko sunamde gairuna kope iyai.

²⁰Ngokke yénamsi yéyin kabonía? Ngo ashéng anyongko kadope, no ngome kaasumape anyongko ito reméla.

²¹Mempang yimangko kaamolo, delokke edílote gílat sukumang kolo, ngo menape gídak.

²²De edílokom angunem kénkímang, kaamo ayarko delokke míílal-laltísuko delo, angun agí eteng kaamo kísa idung.