Read Alladian JOB 15 Bible Online

JOB 15 - Alladian bible

JOB 15

¹Delo Teman doolung lokke Eliphaj bí poto:

²Kénna amie arunglo agomem políkdun? Demangke bík akiilo sanggo asarem ngalík sudun?

³Bí atí are kamana agomlok pomín sudun?

⁴No aina deena bedang emte tujém duulalo, delokke Shédíme kumsu kolo itum duulalo.

⁵Nok paabe nok nappadem bíímodung, nok nabbélde pillapdung.

⁶Nok agí nappange nome lusudung, ngomang, delokke nokke agí nabbélde nokke mirolpe isudung.

⁷No petomdí kerayalumpe olennam amie. Dííteme pímang adapekai, nome pílen tonía?

⁸Shédíke mííbom namem no kénto-kaato sutonía? Delokke no petomía kénna amie?

⁹Ngoluke kénmanam ingkoko no kéndun? Ngoluke tatkén manam ingkoko no tatkéndun?

¹⁰Nome olenna abuem abíyala, dumpue momong ina kídílok ngolu kénmanía?

¹¹Shédíke nome remelpe poyilnamem, aapí edíng dope ponamdem no atíímanía?

¹²No kape ejír-emar ila ngolum marla kaadun?

¹³No Shédíme marbomdung, delokke bím mepakdung.

¹⁴Tani aralo sékoda deedun? Shédíke keralo séko jondun?

¹⁵Teyong kotoki kídí loteng, Shédí bí arope míímamílo, teyong among loteng bík keralo arope deenape imamílo,

¹⁶atí loorímana, belumpe yéna, atímangem asi tíípe tíína, tanidía bík keralo gaiyén?

¹⁷Supak ngok agomem no tattola, ngok kaanamem pobiso.

¹⁸Atí rumsupmape abu kídílok, paayon sunam kénnamem, kénna kídíe ngom poyilto.

¹⁹Buluke asi-amodelo midu-mimak kamato, delokke Shédíke keralok bulum monpakna kamato.

²⁰Amiem ipusilééla ina amike, yénam tabunge atung-arééla yédo.

²¹Bíkke dengepe míídungem dokaide aabomdo, delokke bíkke nyorunge pesorían agom mílílo tattído.

²²Kaamolok bí dugge peko kamang, kapeila rego konlo yokse bím tobomdung.

²³Bík simangem dope emla sogume toya bomdung; iname bík yépename kaamodung.

²⁴Ralna roje mimak aabom nam kísa dírí-kenoe bím aabomdung.

²⁵Kapeila bí Shédíme mepakla, Shédí kíng lakkéng sutdung.

²⁶De amide míítesula, aange tolla, bík tamtem Shédíke mirupe lengkan sudung.

²⁷Bík atuk-migmoe ngella, ugílo adíne bíísét dakkom;

²⁸ami duumangko kumruklo, delokke byakruk doolunglo bí dunggooyé.

²⁹Bí edílokom mirem yimayé, delokke asi-amongete kaimayé.

³⁰Bí kaamolok edílokom dugnyok gelamayé, bí appunem dooyi-asare mutkutnam, delokke aag-arak kídíem emepe romkutnam kísana esing kísayé.

³¹Loorímanem míngkesula, bí agíem atímanalo yallík sunape iyé.

³²Bíkke longe gíyinmang adape, bíme apíípe amanem biyé. Bíkke aag-arage rugyé.

³³Minmana ayémte simona onggur ane kísa bí iyé, delokke appun punmana olib esing kísa iyé.

³⁴Shédíke angun-abé kamanade, otíng-oyin kokom kamayé delokke sépsu-paasu dola ekum monamde emelok nyokyéku.

³⁵Bulu ebínem míílenne, bulu atímangem olenne, delokke buluke akii kídílo menam-yadnamem ballen modung.