Read Alladian JOB 19 Bible Online

JOB 19 - Alladian bible

JOB 19

¹Delo Job bí poyansuto:

²No kape ngom luré-lunyo dune?

³Lemyingko no ngom gomké lukabong; annying kamape no ngom lupu-lulédung.

⁴Ngo atímangko itumíloteng, de nome adír bidunía?

⁵Ngom pemílo no agíem gaiyape míísula, ngokke adír sime ngokke imem lokke are emla míídung.

⁶Si agér si Shédíke iname emla no kénmanía? Bímin ngom batdope etku-eda golík nasi.

⁷Shédíke ngok teyolo iréénam emmin ngo agom luyan sudune, idola sékote tatbina kamang, delokke aroe emla kaabina kamang.

⁸Shédí bí ngok bedangem gílamadope itumtung, delokke ngok bedangem kaamo motung.

⁹Bí ngokke ekuserang tabungem nyokmola, ngokke amínem nyokmoto.

¹⁰Ngo san-gírla sidope, míínam sunam kaimadope, delokke ngome aimadope ito.

¹¹Shédí bí marla ngome kangki-kangakla, bíkke atíyalummana mirupe ngome itung.

¹²Bíkke maglíngem ngokke mirupe melígla, bulu ngokke tombu lokke luyu-lamgélo arung koola igootung.

¹³Ngokke bíro kídarem ngome míípakdope Shédí bí ila, ngo mibo-miying ami kísa ikai.

¹⁴Ngokke edung-erang, delokke angong-arum atí koteng kaimang.

¹⁵Ngokkíng mibo doona kídíe ngome kényimape ila, agér ina mime koo kídíete ngome miyingpe ségue ikai.

¹⁶Edílo ngo iguldope rogula, tomlík dokom béérang kídíete, agom-aang tatbiyimang.

¹⁷Ngokke arí sim ngok agí mimete namlamape idung, delokke ngokke bíro kídíete ngok ayirlo aamang.

¹⁸Ngom kaamílo koo kídíete belumla, ngilpu-ngilléla idung.

¹⁹Ngokke ngojung rekkit ete ngome kaabér-kaayérla, delokke ngokke ayanam kídíete mirupe ikai.

²⁰Ngok asig-ayosi along kídílo idapesula duudung, delokke ngo supak turkí petomla duudung.

²¹Nolu ngok angong kídíe ngom ayasutola, Shédíke alage ngome demgírtung.

²²Shédíke kísa noluteng ngome kape lurékan? Noluke ngome adír binamem iyin manía?

²³Ngokke agom kídar sime akone mínggela, kitab kolo atkum duamílo aiduai.

²⁴Demangkom agom kídar si agínpe duuyardope botalilok, líídu-líírenglo akorpe tuplík duamílo aituai.

²⁵Idola ngome méélam yalumpe, teyong among telok Ipítnabí igulpe aabiyé, emla ngo kéndung.

²⁶Ngokke asig-ayo kídísi yangkut duakom, amíl-adín sok ngo Shédíme kaapayé.

²⁷Ngok agí amigsok bím kaasuyé; bí mibo miying amipe iyimayé.

²⁸“Kape kísapei bím ngolu adír bipene?” emla noluke pokolok, ngok aapí edínge kaimato. Nolu ngom atímangem poket líkpe poge-igepenamem matato.

²⁹Idokom supak Shédíke marnamem paab teyolo, bomana yoksaem pesolangka, kebang lubinako kadung emla nolu kéndope.