Read Alladian JOB 13 Bible Online

JOB 13 - Alladian bible

JOB 13

¹Nokke potonam kídar sime ngo agí amiglok kaayinto, nyorulok tayyinla aapíso kényindung.

²Nokke kénnam dem ngokom kényindung, ngo nome améyana mang.

³Shédíme mino ngo lupo sulídune, bím min kebang imínsupe míídune.

⁴Nokke kénmangem no menamlok pokapdung, no kina amiem ipílamana daktor kísane.

⁵Atí adud-ayud kamape, asoope duunamde nok legape ainame.

⁶Ngokke legang posunamem aiyope tatbitoka.

⁷No kape menam agom pokan? De Shédíme namngoko biyénía?

⁸No bíme pénsam lubila, bíkkepe kebanglo dakbi yénía?

⁹Nome Shédí bí aipakpe kaamílo, nokkíng teng bí ainamko paayédí? Taniem yadnam kísa no Shédíme yadla yénía?

¹⁰Nokke loorí mangem rumnyok dokom, bí nome deme kaapala luyé.

¹¹Nokkíng bíkke angun-abée bííbomla, bíkke reyubname nokkíng aamayénía?

¹²Nokke ngiitomde metbu kísane, delokke nokke lukí sunamde kédeng kísane.

¹³Ngom pomotoka, no asoope duutoka, íngkona ebíne idakkom deme ngo ankímang.

¹⁴Ngokke yénamem alagso bomsupe ngo peso atí kamang.

¹⁵Ngokke legangem Shédíke keralo lukanyé, kapeila ngo míínam sunam kaimang, iname bí ngom moka dokom ngo pesomang.

¹⁶Aimana amie Shédíme mikmo gekasulang manade, ngokke sikepe aapí mííduk si, ngom mopít laate iyépe.

¹⁷Supak ngokke ponamem no aipe tatgap toka,

¹⁸Ngo aidung emla míísula ngok legangem kebangpe popasuyé.

¹⁹Séko ngome atímanako emlayén? Lengkan yémílo ngo asoope ila siyé.

²⁰Shédí nok keralo ngo rumnyok sumayé, no ngome ato annyiko kaabi langka:

²¹Nok alage ngokkíng tebeg yimape, nome peso-ríandope ngome imoyimapeka.

²²No kerape poyo getoka delo ngo poyé, demangkom ngo poyo geyé delo no poyan sutoka.

²³Ngo íngkona paab koda, delokke imem koda iton?

²⁴No ngome kape mepakkan? No kape ngome miru kísa ségue ikan?

²⁵No ngome irít-iket dunía? ngo neyang anne kísa, delokke ereena tatír kísa nakomin.

²⁶Ngokke akor-siyor kamang ada pekai, íngko kodí itone dem no ebín bomdung.

²⁷Ngokke lekor miyongem no kaatí duula, ngokke aleme ikoli lok ríndung, delokke ngokke lelam emte kaatídung.

²⁸Dekepe itínam legape ngo takít donam ato kísa, delokke yangkuna esing kísa ikai.