Read Alladian JOB 14 Bible Online

JOB 14 - Alladian bible

JOB 14

¹Tani onam si ool yémang, dete dug-adírpe yénam si itídung.

²Appun kísa menape sisa pala nyokkuna kísa, delokke menape kaimana ugyum kísa.

³Dekena amiem no kaatídunía, delokke dekena ngome kebang baabom dunía?

⁴Sékoda deemanalok deenaem laalen ladun? Sékokom depe laalen lamang.

⁵Tanike yénamem ruutubong, turboo madope no bíkke poolo moodí emte iruutubong.

⁶Tanike yédungem yérí loope yémodope, no kaatímape tanime yésumotoka.

⁷Teetonam esing delokkom míínam namko kadung, kapeila bík teetung deloge amume saalayéku.

⁸Delokke appíre akula, pírdínge siduakom.

⁹Kédéng ara belo asi pangkumílo, de anípe buksayéku.

¹⁰Idola tanide edílo siyédí, de bíkke yéyine.

¹¹Kapekísa asi tokyimana koronge idudí, delokke oojinna siyénge idudí;

¹²deke kísa edílo tanie siyékudí, bí edílokom turkumang. Taleng tesi kayar dokom, bí edílokom daryimang, delokke bele yimang.

¹³Nokke marname kadu tete delo, ngome ago aralo rumnyok duamílo emla ngo míítídung. Depe irongem moodíko ilen palangkula ngome míípa sulangkuka.

¹⁴Tanie simílo bí turyékudí? Idola ngo aina longem kaayayé, delokke ankí-keno longe sokke gíyindo longe loope, ngo toyayé.

¹⁵Delo no ngom tomyém, ngo poyansuyé, delo nok pílensunam tani ngome no ayasuyéku.

¹⁶Delo no ngokke lekor mipíem kaabomyé, idola ngok paabem hanyimayé.

¹⁷No dekedem mesamla mepakyé, delokke ngokke imemem no arkutyé.

¹⁸Idola kapekísa dííte bénla oletdudí, elínge moolekon loope loodudí;

¹⁹kapekísa asie elíngem rakdudí, puumue kédéngem ragaala yubomdudí; deke kísape no tanike mííbomnamem nyokyin mokune.

²⁰No taniem ikumla bíme agínke legape inyokne, bíkke migmoe sirongem nyokyardung.

²¹Bíkke ome-oo kídíe yidnamem paadokom bí kényimang. Edílo bulu atímang amínem paanamko kayédí, delote bím popana kaimayé.

²²Bíkke agíke amílke kinam petomem mino bí kénsuyéne, delokke bí agíke aapí duuk emmin agíe kénsuyéne.