Read Alladian JOB 11 Bible Online

JOB 11 - Alladian bible

JOB 11

¹Delo Namah among lokke Jophar bí poto:

²Agom kídar sime poyansula mape iyénía? Yagope agom ngomtí kolok aroe emla mííyénía?

³Nokke agom kídídem ngolu poyan sulamanía? Nokke lué-lulénam kídíde, ngoluke nappang kídí sime asoope imoyénía?

⁴Nok agom kídísi aroe emla no mansudung. Shédíke keralo no deena kope hansudung.

⁵Shédí bí poyan suduamílo emla ngo míídung.

⁶Kénnamde deddína bedange, delokke tanike kénpíng maname bojéko kadung emla poduapema. Nok paapenamem pemílo anyoyana komin Shédíke nom iréénamsi.

⁷Shédíke bottena pauar lokke rísuem no kénlen tonía?

⁸Taleng tesi Shédíke legape atí kamang, idola no tesime míípí mínyén? Sina kídíke yépomem Shédí bí kéndung, idola no deme atí kénmang.

⁹Shédíke mirame bottena siyéngem pemílo bortak yadung, delokke tani amongem pemílo bodoyadung.

¹⁰Shédí bí nome umla kebalo bomamílo, sékoda bím itumyén?

¹¹Ami takamke atímangem Shédí bí kéndung, depeila íngko amiedí aimane dem bí kéndung.

¹²Gadoe kapekísa olen lokkai asoope idudí. bopol amide kerang lokkai kénnarupe irepyé.

¹³No agíke aapíem bíkkelo jonsu yémílo,

¹⁴nok ekumlok atímangem ipak suyémílo,

¹⁵delo no annying kamape migmoem gekasuyé, delokke pesonam emnamde kamayé.

¹⁶Gíkana puumuem kapekísa kényimadí, deke kísape no nok adírem mitpansuyé.

¹⁷Delo nok yéname longe raadang kísape, delokke yoh raadang kísa ina yénam aloplo, roh doonyi sanam kísa angun yéku.

¹⁸Delo Shédí bí nome aiyope kaabomyéku, delokke nok yénamem no apíí píílí aiyope yéyéku.

¹⁹No miruem pesonam atí kamayé, deddína amie nokkíng igul matayé.

²⁰Idola atímana amie dukpan supekoem kanggosuyé, idola bulu dugnyok gepeko bedang paamayé. Siname aayé emnamde buluke míínam sunam atele.