Read Alladian JOB 16 Bible Online

JOB 16 - Alladian bible

JOB 16

¹Delo Job bí poyansuto:

²Dekena agom-aangem ngo kerapekai tatto. Noluke edíng agome ngome díklatdung.

³Nokke bodo-dora ngomnamde ngomrí kaiman? Nokkíng ngomtídope ingko, ingko kinam koda kadun?

⁴No ngokke ayanpe ila, ngo nokke ayanpe ila ituamílo, ngokom depe poyai. Ngoteng dumpongem dumngel dola nome ngomjé-beyé dola poyai.

⁵Ngokom nom poyil loge edíí-podííduape, delokke pola-pola nok aangemte ponyuduape.

⁶Idola ngok agom kídísi atí agérlo aamang, delokke asoope duutokom kinamem duupí sumang.

⁷Arope E Shédía, no ngom ingéé alongkai, ngok ekum-erange loorí yimangkai.

⁸No ngom motumto, delokke no ngokke mirue; Ngo alonge lang asig petome, ami kídíe sime, ngokke imemlok hakiie emla míídung.

⁹Marla Shédí bí ngome tarongpe imíktung, bí kangkila ngom kaatídung.

¹⁰Ami kídíe ngome lué-lulédung, delokke gargoola ngome migmoso pidung.

¹¹Shédí bí atímana amilo ngome ruulíktung.

¹²Ngokke ato-siro tabunge aituai, idola bí ngome ikup alongto, bí ngome alíngsok gagla ijét alongto. Bí ngome epuk apyil sukepe ila,

¹³rego miyonglok ngok amílso epugem aplíkla, ngome tarí mokettung. Depe ilateng bí ngom ayang kamang.

¹⁴Bí ngome tarí moket abuula, tumna miru sipaying kísa aatíbomdung.

¹⁵Ngome ikum-iléla, ankí-gasorem ngo tunggela, ankí-kenola ngo duudung.

¹⁶Migmoe yalídope ngo kaptíla, ngok amige bíídupe ngo ibomsukai.

¹⁷Idola ngo rulgomang, delokke ngok kumnamsi deedung.

¹⁸E amonga, ngok iyyiem pyaklum mapeka, ngok kapdudem muuyar molangka.

¹⁹Supakkom teyong telo ngok hakiie kadung, delokke ngokke ukile talengte kadung.

²⁰Ngok angonge lué-lulédung. Ngok miksie Shédí kíng dílen bidung.

²¹Akon legape angong kone pobinam kísa, Shédí kíng ngok ayanpe akone pobiduamílo emla ngo míítídung.

²²Ngok dítage gíyin dubong, delokke ngo gílat suyikupe mangko bedalo endung.